1 Iwe, aramasen ewe fanü ra filätä Joahas nöün Josia we mwän o seikätä pwe epwe siwili saman we lon wisan wisen king me lon Jerusalem. 2 Iwe, Joahas a ierini rüe me ülüngat, lupwen a tolong lon wisan wisen king. A nom lon Jerusalem o nemeni Juta lon ükükün ülüngat maram. 3 Mürin, Neko ewe kingen Isip a atowu Joahas seni wisan me lon Jerusalem. A pwal angei takises seni chon Juta ina epwe ükükün fisungeröü limepükü paun silifer me fik me limu paun kolt. 4 Iwe, Neko ewe kingen Isip a seikätä Eliakim pwin Joahas we, pwe epwe kingen Juta me Jerusalem, nge a siwili itan ngeni Jehoiakim. Nge Neko a angei Joahas o uweela Isip.

5 Iwe, Jehoiakim a ierini rüe me limu, lupwen a tolong lon wisan wisen king. A nom lon Jerusalem o nemeni Juta lon ükükün engol me eu ier. Jehoiakim a föri mine a ngau me fän mesen ewe Samol mi Lapalap an we Kot. ✡ Jer 22.11-12; Jer 22.18-19; 26.1-6; 35.1-19 6 Nge Nepukatnesar ewe kingen Papilon a feito o maun ngeni Jehoiakim. Iwe, a föti ngeni selimächä o uwala Papilon. 7 Nepukatnesar a pwal uwala ngeni Papilon ekoch pisek seni lon imwen ewe Samol mi Lapalap o anomuur lon imwan imwen king me lon Papilon. ✡ Jer 25.1-38; 36.1-32; 45.1-5; Tan 1.1-2 8 Nge lusun pworausen än Jehoiakim föför, ekewe föför mi anioput a föriir me an kewe föför mi ngau, a makelong lon puken uruwon ekewe kingen Israel me Juta. Iwe, Jehoiachin nöün we mwän a siwili lon wisan wisen king.

9 Iwe, Jehoiachin a ierini engol me walu, lupwen a tolong lon wisan wisen king. A nom lon Jerusalem o nemeni Juta lon ükükün ülüngat maram me engol rän. A föri mine a ngau me fän mesen ewe Samol mi Lapalap. 10 Iwe, wesin ewe ier, ewe king Nepukatnesar a tinala chon künö pwe repwe uwala Jehoiachin Papilon fiti ekewe pisek aüchea seni lon imwen ewe Samol mi Lapalap. Mürin a seikätä Setekia pwin saman we, pwe epwe kingen Juta me Jerusalem. ✡ Jer 22.24-30; 24.1-10; 29.1-2; Is 17.12; Jer 37.1; Is 17.13

11 Iwe, Setekia a ierini rüe me eu, lupwen a tolong lon wisan wisen king. A nom lon Jerusalem o nemeni Juta lon ükükün engol me eu ier. ✡ Jer 27.1-22; 28.1-17 12 Setekia a föri mine a ngau me fän mesen ewe Samol mi Lapalap an we Kot. Esap atekisonätiu o aüselinga mine ewe soufos Jeremaia a eäni kapas ngeni fän alon ewe Samol mi Lapalap. 13 A pwal ü ngeni ewe king Nepukatnesar mi pesei ngeni an epwe eäni pwon fän akapel iten Kot pwe epwe allükülük. A chök tipepöchökül o tipeförea, nge esap kul ngeni ewe Samol mi Lapalap ewe Koten Israel. ✡ Is 17.15 14 Pwal ekewe souemwenin Juta, ekewe souasor me ekewe aramas ra fokun likitala Kot o apirü föförün chon ekewe mwü meinisin mi fokun anioput, ra pwal atai pinin imwen ewe Samol mi Lapalap, i a apini me lon Jerusalem.

15 Nge ewe Samol mi Lapalap än ar kewe lewo we Kot a chök sopwela le tinala nöün chon künö pwe repwe uwei an kapasen fön ngeniir, pun a tongei nöün aramas me imwan we imwenfel. 16 Nge ir ra chök sopwela le turunufasei nöün Kot kewe chon künö, ra oput an kapas o ämängaua nöün kewe soufos, tori ewe Samol mi Lapalap a aworato an lingeringer won nöün aramas, nge esap chüen wor eman a tongeni sü seni.

17 Iwe, Kot a tinala ren ekewe chon Juta ewe kingen Papilon, pwe epwe maun ngeniir. Ätei a niela nöür alüal ren ketilas me lon ar imwenfel, nge esap tongei alüal ika föpwül, chinlap mwän ika chon apwangapwang. Kot a atolongeer meinisin fän nemenien Nepukatnesar. ✡ Jer 21.1-10; 34.1-5 18 A pwal uwala Papilon pisekin ewe imwenfel meinisin, ekewe pisek kükün me watte, pwal ekewe pisek aüchea seni lon imwen ewe Samol mi Lapalap me ekewe pisek aüchea meinisin än ewe king me nöün kewe nöüwis. 19 Iwe, ra kenala ewe imwenfel o ataetiu tittin Jerusalem, ra pwal kenala ekewe imw watte o ataela ekewe pisek aüchea meinisin. ✡ 1.King 9.8 20 Iwe, ewe king Nepukatnesar a uwala Papilon chokewe mi chüen manau, nge ra wisen chon angang ngeni, pwal ngeni nöün kewe mwän, tori ewe mwün Persia a ütä. 21 Ren ei a pwönüetä mine Jeremaia a apasa fän alon ewe Samol mi Lapalap, pwe ewe fanü epwe pwapwaäsini an kewe ierin sapat. Lon ükükün ekewe rän meinisin ewe fanü a tala, a fisitä ekewe ierin sapat, tori fik ier ra wesila. ✡ Jer 25.11; 29.10

22 Iwe, lon aeuin ierin mwün Sirus ewe kingen Persia, ewe Samol mi Lapalap a amwökütükütü leluken Sirus pwe epwe föri pworausen asilesil ngeni unusen mwün. Ei a fis pwe epwe pwönüetä mine Jeremaia a apasa fän alon ewe Samol mi Lapalap. Iwe, Sirus ewe kingen Persia a maketiu, 23 “Iei aloi ngang Sirus ewe kingen Persia: Ewe Samol mi Lapalap, ewe Koten läng, a ngeniei ekewe mwün fanüfan meinisin. Iwe, a filiei pwe üpwe aüetä eu imwenfel fän itan me lon Jerusalem lon ewe fanü Juta. Ämi meinisin mi iteni nöün Kot aramas oupwe feila Jerusalem. Ewe Samol mi Lapalap ämi we Kot epwe etikemi.” ✡ Is 44.28