EPHESUS
MITE HENGA
PAUL LEKHA THOT
Christa a pankhomna
Jesu Christaa gou ichan dingu aloupi jal'a akiloma hinna!
Ephesus lekhabu sung thu umdan
Ephesus Lekhathot hin ihin-lonau ajeh asunin ahi. Hiche lekhathot sunga hin akhang akhanga mihon thudoh ana bol jingu, “Hikoma (vannoiya) hi ipi bol dinga uma kahim?” ti adonbutna hin nalung atijatsah thei ahi. Nalunglut em? Lekhabu hi nangma tah in kisimin. Pathen to kilhon khomna thudol ipat pan bep'u ahin, chule hichu eiho phattou cheh chehna ding hung hiding ahiti, het angaiye. Hiche lekha thot sim'a kon hin Solchah Paul in ihinau kihetdohna le Pathen ngailutna chang ihiu kimudohna inei diu hi alung gon ahi. Nangman Pathen ami hina le ami ngailutna na chunga hi atepi bei ahi ti, nahin mudoh ding ahi Eph 1:17-23; Eph 3:15-21. Hijeh chun Solchah Paul to kithokhomin Christa'a gou kichai tih umlou ahaona'a Pathen houkhomna jao ding in eiseipeh uve Ephesus 3:8. Solchah Paul in Ephesus lekha thot ajihna a hin, Christa tahsan jouse Lhagaova kipumkhat hina ding thua vetsahna jatchom chom eipeuve, ti mudoh theiyin aumin ahi.
Lekha thot jihpa chule ajih kum
Solchah Paul in AD 60-62 don'a Rome khopia songkul atan laiya ajih ahi.
Koi henga ajih ham?
Hiche lekhathot hi Solchah Paul'in Asia gamkai hop'a cheng, adeh'a Christian ho henga akhopiu-Ephesus mun'a umho dinga ajih ahi. Ephesus khopi hi milim houna munpi (Asia sung pumpia dinga Diana pathen'u houna in) kisahna'a chu numei hougut noti, mi sangkhat um-uva ahi. Chujongleh Pathen ngaisahlou chihna ngailu ho thuhil holeh lhagao kipui lamvaina doile ai-choi tamna khopi ahi. Hijeh a chu Paul hin atahsan thahho hi Christa to kipum khat hina le mithah ahina akihet diu deina'a hiche lekha thot hi anajih ahi.
1
1 Hiche lekhathot hi Pathen lunglama Christa Jesu solchah, Paul, a kon ahi. Keiman Pathen mithengte ho Christa Jesua tahsan umtah'a anung juiya pang Ephesus a umho henga kajih ahi.✡ Act 18:19-21; 19:1 2 I-Pau Pathen le Pakai Jesu Christa chun nangho lungsetna le cham-lungmon napeu hen.
Christa jal'a lhagao vangbohna
3 I-Pakaiyu Jesu Christa Pa chu vahchoina jouse chang hen: Ajeh chu eiho Christa to hing khoma ihitah jeh uvin, Ama chun eiho hi van munhoa lhagaolam phattheina tinchenga eiphatthei boh u ahi. 4 Aman vannoi leiset asem masanga jong Pathen in eingailut uva chule Christan atheng dinga eina lhendoh uva chule Amitmua suhkhel beihela eikoiyu ahitai. 5 Pathen in Ama insung mi hidinga Ahenga eipuiyu hi Jesu Christa jal'a chapa lamthua eisem theina dingu alung gonsa le alunglhaina tah ahiye. 6 Hiti chun lungsetna loupi tah Achapa a angailutna ichunguva ahin sunlhahtah jeh in Pathen chu ivahchoiyun ahi. 7 Ama mihepina le lungset themna a haotah ahina jal a Aman ichonset nau ngaidam channa le Achapa thisan a ichamlhat nau manbeiya achohdoh ahitai.✡ Col 1:14 8 Aman Amihepina hi chihna le hetkhen themna jousea ichung uva ahin lhunsah ahitai. 9 Pathen in tua hi Christa chung chang thua, atohgon thuguh chu alung lhaina tah a asuhbulhit got eiho henga aphondoh ahitai. 10 Chule hiche atohgon chu: Aphatcha Aman ijakai Christa thuneina noiya vana hihen leichunga hijongleh ahin umkhom sah sohkei ding ahitai. 11 Chukalval'in, eiho Christa toh hingkhoma ihitah jeh uvin, eihon Pathena gouchan ding inei tauve, ajeh chu Aman amasanga einalhensau ahitan, chule Aman ijakai atohgonsa dungjuiya ahin tohdoh sohkei ahitai. 12 Pathen in ana lunggon umsa chu, eiho Judah mite hin, Christa a tahsan masate ihi jaluva Pathen chu vahchoina le loupina ipeh theina dingu ati ahi. 13 Chule tun chidang namdang nangho tah in jong, thutah, Pathen in nahuhhing nau Kipana Thupha thu chu naja tauve. Chule nanghon Christa natahsan uva chu Aman Amaa te nahi nau nahetpeh nauva Lhagao Theng chu napeh u ahi; hichu Aman masang peh a ana thutepsa ahitai. 14 Lhagao chu Pathen in anathutepsa igoulo dingu chu ahi atia chule hichu aman amite hidinga eina chohdoh sau ahitai. Hichu eihon Ama ivahchoiyuva chule loupina ipeh theina dingu ahi.
Chihna le hetna dinga taona
15 Keiman nangho Pakai Jesu tahsanna a nahat'u chule muntina Pathen mite na ngailut nau thudol kana jah a pat chun, 16 Keiman nangho jal'in Pathen thangvahna tanglou hel'in kaneiyin, nangho dingin katao jingin ahi. 17 I-Pakaiyu Jesu Christa Pa loupi tah chun lhagao lama chihna le lunggila mugilna napeh uva, hitia nangho Pathen nahet nauva nakhantou theina dingu ahi. 18 Nangho nalung sungu chu vah'in alonvuh dima hitia chu nanghon khonunga kinepna loupi tah, akouho peh dinga akitepna chu nanei theina ding uva katao ahi. Aman amite chu itobang tah a haona le loupina goulo ding apeh ham ti kagel doh sah nom nahiuve. 19 Chule kataona jong hi Ama tahsan hon Pathen thaneina ichan geiya len a ham ti nahetdoh theina dingu ahiye. Hiche hi chuche thahatna chungnung chun, 20 Christa chu athi lah a kona akaithouva chule Pathen khut jetlam jabolna'a Van mun'a chu atousah ahitai.✡ Labu 110:1 21 Tua hi Ama avaihoma, athuneiya, athaneiya, alamkaiya ahilouleh ipi dang hijongleh hiche vannoi sehseh a bou hilouva, amavang vannoi ahung umnalai chunga jong hinalai ahi. 22 ✡ Col 1:18Pathen in thil ijakai Christa thuneina noija akoiya chule houbung phatchomna dinga thil jouse chunga aluchanga atun ahitai.✡ Labu 8:6 23 Chule houbung chu atahsa ahin, hichu Christa in ijakaiya Amaa adimsah a, abulhinsah a achamkimsah ahitai.
Thina a kon hinna
DRAFT COPY