1 Kaca aw, khodaeng kah khosaknah te yoop boeh Vawtthoek mik neh aka rhing te khaw mangthung tak boeh.

2 Bungpong khaw kothet sak boel lamtah, aka vawtthoek khaw thintoek sak boeh.

3 Kobawt kah ngaihmangnah te koei pah boeh, aka vawtthoek khaw paek hamla uelh boeh.

4 Patang neh kutduen te khaw haek boel lamtah, khodaeng taeng lamloh na maelhmai mangthung boeh.

5 Aka vawtthoek taeng lamloh na mik a tloe ka hoi boeh, thang thaephoei thil ham rhoidoengnah khueh boeh.

6 Hinglu aka khahing loh nang n'tap vetih, Amih suenkung loh a thangthuinah te ya lah ve.

7 Hlangping taengah khaw namah rhoinaeng lah, hlang len taengah na lu khun sak mai.

8 Yaaknah te khodaeng ham khueh pah lamtah, amih kah voemtoeinah khaw olthen la thuung.

9 A hnaemtaek te hnaemtaekkung kut lamloh hlawt lamtah, amih te a tang paek hamla uelh boeh.

10 Cadah ham a napa la om pah lamtah, a manu taengah khaw a va bangla om pah. Te daengah ni Khohni capa la na om vetih, amah loh na nu lakah khaw n'lungnah eh.

11 Cueinah loh a ca a thuituen tih, amah aka rhoek te bomnah a paek.

12 Amah aka lungnah loh hingnah khaw a lungnah tih, mingcang lamloh amah yueya aka tlap tah omngaihnah bae.

13 Amah khak a tu loh thangpomnah a pang tih, a kunnah hmuen te Boeipa loh yoethennah a paek.

14 Amah taengah tho a thueng te A cim Pathen ham ni, amah aka lungnah te Boepa loh a lungnah.

15 A ol aka ngai rhoek loh namtom lai a tloek vetih, te aka hnatun boeih tah hiluepnah neh hing ni.

16 Uepomnah neh aka tukkoei long te te a pang vetih, a tiingan long khaw te te a dang ni.

17 Caethae longpuei ah khaw amih taengah lamhma la cet vetih, amih soah rhinah neh lakuengnah khaw a khuen pah ni. Amih te nganboh nen khaw, amah a uepnah hil amih te a toel ni. Te phoeiah amih te a olrhi neh a noemcai ni.

18 Te phoeiah amih te long dueng la a mael puei vetih, ko a hoe sak phoeiah amih ham olhuep a phoe pah ni.

19 A phaelh la a caeh uh atah amih te a hnoo vetih, amih te a pocinah ham a voeih ni.

20 A tue then te dawn lamtah, boethae te rhalrhing,

21 namah te rhaidaeng la om saii boeh.

22 Namah aka ngawn hamla hlaangnah khueh khueh boeh, na tlaknah hamla a lang la om boeh.

23 A tuengnah dongah tah olcal khaw paih boeh, na cueinah khaw phah boeh.

24 Cueinah he khaw olthui thingka loh a mingpha sak tih, hmuilai dongkah ol he tah lungmingnah la om.

25 Oltak te oelh boeh, na kotalhnah he yah hamla om.

26 Na tholhnah te phong hamla yak boeh, tuiva kah tuithaa te mah hamla cai boeh.

27 Hlang ang taengah yalh pah boel lamtah, ukkung taengah hlaangnah khueh boeh.

28 Oltak ham te na dueknah hil hnuei lamtah, Boeipa Pathen loh nang yuengla a hnueih bitni.

29 Na olcal dongah buhueng pom boeh, na bibi dongah khaw yaikawt ngakyalnah khueh boeh.

30 Na imkhui ah sathueng bangla om boel lamtah, na tueihyoeih te ngaihoih boeh.

31 Dang ham bueng la na kut te phuel boel lamtah, paek ham tue vaengah khaw na kut poem boeh.