1 Manghai Darius loh a sal boeih ha, a im kah a cun boeih ham neh Media Persia kah mangpa boeih hamla khotue kueng a saii pah. 2 Te vaengah boeilu khaw, rhalboei khaw, a hmui kah khoboei khaw, India lamloh Ethiopia hil ram ya pakul parhih lo uh. 3 A caak, a ok uh tih a hah uh phoeiah tah im la mael uh. Manghai Darius khaw a imkhan la cet tih ip dae a ih kung lamloh haenghang.

4 Te vaengah kanghai aka tawt pum-oep hlang cadong pathum te khat neh khat voek uh thae. 5 Mamih kah ming he pae sih lamtah diklai hmankah aka khuet koek ming la khueh sih. He oldawtnah he a cui la a hlat tah kutdoe a len koek pae saeh lamtah tanah te khaw dang saeh. 6 Boeimang himbai te bai saeh lam tah sui boengloeng dongah o saeh. Sui thingkong dongah yalh saeh. A leng te khaw sui ngoldoelh kamrhui la om saeh. Hnitang lupong te khaw muei saeh lamtah, a sui oi te oi saeh. 7 A cueih van bangla anih te manghai kah baerhoep la om saeh. Manghai kah paya tila thangpomnah mingthen kaw pae saeh,” a ti uh.

8 Te dongah a poek thai khuila hlatnah a then te a daek uh tih manghai kah luhoe hmuiah a khueh. Te vaengah khat neh khat te, 9 “Manghai a haenghang vaengah tah ol he a taengah pae saeh. Amah neh Persia kah boei rhoek loh a cueih koek la hlatnah te pae saeh. A ta long tah a cadaek soah kutdoe te pae saeh,” a ti uh. 10 Lamhma loh, “Yu lakah tha aka om he om pawh,” tila a daek. 11 A pabae loh, “Manghai lakah tha aka om he om pawh,” a ti bal. 12 A pathum loh, “Huta lakah tha aka om he om pawh, tedae oltak long tah mebang khaw a ta,” tila a daek.

13 Manghai a haenghang vaengah tah ol a daek uh te a taengla a paek tih a tae. 14 Te dongah puencawn a tueih tih Persia neh Media kah boeilu rhoek khaw, boeiham rhoek khaw, taemkung khaw, khoboei khaw, caeltueih rhoek khaw tun a khue. 15 Oltunnah hmuen kah ngolhmuen a loh phoeiah tah ol pathum te tha-ue la a tae. 16 “Cadong pathum te hang khuen lamtah a hlatnah te thuicaih uh saeh,” a ti nah. Te dongah a taengla a khuen pa uh van. 17 Me bang a daek uh te khaw a thuicaih uh.

18 Yu kawng aka daek cadong long te lamhma la a thui tih, “Hinyah kap rhoek, yu he diklai hman ah tha aka om koek tihe phaeng m'ming coeng. Te aka om boeih tah a lungbuei boeih a hmaang sak coeng. 19 Hlang boeih soah khaw, manghai neh cadah soah khaw, sal neh sayalh taengah khaw, boei neh khodaeng soah khaw vanat lam ni a om. 20 Hlang boeih a omngaih sak tih a yalpo sak, kothae neh a bitat khaw a hnilh sak, 21 hlang boeih boei bangla a ngai sak tih manghai neh mangpa kah saithainah khaw a hnoelrho sak. Diklai pum he khaw amah kah bangla boeih a thui sak. 22 Yu o hlang rhoek loh a paya neh imben khaw a hmaai sak. Te dongah cunghang a yueh uh tih ngawn uh thae. 23 A caih uh vaengah tah mebang a saii uh khaw ming uh voel pawh. 24 Hinyah kap rhoek aw, yu loh he tlam a saii coeng atah, yu he diklai hmanah tha aka om koek rhep coeng ni,” a ti nah.