1 Arubarikaden gbɛ̃ kũ àdi gbãnasaride yã da ũ,

Dikiri dì a bo warikɛnagↄrↄa.

2 Dikiri ni à dãkpã à a gba wɛ̃̀ndi gbã̀na,

ani arubarika daagu a bùsun,

ani a kpá a ibɛrɛnↄa ò ń pↄyeina kɛaro.

3 Dikiri ni zɛ kãao tó à wutɛna gyãn,

ani tó à futɛ gyã pìn aafia.

4 Ma pì: Dikiri, ma durunna kɛ̀nnɛ,

ǹ ma wɛ̃nda gwa, ń ma gba aafiaa.

5 Ma ibɛrɛnↄ tɛni ma wɛtɛ kũ gao ò pì:

Bↄrɛn ani ga de a tↄ́ sãtɛɛ?

6 Tó ò sù ma gwa, yã pãn òdi omɛnɛ,

òdi baaru vãni wɛtɛ ma yã musu,

gbasa òdi futɛ ò gɛ́ ò yã pì fã bàai.

7 Ma zãngurinↄ dì ma kpákpa kũ yã vãnio,

ń pínki òdi àlesi vãni dↄma ò pi:

8 Gagagyã mɛ́ à a lè,

ani futɛ a wutɛna bire gũn doro.

9 Bee ma gbɛ̃nna kũ ma a náani kɛ̀,

kũ odì ↄ kakara ta dokↄ̃nↄ gũn bò ma kpɛ.

10 Mↄkↄ̃n sↄ̃ Dikiri, ǹ ma wɛ̃nda gwa,

ǹ ma gba aafiaa de mà fĩna bońnɛ.

11 Tó ma ibɛrɛnↄ dí ma yↄ̃̀gↄ̃ kɛmaro,

manigↄ̃ dↄ̃ sà kũ ma yã kàngu.

12 Ń ma kũna ma nɛ̀sɛmana yãi,

ń tò màgↄ̃ kú n arɛ gↄrↄ sĩnda pínki.

13 Arubarikade Dikiri, Isarailanↄ Luda

zaa káaku ari gↄrↄ sĩnda pínki!

Aami! Aami!