1 Khopuei a pocinah hnukkah kum sawmthum vaengah te Babylon ah ka om. Kai he Salathiel tih Ezra la a khue te khaw kamah ni. Ka thingkong dongkah ka yalh vaengah ka mawn tih ka thinko kah ka poeknah khaw limlum. 2 Zion kah pocinah neh Babylon khosa rhoek kah a khuentawn te ka hmuh vaengah. 3 Ka mueihla khaw muep nga coeng tih ka mawnnah te Khohni taengah ni ka thui. 4 Te vaengah Sangkoek Boeipa aw, diklai na phueng cuek vaengah na thui moenih a? Bomnah om muehla laipi khaw ol na paek te ta. 5 Te long te nang taengah Adam a pum hong la mpaek. Te khaw na kut dongkah suentae la a om dongah anih te hingnah hil na sang pah tih na mikhmuh ah hlang hing la om. 6 Te phoeiah anih te diklai a phoe hlanah na bantang kut loh a tue dum ah na om sak. 7 Anih soah olpaek pakhat na khueh pah dae te khaw a poe. Te dongah anih ham neh a cadil rhoek hamla dueknah pahoi na khueh pah. Anih lamloh namtom rhoek khaw, natum rhoek khaw, pilnam koca rhoek khaw tae lek pawt la thoeng. 8 Te dongah namtom boeih loh amah kongaih hnuk a vai uh tih, na mikhmuh ah laiklak la hno a saii uh. Na olpaek te a hnawt uh dae amih te na khoep na kha voel pawh. 9 Tedae diklai kah khosa boeih soah tuili na khuen tue vaengah tah amih te na thup. 10 Amah yoekam loh amih soah a tlak vaengah tah Adam sokah dueknah a pai bangla amih soah tuili khaw pai van. 11 Tedae amih khuikah pakhat ngawn tah na hlun. Noah neh a imkhui khaw, a cadil khui lamkah aka dueng rhoek boeih te khaw.

12 Te rhoek te diklai ah kho a sak uh tih pahoi pungtai uh. A ca rhoek khaw pilnam neh namtom la muep a sak uh. Te vaengah a napa rhoek lakah khaw lailak la pahoi muep om uh bal. 13 Na mikhmuh tah boethae a saii uh li vaengah amih lamkah hlang khat neh namah ham na coelh bal. Anih ming tah Abrahamni. 14 Anih na lungnah tih anih taengah ni a tue a bawtnah khaw khoyin ah duem dawk na thui pah. 15 Anih neh dungyan paipi na saii tih a cadil khaw hnoo tlaih pawt ham ol na khueh. Te dongah anih te Isaak na paek, Isaak taengah Jakob neh Esau na paek. 16 Jakob tah namah ham na hoep tih Esau te na hoep. Te vaengah Jakob te hlangping pilnu la poeh. 17 Te phoeiah a cadil te Egypt la na khuen tih Sinai Tlang la na thak. 18 Vaan te na koiloep tih diklai na rhuek vaengah lunglai thoeih. Te vaengah a dungah khaw let tih a tue khaw thuen. 19 Na thangpomnah loh hmai vongka pali neh, lingluei khaw, khohli khaw, vueltlang khaw a poe. Jakob cadil taengah olkhueng paek ham neh Israel kah khobuhnah dongah na olpaek te na paek ham vaengah.

20 Amih thinko lamkah a boethae te na loh pah mahnim?. Na olkhueng te amih ah a thaih khaw cuen mai mako. 21 Lamhma la Adam khaw a thae thinko loh a nan dongah a aek tih a poe. Anih lamkah cadil rhoek khaw amah moek la boeih om uh. 22 Te dongah a tloh khaw phat a rhung pah. Olkhueng khaw pilnam kah thinko ah tah a thae bangla a yung a sak. Tedae a then loh a nong tak tih a thae loh a naeh pah. 23 Tedongah a tue khum tih kum a cup vaengah tah na sal pa, a ming la David te namah hamla na thoh. 24 Na ming neh khopuei thoh ham khaw, na olcaeng bangla nawn ham namah ah ka om te khaw a taengah na uen. 25 He khaw kum a sen a vai uh coeng dae khopuei khosa rhoek loh a poe uh bal. 26 A cungkuem dongah Adam kah a saii bang la a cadil rhoek long khaw a saii uh te a thinko ah boethae a om dongah ni. 27 Te dongah ni na khopuei te na thunkha rhoek kut dongla na tloeng.

28 Te vaengah ka thinko ah tah, Babylon khosa rhoek kah khoboe tah then tloe nim? Balae tih Zion soah uktaemnah a dang? 29 He la ka pai vaengah khoboe lailak khaw tae lek pawt hil ka hmuh. Ka hinglu loh kum sawmthum khuiah hlang tholh khaw ka hmuh. Te dongah ka thinko khaw bawt coeng. 30 Hlang tholh rhoek te puet na ueh khaw ka hmuh. Halang la kho aka boe te na hlun . Na pilnam te na thup tih na thunkha rhoek vik te tungaep. 31 Na khosing a nuemnai ham pakhat kangna khaw na tueng mahnim? Babylon kah khoboe tah Zion kah rhoek lakah then tloe nim? 32 israel phoeiah tah namtu a tloe na ming om nim? Jakob koca rhoek bangla paipi aka tangnah koca te om nim? 33 Te lalah pataeng a thapang tueng pawt tih, a thakthae kah a thaih khaw cuen pawh. Namtom lakli ah khaw paeng ka yiin coeng tih amih kah khuehtawn a coih khaw ka hmuh coeng. Amih khaw na olpaek dongah kotalh la om uh van dae ta. 34 Te dongah kaimih te diklai khosa rhoek kah boethae te coi dongah khiing lah. Te nen ni coi metla a ngoi khaw a longim a tueng eh. 35 Diklai khosa rhoek tah na mikhmuh ah tholh uh pawt nim? Mekah namu long nim na olpaek te a then la a tuem? 36 Amah pum ah na olpaek aka tuem te rhip na so cakhaw namtom khuiah he na hmu mahpawh,” ka ti.