1 Cendebeus kah a saii boeih te a napa Simon taengah yaaksak hamla Johan tah Gazara lamloh cet. 2 Te vaengah Simon loh a capa a ham rhoi Judas neh Johan te a khueh tih amih te, “Ka manuca khaw, kamah khaw, a pa imkhui long khaw, ka camoe uh lamloh tahae khohnin hil Israel kah caemrhal te a tloek pah. Te dongah mamih kut dongah tah ngaimongnah om tih, Israel n'loeih sak nah hnin khaw yet coeng. 3 Tedae kai ka patong coeng, nangmih he vaan kah rhennah long ni a kum neh lungcuei la n'khueh coeng. Kai neh ka manuca rhoek kah a hmuen he lo uh laeh. Cet uh lamtah mah namtu hamla huul uh laeh. Vaan lamkah bomnah tah nangmih taengah om saeh.

4 Te dongah Johan loh khohmuen kah hlangrhalh neh marhang caem thawngkul a coelh tih Cendebeus te a paan. Modein ah yin at rhaeh uh. 5 Mincang ah yueya thoo uh tih kolvan la khoong uh. Teah te khocaeh rhalkap neh marhang caem ha loh amih neh hum uh thae. Amih laklo ah soklong yalh thuk. 6 Te phoeiah Johan neh a caem rhoek amih te rhong a pai thil uh. A rhalkap rhoek loh soklong a kat ham te a rhih uh. Te dongah amah te lamhma la kat. 7 Te phoeiah a caem te phak a phih tih khocaeh rhalkap laklo ah marhang caem te a khueh. Rhal kah marhang caem tah a muep a yet dong ni. 8 Amih loh olueng te a ueng vaengah Cendebeus ne a rhalkap rhoek te bang yong uh. Te vaengah hmalaem la muep cungku uh tih a coih te hmuencak khuila yong uh. 9 Te vaeng tue ah Johan manca Judas khaw hmalaem la om. Johan loh Cendebeus te amah loh a sak Kedron hil a hloem. 10 Amih te Azotus lohma kah imsang la yong uh. Te khaw Johan loh hmai neh a hoeh tih hlang thawng hnih tluk te a pum la cungku uh. Te phoeiah anih te Judea ah dading la mael.

11 Abubus capa Ptolemy te Jerikho kolvan kah mangpa la a khueh tih, sui neh tangka muep a khueh. 12 Anih te khosoih boei kah a cava lam khaw om bal. 13 A thin a pom hang tih, khohmuen kah taemrhainah te loh hamla cai. Te dongah Simon neh a ca rhoek te khoe bangtlang ham a mangtaeng tih tangkhuepnah a saii. 14 Tahae ah Simon loh khohmuen kah khopuei te a hip tih a ngoeingaih te a ngaithuen pah. Kum ya sawmrhih kum rhih, hla hlaikhat nah Shebat hla ah tah, a ca rhoi Mattahias, Judas neh Jerikho la cet thuk. 15 Abubus capa loh amih te amah loh a sak tih, Dok la a khue hmuencak ca ah thailat la a doe. Amih te tui-ok te muep a tael pah tih a khuiah hlang a thuh sak. 16 Simon ca rhoek loh a ok uh vaengah Ptolemy neh a hlang rhoek te thoo uh. A pumcumnah te a loh uh tih buhkok impuei kah Simon te a cuk thil uh. Te dongah amah khaw, a ca rhoi neh a sal rhoek a ngen te a ngawn uh. 17 Te dongah Ptolamy loh hnukpoh muep a saii tih hnothen a thae neh a thuung.

18 Ptolemy loh he olka kawng he yaksaknah a daek tih manghai taengla a pat. Anih bom ham la caem tueih pah tih khohmuen neh khopuei rhoek te a kut dongah tloek ham a bih. 19 Lambong a tloe rhoek te Johan taengla phawn a tueih. Rhalboei taengah te ca a pat tih a taengla halo lamtah amih te cak neh, sui neh, kutdoe kan pae eh a ti nah. 20 Lambong a tloe rhoek te Jerusalem neh bawkim tlang kah khuehtawn te loh sak ham a tueih. 21 Tedae hlangvang te a hmai la yong tih a napa neh a manuca rhoek a pacinah, Gazara ah Johan te, “Nang ngawn ham khaw hlang na tueih,” tila puen uh. 22 Te yaak vaengah bahoeng la khueng. Te dongah amah thup hma aka pawk hlang rhoek te a tuuk tih a ngawn. Amih te amah ngawn ham ni m'vai uh tih n'toem uh tila a hmat coeng dongah.

23 Johan kah pongthohnah a tloe boeih neh, a caemtloeknah khaw, thinom bibi a saii te khaw, vongtung a coeng hil a sak te khaw, anih kah caemthang khaw, 24 a napa phoeiah khosoih boei la a om na hnin lamloh a khosoih cabu dongah boeih a daek.