1 Manghai Demetrius capa Antiochus loh tuipuei sanglak lamloh khosoih neh Judah boeilu neh namtu boeih taengah ca a pat. 2 Te capat dongah tah a dangkah bangla om. Manghai Antiochus loh kosoih boei neh boeilu Simon neh Judah namtu boeih te kut kan tuuk. 3 Boekoek rhoek loh a pa rhoek kah ram taemrhainah te a loh uh coeng. Ram he koep lat ham neh lamhma kah bangla koep thoh ka ngaih. Te dongah kutloh rhalkap neh caemtloek sangpho khaw caempuei la ka khueh. 4 Te te ka khohmuen ah cu saeh lamtah, ka khohmuen aka phae rhoek neh, ka ram kah khopuei muep aka poelyoe rhoek te paan saeh ka ti. 5 Te dongah lamhma kah manghai rhoek long nangmih taengah m'paek tangtae mangmu loeihnah te koep ka cak sak, a tloe laibai thung ham koi nangmih n'loeih sak boeih te khaw kan loeih sak. 6 Na khohmuen ham namah tangka na saii tih hnonnah ham khaw kan paek. 7 Jerusalem neh hmuencim boeih te loeihnah kan paek. Lungpokhaica na tawn boeih neh hmuencak na khueh boeih khaw namah hamla om saeh. 8 Manghai thakvoh dongkah laiba na ba neh hmailong kah te tahae lamloh a voelvai due kan hlah coeng. 9 Ka ram kah taemrhainah ka dang uh vaengah, namah neh na namtu soah khaw, hmuencim khaw thangpomnah muep kan khueh bitni. Na vaengah nang thangpomnah te diklai pum ah tueng bitni,” a ti nah.

10 Kum ya sawmrhih kum li vaengah Antiochus te cet tih a napa khohmuen te a muk. Rhalkap boeih te anih taengla buung uh tih, Trypho taengah tah a yol bueng ni a om coeng. 11 Anih te Antiochus loh a hloem dongah Trypho khaw tupuei kaeng kah Dor la yong. 12 Dumlai loh amah muep a vuei coeng tih a rhalkap loh anih a toeng te khaw a ming coeng. 13 Te dongah Antiochus loh Dor te a rhaeh thil. Amah taengah hlangrhalh thawng yakhat thnawng kut neh marhang caem thawng rhet om. 14 Khopuei a vael vaengah tuipuei lamkah caemtloek sangpho loh anih te a bong. Khopuei te lan neh tuipuei lamloh khoep a khaih coeng toh pakhat khaw kunael vuenva sak voel pawh.

15 Te vaengah Numenius neh a rhoihut te Rome laloh hapai tih manghai rhoek neh khohmuen boeih ham a dangkah kah bangla capat a khuen. 16 Roman kah boeilu Lucius loh manghai Ptolemy te kut kan tuuk. 17 Judah laipai rhoek tah paya neh huitai la kaimih taengah ha pai coeng. Paya neh huitai la omnah te khaw koep ka thoelh uh. 18 Te vaengah sui photling a khiing minas thawngkhat aka lo te hang khuen. 19 Te dongah amih taengah khaw, a khopuei neh a khohmuen soah khaw, rhalthoh sak pawt ham khaw, amih taengah caemrhal aka saii nen khaw huitai la om pawt ham khaw ca pat ham ol ka tloek uh. 20 A mih lamkah photling ka dang uh te then ngawn ka ti uh. 21 Te dongah a khohmuen lamloh boekoek te nangmih taengla ha yong atah khosoih boei Simon kut dongah tloeng pah. Te vaengah amah olkhueng bangla dantat saeh.

22 Boeilu loh amah te bang te manghai Demetrius taeng neh Attalus, Ariarathes neh Arsaces ham khaw, 23 khohmuen boeih neh, Sampsames ham khaw, Spartan ham khaw, Delos, Myndos, Sicyon, Caris, Samos, Pamphylia, Lycia, Halicrnassus, Rhodes, Phaselis, Cos, Side, Aradus, Gortyna, Cnidus, Cyprus neh Cyrene ham khaw a pat pah. 24 Te catlaep te khosoih boeih Simon taengah khaw a pat.

25 Manghai Antiochus loh Dor te a pabae la a dum, a rhalkap neh tenten a dae tih, caemtloek seh khaw a khueh thil. Trypho te a khuiah khoep a tlaeng tih a voei aka bal om sak pawh. 26 Simon loh Antiochus caem aka tloek puei hamla rhalkap thawnghnih a coelh tih cak neh sui neh caem kah lungpokhaica neh muep a tueih pah. 27 Tedae te a doe hamla a thanah. Lamhma kah Simon neh kotluepnah a saii te khaw a phae tih a taengah hlanglang la a om pah. 28 A paya khukah pakhat la aka om Athenobius te a tueih tih ol a pat. “Nang van loh Joppa neh Cazara neh Jerusalem kah rhalmah hmuen taemrhainah te na tuuk. Te rhoek te ka ram dae lah ko. 29 A khori te khaw boeih na rhawt tih khohmuen te a rhorhap la muep na khueh. Ka ram kah khohmuen khaw muep na loh. 30 Tahae ah khopuei na loh rhoek te khaw, Judea rhamvoel ah khohmuen na huul kah cawn tangka boeih te khaw ka kut ah han tloeng laeh. 31 Te pawt atah, nang loh a poci na om sak phu te tangka talent yanga, khopuei rhoek kah cawn tangka talent yanga te ka kut ah han tloeng laeh. Nang te kan paan vetih caemtloeknah ka saii pawn ni he,” a ti nah.

32 Manghai paya Athenobius te Jerusalem a pha vaengah, Simon kah a rhuepomnah, amtloeng dongkah sui neh cakben um-am khaw, a boeimangnah tangkik te khaw a hmuh tih a ngaihmang. 33 Manghai kah olka te a taengla a thui pah vaengah Simon loh anih te a do tih, “Kaimih loh kholong khohmuen neh kholong kah koe te ka loh uh moenih. Hnukbuet ah ka rhal rhoek loh a songrhai la a loh tih a khoh bueng te ni dawk ka loh uh. 34 Tahae ah a tuethen ka dang uh dongah ni a pa rhoek kah rho te khak ka tuk uh. 35 Joppa neh Gazara na kuek uh te tah, amih loh pilnam neh khohmuen ah porhaknah muep a thoeng sak uh. Te rhoek ham teh nangmih taengah talent yakhat ni kan paek eh,” a ti nah. 36 Athenobius loh anih te ol kam at khaw doo pawh. A thintoek doela manghai taengah mael tih he ol neh Simon kah a rhuepomnah khaw, a hmuh boeih te a thui pah. Te dongah manghai khaw a thintoek.

37 Te vaengah Trypho te sangpho pakhat dongah luei tih Orhosia la rhaelrham. 38 Te dongah manghai loh Cendebeus tuikaeng khohmuen kah caempuei boei la a khueh tih, anih te rhalkap neh marhang caem khaw a paek. 39 Anih te Judea te rhaeh thil ham, Kedron ah vongka sak tih vongka te cak sak ham, te ol a paek. Tedae manghai mah loh Trypho te a hloem. 40 Te dongah Cendebeus te Jamnia la pawk tih pilnam te ho hamla a tong. Judea te a muk tih pilnam te tamna la a khuen phoeiah a ngawn. 41 Kedron te a thoh tih marhang caem neh rhalkap pahoi a khueh. Te nen ni Judea longpuei ah aka pongpa te manghai loh anih a uen bangla a laedawn thai eh.