1 Dikiri, ǹsun ma toto kũ pↄfɛ̃oro,

ǹsun ma sã fĩ kũ pɛ̃tɛ̃oro.

2 N kànↄ ma papa,

n ↄ tↄ̃̀ma.

3 Ma mɛ̀ gbãna làka n pɛ̃tɛ̃ yãi,

ma wá aafiaro ma durunna yãi.

4 Ma taarinↄ dàmala,

ò tↄ̃̀ma lán aso tìkisii bà.

5 Ma bↄ̀nↄ lì fↄ̃nna ũ,

ò yagi kɛ̀ ma yↄ̃nkↄkɛ yãi.

6 Má kuna, ma gↄ̃ zↄ̀lↄlↄ,

madìgↄ̃ tɛ́ ãnsisinamɛ gↄrↄ sĩnda pínki.

7 Ma kpɛwa tɛn wí yãpura,

ma mɛ̀ gbãna vĩro.

8 Má gbãna vĩro, ma mɛ̀ɛ kɛ̀ búgubugu,

matɛn wiki lɛ́ ma pↄyakana yãi.

9 Dikiri, ń pↄ́ kũ má yei dↄ̃ pínki,

ndì ma ndana ma sãnsãn.

10 Ma kù tɛn vĩ gbì gbì, ma gbãna làka,

ma wɛ́ tɛn tɛ́ kɛ doro.

11 Ma gbɛ̃nnanↄ kũ ma gbɛ̃nↄ dì gbãtɛmɛnɛ,

ma danɛnↄ dì bàa lɛ́mɛnɛ ma bↄ̀nↄ yãi.

12 Gbɛ̃ kũ ò wɛtɛ ò ma dɛnↄ dì bà kpákpamɛnɛ,

ma wɛtɛrinↄ dì yã vãni kpákũsũ kũmao,

òdigↄ̃ manafikiyã gwa kũ kↄ̃o gↄrↄ sĩnda pínki.

13 Ma gↄ̃ lán sãto bà, madì yã maro,

lán gbɛ̃ kũ a nɛ́nɛ nàtɛ bà, madì lɛ́ wɛ̃kↄ̃aro.

14 Má de lán gbɛ̃ kũ àdi yã maro bà,

madì weḿmaro.

15 Dikiri, mↄkↄ̃mmɛ ma wɛ́ dↄnyĩ,

ĩni ma yã ma, Dikiri ma Luda.

16 Ma pì, ǹsun tó ò yↄ̃̀gↄ̃ kɛmaro,

ǹsun tó ò ĩa dã ma satana yãiro.

17 Ma ka lɛtɛna,

madìgↄ̃ kú yã'ũmmanaa gũn.

18 Mani ma yã vãninↄ onnɛ sà,

zaakũ ma durunna yãin ma pↄ yakana.

19 Ma ibɛrɛ pãsĩnↄn lɛ́ vĩro,

gbɛ̃ kũ ò zã̀magu pãpãnↄn dasi.

20 Òdi yã mana fĩna bomɛnɛ kũ yã vãnio,

yã manan má tɛ́i, akũ ò ibɛrɛɛ sɛ̀ kũmao.

21 Dikiri, ǹsun ma zukũnaro,

ma Luda, ǹsungↄ̃ kú kũmao zã̀ro.

22 Ǹ mↄ́ ǹ kpámai likalika,

ma Dikiri, ma surabarii.