1 Manghai kah thaomnah aka daek long khaw koe thui van tih, 2 “Hinyah kap rhoek aw, hlang lakah tha aka om koek he diklai hmanah a om moenih. Hlang long he diklai neh tuitunli sokah aka om boeih khaw, diklai hman ka a cungkuem soah khaw a uktaem ta. 3 Tedae te rhoek boeih lakah khaw manghai he a tha-om koek. Manghai tah amih kah boeipa neh a kungmah la om. Hlang loh anih ol a ngai pah, mebang ol a thui mai a khaw. 4 Amih te caemtloeknah saii ti nah koinih a saii uh mai. Amih te caemrhal taengla tueih cakhaw cet uh mai coeng. Tlang khaw, pangbueng, imsang khaw phil a ti nah ca khaw, a saii uh mai. 5 Amih te ngawn ti mai cakhaw a ngawn mai coeng. Manghai kah olpaek aka aal he a om moenih. Tanah a dang uh vaengah khaw a kutbuem boeih te manghai ham a khuen pah. Caemtloek vaengah a dang boeih te khaw a khaw a khueh pah. 6 Lotawn khaw caemtloek la a caeh pawt atah, a cangah boeih te manghai taengla a thak coeng. Pakhat loh a hui khaw manghai taengah mangmu paek hamla a tanolh coeng. 7 Manghai amah bueng he hlang la a om coeng. Pilnam te ngawn saeh a ti atah a ngawn uh mai. Thongtla rhoek te loeih saeh a ti atah a loeih sak uh mai. 8 Amih te tloek saeh a ti atah a tloek uh mai. Amih te phae saeh a ti atah a phae uh mai. Im sa a ti atah a sak u mai hoeh. 9 Khohmuen cangvuei te phae ham neh phung ham a thui akhaw a rhoi uh mai. 10 Hlang boeih, rhalkap long khaw, rhaengpuei long khaw manghai ol te a ngai uh. Anih te caak ham ok ham a ngol vaengah khaw, a ih thuk ah khaw. 11 A taengom rhoek loh a taeng rhawp a tawt, anih ol te a ngaih pawt tah, hlang loh amah ngaih la cet tih amah bi te a bi thai moenih. 12 Hinyah kap rhoek aw, he tlam ni pilnam loh manghai ol a ngai. Te dongah anih lakah tha aka om he diklai ah om pawh,” a ti nah.

13 Te phoeiah a pathumnah ah, huta neh oltak kawng aka thui he, Jerubbable ni. 14 Anih long he atong tih, “Hinyah kap rhoek, manghai he a leng moenih, hlang khaw a yet moenih, yuu khaw a tha a om moenih. A soah uh lae aka om pueng, ulong te te a uk? Te tah huta moenih a? 15 Lan neh tuitunli soah aka boei manghai neh pilnam boeih he huta long ni a sak. 16 Amih te huta dong lamkah a thoeng. Yu la than ham misur kung aka tue hlang boeih khaw huta long ni a cun. 17 Huta loh hang ham himbai a tah, hlang thangpomnah khaw a saii, huta a om pawt atah hlang khaw a om thai moenih.

18 Tongpa long sui khaw, cak khaw, hnothen khaw a kol mai khaming. Suisak a hlang aka huta te a hmuh vaengah tah, tekah hno khaw boeih khum van. 19 A taengah longhoi om tih a taengah a ka a ang. Te dongah sui khaw, cak khaw, a tloe hnothen boeih khaw anih ham ni a om coeng. 20 Tongpa loh amah anih aka cun ana pa khaw, a khohmuen khaw a toeng tih a yuu taengla kap mai hoeh. 21 A khohnin khaw a yuu taengah a thok sak tih, a napa khaw, a manu khaw, a khohmuen khaw a poeknah om voel pawh. 22 Te dongah huta loh nang soah boei a bi te poek.

Patang neh na thakthae dae a cungkuem he huta taengla na paek moenih a? 23 Tongpa loh cunghang a loh tih yin la cet. Te vaengah a hue neh, a can neh tuipuei tuiva boeih a lan. 24 Sathueng neh hum uh tih, a hmuep ah khaw cet, a huen neh, a can neh, kutbuem la a khuen te a lungnah a yuu taeng lam ni a mael.

25 Hlang long he a manu a napa lakah khaw a yuu ni a lungnah ngai coeng. 26 Hlang a yet ngai he a yung kongah a kopoek mawth tih, a yuu kah sal lam khaw om uh. 27 Huta dongah ah muep poci uh tih, tongtah uh tih tholh uh. 28 Te dongah kai nan tangnahuh a?

Manghai khaw a saithainah neh a len tarha mai moenih? Diklai loh anih ben ham khaw boeih a rhih moenih? 29 Kai ngawn tah manghai kah yuthawn Apame khaw ka hmuh coeng. Anih mueirhoi Bartacus canu la om tih manghai kah bantang ah ngol. 30 Te vaengah manghai lu dongkah rhuisam te a dul tih amah loh a khuem. Te phoeiah a banvoei kut neh manghai te a bael bal pueng. 31 Manghai long khaw a ka a ang tih sut a sawt mai. Huta te cuep a nueih a tah anih khaw nuei van. Huta loh thintoek hoel a hlah vaengah, anih khaw hlampan van. Te daengah nih rhoeknah khaw a om pai eh. 32 Hinyah kap rhoek aw, te tlam te a saiithai dongah huta he a tha a om koek moenih a? 33 Te vaengah manghai neh hlangcong rhoek khaw khat neh khat so uh thae.

Te vaengah oltak kawng te koep a thui. 34 Hinyah kap rhoek, huta he a tha-om koek pawt nim? Diklai khaw ka, vaan khaw sang, khomik khaw a caelong ah thui mai. Vaan ah a hilnah khaw tih hin at amah hmuen koep a pha. 35 Te dongah he tluk la aka len he u long a saii? Tedae oltak he len tih hno boeih lakah ah khaw a tha-om. 36 Diklai pum loh oltak te ni a khue uh tih vaan long khaw oltak ni a uem. Pathen kah bibi boeih tah lingluei neh thuennah khaw, a songrhai he a om moenih.

37 Yu khaw songrhai, huta khaw songrhai, hlang hing boeih khaw songrhai ta. Manghai khaw songrhai ta. Amih kah bibi khaw songrhai ta, tekah boeih te tah. A khuiah oltak te a om pawt atah amih a songrhai lamni a poci uh eh. 38 Tedae oltak tah kuei tih thaomnah om yoeyah. Hing tih a yoeyah la a khulae thai yoeyah. 39 Oltak longtah hlaangnah neh maelhmai sawtnah khaw a khueh moenih. Songrhainah neh halangnah a om khaw duengnah ni a thui. Hlang boeih loh te nen ni a khoboe a ming thai. 40 A laitloeknah dongah khaw a songrhainah a om moenih. A kumhal duela tha-omnah khaw, manghainah, tha-omnah neh, rhuepomnah khaw a khueh. Oltak Pathen tah a yoethen rhoe pai,” a ti nah. 41 Olthui bawt a khaw vaengah tah pilnam boeih te yuhui uh tih, “Oltak tah len tih a cungkuem lakah a tha-om koek,” a ti uh.

42 Te vaengah manghai loh anih te, “Na ngaih te hoe lah, ca dongkah a voel ah khaw, nang te kan paek bitni, nang tah aka cueih koek la kan hmuh coeng. Kamah hnukthoi la na om coeng tih kamah huiko kan kang khue coeng,” a ti nah.

43 Te dongah manghai te, “Manghai la na om vaengkah na olhlo te poek mai. Jerusalem thoh ham khaw, 44 Jerusalem lamkah na khuen hnopai boeih mael ham khaw, te Cyrus loh Babylon phae hamla a tong vaengah ni a rhoe coeng. Te te amah la mael ham na thui te. 45 Edom loh Judea a phae tih Chalden loh a rhok la a yalh sak Bawkim khaw koep sak ham na kam coeng. 46 Manghai boei aw, he ni nang taengah kan bih tih kan dawt. He ni na lennah phu lamkhaw a om eh. Te dongah vaan kah manghai taengah namah hmuilai neh a hlo te mah a soepnah hamla olhlo te soep sak mai,” a ti nah.

47 Te vaengah manghai Darius te thoo tih anih te a mok. Anih ham te hnokhoem rhoek boeih taengah khaw, khoboei rhoek taengah khaw, rhalboei rhoek neh, boeilu rhoek taengah khaw, Jerubabel taengah Jerusalem thoh ham aka cet rhoek te khoboe then neh doo uh a ti nah. 48 Coelesyria neh Phoenicia kah khoboei rhoek taengah khaw, Lebanon rhoek taengah khaw, Lebanon lamkah lamphai thing te Jerusalem la thak pah ham te a khopuei a thoh vaengah bom ham te ca a pat pah.

49 A ram lamloh Judaea la aka mael rhoek te khaw sayalh la caehnah thai ham, boei khaw tloe pawh, boeilu khaw tloe pawh, khoboei khaw tloe pawt, hnokhoem khaw tloe khaw tloe pawh, amih te thoka ah kanghalh pawt ham ca a pat. 50 Kho tom boeih ah amih kah a hut te tah mangmu khaw thoh pawt ham, Idumean loh Judah rhoek kah vangca boeih hlah pah saeh. 51 Bawk a saknah te a coengnah rhi hil tah amih te kum takuem talent pakul paek ham, 52 a thapnah ham kumkhat ah talent parha neh hnin takuem hmueihtuk dongah kah hmueihhlunah ham pae saeh, a olpaek van bangla hmueihhlut nah he hlairhih hil ah saii saeh. 53 Khopuei thoh hamla Babylon lamloh aka mael tah, camoe khaw, khoshoih rhoek khaw sayalh la om saeh,” a ti.

54 Khosoih kah a bibinah dongah a hnicu ham bomnah khaw a daek pah. 55 Levi rhoek loh bawkim neh Jerusalem a thoh te a coengnah rhi hil a bomnah ham khaw a daek pah. 56 Khopuei aka tawt rhoek boeih ham, khohmuen khaw, thapang khaw, lamphu khaw hmoel pah ham a daek pah. 57 Cyrus loh a hoep hnopai boeih te Babylon lamloh koep mael sak. Saii hamla Cyrus loh ol paek boeih te tah, anih longkhaw saii hamla ol paek tih, Jerusalem la koep a pat.

58 Cadong te a caeh neh a maelhmai te Jerusalem la a hooi tih, vaan kah manghai te a koeh. 59 Te vaengah, namah taeng lamloh tanah ha thoeng, namah lamkah tah cueihnah khaw ha thoeng, nang tah thangpomnah om pai saeh, Kai tah na sal ni. 60 Nang tah na yoethen pai, namah loh cueihnah nan paek, a pa rhoek kah Boeipa aw, namah ni kan uem coeng,” a ti.

61 Te dongah ca a loh tih Babylon la a caeh phoeiah, a huiko taengah a thui. 62 Te dongah amih long khaw a napa rhoek kah Pathen te a koeh uh. 63 Cet hang tih Jerusalem neh amih a phoeinah thil Bawkim thoh ham khaw Boeipa loh loeihnah neh kotluepnah a paek. Te dongah laa neh, omngaihnah neh hnin rhih khuiah kho a tue uh.