1 Iwe, lon ewe föpükü waliken ier mürin än ekewe aramasen Israel towu seni ewe fanü Isip, lon arüanün ierin än Salomon nemeni Israel, fän ewe maram Sif, iei aruuen maram, Salomon a popuetä le aüetä imwen ewe Samol mi Lapalap. 2 Ewe imwenfel ewe king Salomon a aüetä fän iten ewe Samol mi Lapalap ükükün langataman tiue fiit, chölapan ilik fiit me tekian faik me limu fiit. 3 Iwe, ewe kengkang mi nom mesen ewe imwenfel ükükün chölapan ilik fiit, a nönnöfengen me chölapen ewe imwenfel, nge langataman ükükün engol me limu fiit. 4 A föri asamwachon ewe imwenfel mi wattelong lon o ti ngeni mächä. 5 A pwal föri pwalangen lepekin me lükisökürün ewe imw won ülüngat sässärin o föri rumwen lor. 6 Iwe, aeuin sässär ükükün chölapan fisu esop fiit, ewe aruuen sässär ükükün chölapan tiu fiit, nge ewe aülüngatin sässär ükükün chölapan engol esop fiit. Pun Salomon a föri along mi iti seni pwelin ünükün etippen ewe imwenfel, pwe ekewe irälap resap tolong lon etippan.

7 Nge lupwen ra aüetä ewe imwenfel, ra aea fau mi fen fal me lon ewe lenien för fau. Iei mine esap wor eman a rong chopuchopun ama ika kouk ika och pisekin angang seni mächä, lupwen ewe imwenfel a kaütä.

8 Iwe, ewe asamen tolong lon ewe aeuin sässär a nom peliörün ewe imwenfel. A wor eu latö seni ewe aeuin sässär tori ewe aruuen sässär, pwal seni ewe aruuen sässär tori ewe aülüngatin. 9 Iei usun Salomon a aüetä ewe imwenfel o awesala. A aea irälap me pap seni ewe irä setar le tenchoni ewe imw. 10 Iwe, ükükün tekian lefilen eu me eu kewe ülüngat sässärin ewe pwalang mi nom ünükün ewe imwenfel fisu esop fiit, ra pach ngeni ewe imwenfel ren irälap seni ewe irä setar.

11 Iwe, ewe Samol mi Lapalap a üreni Salomon, 12 “Are kopwe aleasochisi ai kewe allük me pwüüng, pwe kopwe apwönüretä o föri pwüngür, mürin üpwe apwönüetä ngonuk ai pwon üa fen pwon ngeni Tafit semom we. 13 Iwe, üpwe imweimw lon ei imwenfel ka aüetä lein nei kewe aramasen Israel, nge üsap likitirela.”

14 Iei usun Salomon a aüetä ewe imwenfel o awesala. 15 A ccheni etippen lon ewe imwenfel ngeni pap seni ewe irä setar, seni fan tori tenchon. Nge lon ewe imwenfel a aea pap seni ewe irä saipires. 16 Nge lesopuchikin ewe imw me lon a refiela eu rum ükükün langataman ilik fiit o ccheni seni fan tori tenchon ngeni pap seni ewe irä setar. Ei rum a iteni rum mi unusen pin. ✡ Eks 26.33-34 17 Iwe, ewe rum sosowun ewe rum mi unusen pin ükükün langataman wone fiit. 18 Nge ekewe pappen lon ewe imwenfel seni ewe irä setar a rup wor liosun pamkin me pön irä mi mas. Unusen lon ewe imwenfel a cchech ngeni pap seni ewe irä setar, pwe esap wor eföü fau a pwäwu. 19 Salomon a amolätä ewe rum mi unusen pin sosolong, pwe epwe iseis lon än ewe Samol mi Lapalap we pworofel. 20 Iwe, ewe rum mi unusen pin ükükün langataman ilik fiit, ükükün chölapan ilik fiit, nge ükükün tekian pwal ilik fiit. Salomon a apacha kolt mi mürina ngeni unusen lon ewe rum. A pwal föri eu rongen asor seni ewe irä setar. 21 Salomon a pwal apacha kolt mi mürina ngeni unusen lon ewe imwenfel o rietä sein seni kolt ngeni ewe lenien tolong lon ewe rum mi unusen pin mi fen kapachetä kolt won. 22 Iwe, a apachätä kolt won unusen ewe imwenfel me lon tori a kuula. A pwal apachätä kolt won unusen ewe rongen asoren ötüöt mi nom mwen ewe rum mi unusen pin. ✡ Eks 30.1-3

23 Iwe, a föri uluulun ruoman kerop seni ewe irä olif o anomuur lon ewe rum mi unusen pin, langatamen eman me eman leir ükükün engol me limu fiit. 24 Eman me eman leir a wor ruofoch pöükässin, nge efoch me efoch pöükäs ükükün langataman fisu esop fiit. Nge seni ülülen efoch pöükäs tori ülülen pwal ewe efoch ükükün engol me limu fiit. 25 Iwe, pwal ewe eman kerop ükükün langataman engol me limu fiit. Ir me ruoman kewe kerop a nönnöfengen kaükür me lapalaper. 26 Iwe, ükükün langatamen eman me eman kerop engol me limu fiit. 27 Salomon a anomu ekewe uluulun kerop lon ewe rum mi unusen pin me lon ewe imwenfel. Nge pöükässin ekewe kerop ra meresila, pwe efoch pöükässin ewe eman a küw ewe etip me epek, nge efoch pöükässin pwal ewe eman a küw pwal etippen ewe epek. Nge pwal pöükässir kewe ruofoch ra itifengen me lukalapen ewe imwenfel. 28 A pwal apachätä kolt won ekewe uluulun kerop. ✡ Eks 25.18-20

29 Iwe, Salomon a ruputi liosun kerop me irä palm pwal pöön irä mi mas won etippen pwelin unusen ewe rum mi unusen pin me ewe rum mi pin. 30 A pwal mwo nge pwölü ngeni kolt lon ewe rum mi unusen pin me ewe rum mi pin.

31 Salomon a föri ruu asam fän iten ewe lenien tolong lon ewe rum mi unusen pin seni ewe irä olif. Nge lapalapen irän penkasamer a wor limu ininin. 32 Iwe, won ekewe ruu asam mi för seni ewe irä olif a ruputi liosun kerop, irä palm me pön irä mi mas. A apachätä kolt won ekewe asam, pwal won ekewe liosun kerop me irä palm.

33 Salomon a pwal föri üren penkasamen ewe lenien tolong lon ewe rum mi pin seni ewe irä olif, nge tekian me chölapen ewe lenien tolong ra wewefengen. 34 A föri ruu asam seni ewe irä saipires, nge eu me eu kewe asam ra tongeni num fän ruu. 35 Iwe, a ruputi wor liosun kerop, irä palm me pön irä mi mas o apachätä kolt wor. 36 A pwal senätä tittin ewe leni mwen ewe imwenfel won ülüngat sässär ren fau mi fal, pwal eu sässär ren ewe irä setar.

37 Iwe, lon ewe arüanün ierin mwün Salomon fän ewe maram Sif, iei ewe aruuen maram, longolongun imwen ewe Samol mi Lapalap a för. 38 Nge lon ewe engol me euin ier fän ewe maram Pul, iei awaluen maram, ewe imwenfel a wesöchüla lon tichikin angangan me akotan meinisin. Iwe, Salomon a aüetä ei imwenfel lon ükükün fisu ier.