1 Ma wɛ́ dↄ̀ Dikirii manamana,

akũ à arɛ dↄ̀ma à ma ↄ́ↄdↄnaa mà.

2 À ma bo tↄ̃̀nↄwɛɛɛ gũn,

à ma bo fokon.

À ma gbá pɛ̀tɛ gbɛ̀si musu,

à ma zɛ gwe gíngin.

3 À lɛ̀ dufu dàmɛnɛ ma lɛ́n

ó Luda sáabukpana pↄ́ ũ.

Gbɛ̃nↄ ni e dasi, vĩna ni ń kũ,

ò Dikiri náani kɛ.

4 Arubarikaden gbɛ̃ kũ à Dikiri náani vĩ ũ,

akũsↄ̃ àdi arɛ dↄ zĩdabirinↄ kũ tãnagbagbarinↄaro.

5 Dikiri ma Luda, n yãbonsarɛkɛnanↄn dasi,

oni fↄ̃ ò yã kũ ntɛn pɛ́awɛrɛ dↄdↄro.

Tó matɛn babannɛ, à lɛ́ vĩro,

mani fↄ̃ mà o pínkiro.

6 Ń ye sa'opↄ ke gbairo,

akũ n ma gba sã mà yã mao.

Ńdi sa'opↄ kũ òdi ká tɛ́n à tɛ́ kũ

ke durunna kútɛkɛbↄ gbɛkaro.

7 Akũ ma pì: Makũmɛ la,

ma su lákũ à kɛ̃na takadan ma yã musu nà.

8 Má ye n pↄyenyĩna kɛmɛ, ma Luda,

n doka kú ma swɛ̃̀ɛ gũn.

9 Mani yãzɛde baaru kpá pari kↄ̃kakaranaa gũn,

mani ma lɛ́ nakↄ̃aro, lákũ ń dↄ̃ nà Dikiri.

10 Mádi n yãzɛdekɛ utɛńnɛro,

ma n náani kũ n surabanaao yã ò.

Mádi gí n yenyĩ kũ n yãpurao oi

pari kↄ̃kakaranaa gũnlo.

11 Dikiri, ǹsun gí ma wɛ̃nda gwairo,

n yenyĩ kũ n yãpurao gↄ̃ ma dãkpã.

12 Zaakũ yã vãni kũ à likanamai lɛ́ vĩro,

ma taarinↄ dàmala, matɛn gu ero,

à dasi de ma mìkãla, swɛ̃̀ɛ kɛ̃̀magu.

13 Dikiri, ǹ sùru kɛ ǹ ma sura ba,

Dikiri, ǹ kɛ likalika ǹ mↄ́ ǹ kpámai.

14 Wé'i gbɛ̃ kũ òtɛn wɛtɛ ò ma dɛnↄ kũ,

ò ń mì pɛ́tɛ.

Gbɛ̃ kũ ò ye mà kisira enↄ kpɛ li,

ń ãn gↄ̃ sisina.

15 Gbɛ̃ kũ òdi pimɛnɛ, taarɛ, taarɛnↄ,

wé'i ń kũ ò gↄ̃ gìri.

16 Gbɛ̃ kũ òtɛni n ki wɛtɛnↄ,

ǹ tò ń pↄ kɛmma nna ò yáa dↄ.

Gbɛ̃ kũ ò ye n surabanainↄ

gↄ̃ pi Dikiri zↄ̃kↄ̃.

17 Takaside wɛ̃ndademɛ ma ũ,

ǹ laasun lɛ́ ma yãa, Dikiri.

Mↄkↄ̃mmɛ ma kpanyĩri ũ kũ ma mìsiriio,

ma Luda, ǹsun gì kɛro.