1 Te tlam te Tobit kah koehnah ol tah bawt

2 Tobit kum ya kum kul a lo vaengah duek tih a lenkoek hinyahnah neh Nineveh a om uh. Anih he sawmrhuk kum nit a loh a mik tueng pawh. Te phoeiah khaw koep then tih ngaikhuek la hing. Doedannah dongah Pathen kah yoethennah kha a puh pah. Te vaengah Pathen kah rhuepomnah khaw a ming.

3 A duem tom vaengah tah a capa Tobias neh Tobias ca rhoek parhi te a khue tih hekah ol he a paek. “Ka capa aw na ca rhoek te hang khuen paeh. 4 Media la tlek yong laeh. Nineveh kawng ah Nahum loh Pathen ol a thui te ka tangnah. Te ol boeih te tah Assyria neh Nineveh soah thoeng pawn ni. Te Israel tonghma rhoek loh a thui ngawn coeng. Amih te Pathen loh a tueih dongah thoeng pawn ni. Ol boeih he aka hloo om mahpawh. Amah a tue a pha vaengah oltak la thoeng ni. Te dongah Assyria neh Babylon lakah khaw Media ah a dingsuek eh. Pathen loh a thui te tah soep vetih oltak la thoeng ni tila ka tangnah. Tonghma ol he tah pakhat khaw hloo mahpawh. Ma cako boeih Israel khohmuen ka khosa boeih khaw, a thaek vetih khohmuen then lamloh tamna la a khuen ni. Israel khohmuen boeih te khopong la om ni. Samaria neh Jerusalem khaw khopong la om ni. Pathen bawkim khaw amah diklai ah a hoeh uh vetih mikhap tok ah khopong la poeh ni.

5 Tedae Pathen loh amih soah haidamnah a khueh ni. Te vaengah Pathe amih te Israel khohmuen la a mael puei vetih Pathen bawkim koep a sak uh ni. A tue soepnah a pha hlan hil tah lamhma kah pakhat bangla om mahpawh. Te phoeiah tah vangawn lamloh mael uh vetih Jerusalem rhuepom la a sak uh eh. Israel tonghma rhoek loh a thui bangla te vaengah Pathen bawkim khaw a sak uh ni.

6 Namtom boeih khaw thovael uh vetih oltak dongah Pathen a bawk uh ni. Amih khohmang la aka mawt a mueirhol te khaw a hnawt uh ni. 7 Duengnah dongah dungyan Pathen te a koeh uh pawn ni. Te khohnin ah tah Israel ca boeih daem uh pawn ni. Oltak ah Pathen poeknah neh tun tingtun uh ni. Amih te Jerusalem la ce tih uh vetih Abraham khohmuen ah kumhal due sading la kho a sak uh ni. Te te amih taengah ni a paek eh. Lunghoeih la Pathen aka lungnah rhoek a kohoe ni. Tedae tholhnah neh halangnah aka sai boeih tah diklai lamloh milh ni.

8 Te dongah ka capa nang kang uen coeng. Pathen taengah uepom la thothueng lamtah a mikhmuh a thuem mah saii. Na ca rhoek khaw a thuem saii ham neh doendannah khueh ham te uen. A tue boeih dongah khaw a poeknah neh a thadueng ah khaw Pathen kah lungbuei te khueh saeh lamtah a ming te uem saeh. 9 Te dongah ka capa aw Nineveh lamloh nong laeh, heah he om boeh.

10 Kai taengah na nu rhok na up nen tah khopuei pingpang ah he hlaem pakhat pataeng rhaeh boeh. A khui metla a halang uh khaw ka hmuh coeng. A khui ah laithae muep a saii uh. Te vaengah pilnam he a yah a khueh moenih.

Ka capa aw, Nadab loh A hikat te a lungnah tih a taengah a saii lah ko. Anih om voel pawt dae hing pueng, diklai khuila a suntlak puei ta nama? He bang yahkoi kho boeng dongah ni Pathen loh anih te a thuung. Ahikat te khosae la koep a mael vaengah Nadab tah dunyan khohmuep khui lamni a suntlak. Anih loh Ahikar te ngawn hamla a taeng. Tedae Ahikat tah hlang doedannah a khueh dongah, anih ham Nadab a tung pah dueknah hlaeh lamloh loeih. Tedae Nadab amah te cungku tih milh. 11 Te dogah ka ca aw, doedannah loh a hoeikhang sak te khaw, halangnah loh dueknah a om sak te khaw ming. Tedae kai tah ka hil awt coeng,” a ti nah.

Te phoeiah anih te thingkong dongah a yalh sak uh tih duek. Te vaengah anih rhokom khaw hinyahkap la a dang. 12 Tobias manu a duek vaengah khaw ana pa taengah a up. Te phoeiah tah a yuu a ca neh Media la mael tihEcbatana kah a masae Raguel taengah kho a sak. 13 A mae sae rhoi khaw a patong hinyahnah neh a sawt. Amih rhoi te Media Ecbatanah a up. Anih loh Raguel kah khaw, a napa Tobit kah koe te khaw boeih a pang.

14 Tobias he kum ya neh kum hlai rhih a lo vaengah hinyanah a om tloe la duek. 15 A duek hlan ah mah Ninevah a cungku te a yaak coeng. Media la thongtla a khuen te khaw, Media mang Cyaxered loh tamta a khuen te khaw a hmuh. Nineveh neh Assyria pilnam soah a cungkuem a saii pah vanbangla Tobias loh Pathen te a koeh. A duek hlanah mah Nineveh te omngaih la a uem coeng. Boeipa Pathen te kumhal ah a uem yoeyah. Amen