13
Tobit Loh Pathen A Uem
1 Te vaengah Tobit loh, Kumhal duela aka hing Pathen tah a yoethen pai saeh, A ram tah lunglai boeih kah a hnukkhueng duela cak.
2 Amah loh a phaepa dae a rhennah a tueng sak, Diklai laedil hmuen kah Saelkhui duela a mawt coeng dae, tangrhom dung khui lamlong khaw koep a doek. Anih kut aka poe thai he pakhat khaw a om moenih.
3 Aw Israel ca rhoek, amah te namtom mikhmuh ah ming uh, Amih loh nangmih te amih lakli ah n'thaek coeng. 4 Teah pataeng nangmih taengah a lennah n'tueng coeng. Amah te mulhing khosa boeih kah mikhmuh ah thangpom pai saeh. Amah tah maih kah Boeipa neh mamih kah Pathen ni. Amah tah mamih napa la om tih dungyan Pathen la om.
5 Na tholh bangla amah long nan te m'phaep ni, Tedae nang sokah boeih dongah khaw a sitlohnah a tueng sak, Namtom boeih taeng lamloh nang te n'coi ni, Amih taengah nangmih te n'taek n'yak mai cakhaw,
6 Amah taengla na thinko boeih, na hinglu boeih neh na mael tih, A mikhmuh ah a then te na sai mak atah, Amah te nang taengla ha mael ni. Te vaengah na mikhmuh ka saii te hmai, Na ol khueh boeih nen khaw amah te pai puei. Duengnah Boeipa te uem lamtah
Kumhal manghai te thangpom. Ka vangsawn khohmuen ah pataeng amah ni ka pai puei, Namtom hlangtholh rhoek taengah pataeng amah kah Thadueng neh rhuepomnah ni ka tueng. Nangmih hlangtholh rhoek a hnukla ha mael laeh, a mikhmuh ah a thuem mah saii uh, Nang soah kolonah neh n'sawt vetih, Nang soah haidamnah a khueh khaming.
7 Kai tah ka Pathen ni ka thangpom, Ka hinglu khaw vaan kah manghai dongah a kohoe.
8 A rhuepomnah te pilnam cungkuem loh thui saeh, Amah te Jerusalem ah pai puei saeh.
9 Aw Jerusalem, khopuei cim, Na kut dongkah khoboe ah ni amah long nang m'phaep, Tedae duengnah ca rhoek soah tah haidamnah a khueh bitni,
10 Amah tah a then dongah Boeipa te ming uh, Kumhal kah manghai te uem uh. Te daengah ni a dap te na khuiah omngaih la han thoh eh. Na khuiah tamta la aka om boeih soah khaw a omngaih eh.
Na khuikah ngaihmang la aka om boeih te a lungnah eh, Kumhal duela cadilcahma taengah khaw.
11 Khosae then tah diklai khobawt duela sae ni. Khohla lamkah namtom boeih khaw nang taengla halo ni, Diklai khobawt neh khohla bangsang kah khosa rhoek khaw na ming cim hamla om ni Vaan manghai ham te a kut dongah kut dongah kutdoe a khuen uh. Cadilcahma phoeikah cadil camhma boeih loh namah dongah omngaih la koehnah a khueh ni Na ming te a coelh khopuei ah kumhal duela om pawn ni.
12 Nang taengah olthae ol aka thui tah a yoethae saeh, Nang aka vueinan boeih neh, Na vongtung aka phil boeih khaw a yoethae saeh. Na imsang aka palet boeih Na im dongah hmai aka pak khaw, Tedae nang aka hinyah boeih tah kumhal duela a yoethen saeh.
13 Cet laeh lamtah duengnah ca rhoek boeih soah omngaih laeh, Amih tah thikat la tingtun uh pawn ni. Kumhal kah BOEIPA te a koeh uh pawn ni.
14 Nang aka lungnah tah a yoethen pai. Namah kah khuehtawn dongah aka omngaih tah a uemom coeng. Nang ko aka thae puei pilnam boeih tah omngaih coeng, Namah citcai dongah khaw Namah taengah ni a omngaih uh eh. Namah kah thangpomnah te kumhal duela laipai puei saeh.
15 Ka hinghlu aw, boeilen manghai, Boeipa te uem lah, 16 Jerusalem tah kumhal kah a im bangla a thoh pawn ni Ka tiingan lamkah a meet ca khaw sueng mai koinih bahoeng ka omngaih sue, Na thangpomnah neh vaan manghai mingnah te a hmuh lah mako
Jerusalem vongka te minhum neh lungsen neh a sak ni. Na vongtung boeih te tah lungto lungvang neh a sak ni, Jerusalem rhaltoeng im te sui neh a sak vetih A rhalmah im te sui cilh neh a sak ni. Jerusalem longpuei te khaw tamkuei neh Ophri lungto a phaih ni
17 Jerusalem vongka rhoek loh omngaihnah Laa a sak vetih, Im boeih long khaw ‘Hallelukah’ neh tamhoe uh ni
Israel kah Pathen tah a yoethen pai saeh A ming cim khaw kumhal ah kumhal duela a yeothen pai saeh.