1 Boeipa loh he ni a thui, pilnam he piyennah khui lamkah ka doek tih, amih ka sal tonghma rhoek lamloh olpaek te ka paek. Te dae hnatun uh pawt tih ka cilsuep te a hnawt uh. 2 Amih aka cun manu rhoek te thui pa uh, namah longpuei ah cet uh, ka ca rhoek, kai he nuhmai neh a voeih lamni ka om coeng. 3 Nang te kohoenah neh, kothae neh, hnorhih la kan khuen dae nang kan hlong coeng. Boeipa mikhmuh ah na tholh uh tih, ka mikhmuh ah boethae na saii uh dongah ni. 4 Tedae nangmih taengah bang nim kan saii lah ve. Kai he nuhmai neh a voeih lam ni ka om coeng, ka ca rhoek aw na longpuei ah cet lamtah Boeipa kah rhennah te toem laeh. 5 Ca rhoek kah a manu taengah laipai thapnah hamla a pa nang te kang khue coeng. Amih loh ka paipi te tuem uh hae mahpawh. 6 Te daengah ni amih taengah ngaihmangnah na khuen vetih a manu te pocinah khui la na khuen vaengah amih khaw ca om kolla a om eh. 7 Ka paipai a hnoelrhoeng uh van dongah amih te namtom rhoek taengla taekyak uh saeh lamtah a ming te diklai lamloh bit van saeh.

8 “Anunae Assyria nang aih te, na khuiah boethae na uep! Halang namtom aw, Sodom neh Gomorrah taengah ka saii te poek. 9 A khohmuen te aek tung te hmaiphu kawnhnawt lam ni a yalh lah ko. Ka ol aka hnatun pawt rhoek taengah te tlam ni ka saii eh. He tah tlungthang Boeipa long ni a thui.

10 Boeipa loh Ezra taengah, “Ka pilnam te thui pah, amih te Jerusalem kah poengnah te ka paek ni. Te ni Israel taengah khaw paek hamla ka caii. 11 Te phoeiah kamah loh amih kah thangpomnah te koep ka lat vetih, hlang tloe taengah kumhal khohmuen la ka paek ni. Te te Israel paek hamla ka hmoel coeng dae ta. 12 Hingnah thingkung loh amih te hmuehmuei botui a paek ni. Te vaengah amih te thakthae pawt vetih tawnba voel mahpawh. 13 Cet lamtah nang te n'doe bitnit, thang thui lamtah na khohnin khaw yol vetih, bawn mai bitni. Ram he nang ham la a hmoel oepsoeh coeng, ana so nawn. 14 Khue laeh, vaan neh diklai te laipai taengla khue laeh. Boethae te ka rhoe tih boethen ni ka saii he kai tah aka hing la ka om dongah ni ti he Boeipa loh a thui.

15 “Manu aw, na ca rhoek te kop laeh, amih te kohoenah neh poeh laeh. Vahu loh a saii bangla amih kho te cang sak laeh. kai long nang ka choelh coeng,” tila Boeipa loh a thui. 16 Aka duek khaw amah hmuen lamloh ka thoh vetih amih ming te ka ming coeng dongah amih te hlan khui lamloh a doek ni. 17 Camoe rhoek kah a manu aw rhihboeh, Boeipa loh nang kan tuek coeng a ti. 18 Nang bom hamla ka sal Isaiah neh Jeremiah te kan tueih ni. Amih rhoi kah cilsuep bangla ka ciim coeng tih nang ham thingkung hlainit te a thaih soepraep neh ka hmoel coeng. 19 Amah te yet buelh la sokca phuet tih suktui neh khoitui long lah ko. Te vaengah tlang a len parhih om tih a soah rhaithak neh tuilipai khaw poe. Te tlam ni na ca rhoek te omngaihnah te ka bae sak eh.

20 Nuhmai kah hamsum te ngaithuen lamtah, oldongah tiktamnah khaw tuem, vawtthoek te khaw pae lamtah, cadah te rhun, pumtling te khuk. 21 Hmalaem neh thahnoeng khaw ngaithuen lamtah aka khaem khaw lawn boeh. Aka ngoi te tungaep lamtah mikdael long khaw ka rhuepomnah he hmu van saeh. 22 Patong neh na vongtung khuikah camoe te khaw thingthung. 23 Hlang duek na hmuh vaengah amih te phuel la thak lamtah miknoek khaw khueh pah. Ka thohkoepnah khuiah nang te a hmuen tanglue kan paek van bitni. 24 Paa lamtah kuemsuem laeh, ka pilnam aw na mongnah tah ha pai pawn ni.

25 Ca-om then aw, na ca rhoek te khut lamtah a kho te cang sak. 26 Nangmih taengla kam paek sal rhoek te pakhat khaw poci boel saeh. Nangmih kah a tarhing la amih te kan suk ni. 27 Mawn boeh, soekloeknah neh notahnah hnin ha pai pawn ni. A tloe rhoek te rhah neh kothae la om vaengah, nangmih te kohoe neh a puehkan la na khueh uh ni. 28 Nangmih te hamtom loh n'uet ni. Tedae nangmih taengah pakhat ca pataeng saii ham khaw coeng uh mahpawh ti he Boeipa loh a thui. 29 Ka thaomnah loh nangmih hoeptlang vetih na ca rhoek loh hell khaw hmu mahpawh.

30 Manu aw na ca rhoek neh omngaih lah, nang kan hlawt pawn ni ti he Boeipa long ni a thui. 31 Na ca rhoek a ih te khaw poek laeh, amih te diklai a huephael hmuen lamloh kang khuen ni. Kai tah haidamnah la ka om dongah amih te ka haidamnah ka tueng ni ti he Boeipa Tlungthang loh a thui. 32 Kai ka pawk hil na ca rhoek te ana kop lamtah amih taengah haidamnah te thui pah. Ka tuisih loh a long thil vetih ka sitlohnah khaw kak mahpawh.

33 Israel taengla caeh ham khaw kai Ezra loh Horeb tlang ah Boeipa kah olpaek ka dang coeng. Amih taengla ka pawk vaengah tah kai n'haek uh te Boeipa kah olpaek te khaw a hnawt uh. 34 Te dongah nang taengah ka thui, namtom aw hnatun lamtah yakming lah. Na tudawn te rhing laeh, anih longnih nangmih dungyan mongnah m'paek eh. Anih te kut dongah rhep aka om diklai a bawtnah tue vanegah ha pai ni. 35 Ramkah thapang ham khaw sikim la om laeh. Dungyan vangnah tah nang soah sae yoeyah pawn ni. 36 He diklai hlip khup lamloh yong lamtah na thangpomnah dongah omngaihnah te dang laeh. Laipai taengah khaw ka khangkung te langya la kang khue coeng. 37 Boeipa long nang taengah a khueh te doe lamtah omngaihnah neh om laeh. Khocil ram la nang aka khue kung amah taengah uemonah khueh laeh. 38 Thoo, pai hang lamtah Boeipa kah khotue vaengah kutha a khueh rhoek kah hlangmi te so lah. 39 Amih te he diklai hlipkhup lamloh nong uh tih Boeipa lamkah thangpomnah himbai a khueh uh coeng. 40 Amih te hlangmi a soep la tae laeh, Zion aw, na pilnam kah hlangmih te khuep lamtah himbai bok neh cun laeh. Amih tah Boeipa kah olkhueng a soep sak coeng. 41 Na ca rhoek kah hlangmih tah cum coeng, amih te nih na ngaih pai. Na pilnam loh Boeipa kah saithainah te koeh saeh. Amah te a tong lamloh na khue coeng tih a cim la om pai saeh.

42 Kai Ezra loh Zion tlang ah hlangping muep ka hmuh te ka tae lek pawh. Te vaengah amih loh Boeipa te laa neh a koeh uh. 43 Amih lakli ah cadong pum len, a tloe rhoek aka sang om. Amih a lu dongah rhuisam rhip a khuem uh. Tedae anih tah amih la thangpom uh. Te vaengah te ka thui lek pawh. 44 Te phoeiah puencawn te, “He rhoek kah he uh lae, ka boeipa,” ka ti nah. 45 Te vaengah kai n'doo tih, “Amih tah aka hmawn thai himbai te a dul tih, aka hmawnmueh himbai aka bai, Pathen ming aka phong rhoek ni. Amih he rhuisam a khuem uh tih rhophoe a dang uh coeng,” a ti.

46 Te phoeiah puencawn te, “Cadong ca te u lae? Rhuisam aka khuem tih a kut dongah rhophoe aka pom rhoek tah uh lae,” ka ti nah.

47 Amah loh kai te n'doo tih, “Anih tah Pathen Capa ni, anih he diklai ah a phong uh,” a ti. Te dongah Boeipa ming dongah khak aka pai rhoek te koeh hamla ka tong.

48 Te phoeiah puencawn loh kai tengah, “Cet lamtah, ka pilnam te thui pah. Boeipa Pathen kah kopoekrhainah metlam a len tih metla a yet khaw na hmuh coeng,” a ti.