22
1 Iei alon ewe Samol mi Lapalap ngeniei, “Kopwe feitiu lon imwen ewe kingen Juta o apasa ikenan ekei kapas, 2 ‘Oupwe rongorong alon ewe Samol mi Lapalap, en kingen Juta mi mot won än Tafit lenien motun king, pwal noum kewe nöüwis me ekewe aramasen Jerusalem. 3 Iei alon ewe Samol mi Lapalap: Oupwe föri mine a wenechar me pwüng o angasa ewe mi riaföü seni ewe chon ariaföüü. Ousap föri mine a ngau ika ariaföüü ewe chon ekis, ewe mi mäsen me ewe fefin mi mä pwülüan, ousap pwal niela eman esap wor an tipis lon ei leni. 4 Pun are oupwe fokun aleasochisi ai kei kapas, mürin ekewe mwirimwirin Tafit repwe sopwela le wiseni ewe wisen king. Repwe tolong me lon asamalapen ei imw, ir me nöür kewe nöüwis me nöür aramas fän war woken me oris. 5 Nge are ousap aleasochisi ekei kapas, üa püsin akapelüei pwe ei imwen king epwe wiliti eu imw mi tala. Ngang ewe Samol mi Lapalap üa kapas.’ ✡ Mat 23.38; Luk 13.35 6 Pun iei alon ewe Samol mi Lapalap fänäsengesin imwen ewe kingen Juta, ‘En ka mürina usun ewe fanü Kiliat me rei, ika usun ungen ewe chuk Lepanon, nge üpwe fokun föri pwe kopwe wiliti eu fanüapö, ika eu telinimw esap so. 7 Üpwe tinala chon kata, repwe ataok iteiten eman me eman fän an pisekin kata. Repwe pöküela om kewe irä setar mi fokun mürina o atururolong lon ekkei. 8 Mürin aramas seni chomong mwü repwe pwerela lükün ei telinimw o aisfengen lefiler: Pwota ewe Samol mi Lapalap a föri ei sokun föför ngeni ei telinimw mi lapalap? 9 Iwe, repwe pälüeni: Pun ra likitala ewe pwon än ewe Samol mi Lapalap ar we Kot o fel ngeni pwal ekoch kot o angang ngeniir.’ ”
10 Ämi aramasen Juta, ousap kechüeiti ika letipeta
usun ewe king Josia, ätewe mi mäla.
Nge oupwe kechüangaueiti Joahas nöün we, ätewe mi oola,
pun esap chüen liwinsefäl
o küna poputän fanüan. 11 Pun iei alon ewe Samol mi Lapalap fänäsengesin Joahas ewe kingen Juta nöün Josia we mwän, ätewe mi siwili saman we le nemenem, “A feila seni ei leni, nge esap fokun chüen liwinsefäl. ✡ 2.King 23.31-34; 2.Kron 36.1-4 12 Epwe mäla lon ewe leni ia a oola ie, nge esap fokun chüen künasefäli ei fanü.”
13 Feiengauen ätewe mi aüetä imwan fän pwüngingau
o föri an kewe rumwen won fän rikirik,
a angangamwäli chon arun,
nge esap ngeniir liwinir.
14 Feiengauen ätewe mi apasa,
“Üpwe aüetä eu püsin imwei mi watte
fiti rumwen won mi wämong.”
Iwe, a föri asammwachon imwan,
a etippa ngeni pappen ewe irä setar
o peiniti ngeni peinit mi par.
15 Ifa usun, ka ekieki pwe ka king
pokiten chomongun om kewe irä setar?
Semom we a mongö o ün,
a pwal föri mine a wenechar o pwüng.
Iei mine a fefeitä lon manauan.
16 A peni ekewe mi wöüngau me mwelele lon kapwüng,
iei mine a fefeitä.
Ifa usun, esap pwärätä pwe a sileei ren ei sokun föför?
17 Nge en ka chök ekieki usun om kütta win fän rikirik. Ka niela chokewe esap wor ar tipis
o föri angangen ariaföü me mwänewüs ngeni noum aramas.
Ewe Samol mi Lapalap a kapas. 18 Iei mine ewe Samol mi Lapalap a apasa fän äsengesin Jehoiakim ewe kingen Juta nöün Josia we mwän,
“Aramas resap kechüeiti, lupwen epwe mäla, o üra,
‘Woko pwi’ ika ‘Wole mongeei.’
Resap kechüeiti o apasa,
‘Woko äm samol’ ika ‘Woko äm king.’ ✡ 2.Kron 36.5-7
19 Aramas repwe peiaseni usun ar peiaseni eman aas,
repwe etekenawu
o aturawu lükün asamalapen ewe telinimw Jerusalem.”
20 Ämi aramasen Jerusalem, oupwe feitä won ewe chuk Lepanon o puchör, oupwe alapatä mweliemi lon Pasan
o siö me won ekewe chukun Moap,
pun peliemi meinisin ra kuf.
21 Üa kapas ngenikemi, lupwen oua chüen pisekisek,
nge oua üra, “Aisap mochen aüseling.”
Iei lapalapemi seni me lom,
pwe ousap aleasochis ngeni ai kewe kapas.
22 Asepwäl epwe pönala nöümi kewe chon emwen meinisin,
nge peliemi kewe repwe oola.
Mürin oupwe säw o itengau
pokiten ämi kewe föföringau meinisin.
23 Ämi mi nom won ewe chuk Lepanon o imweimw imwesetar,
oupwe fokun ngüngü, lupwen cheuch a cherikemi,
eu cheuch usun cheuchen fam a cheri eman fefin.
24 Iei alon ewe Samol mi Lapalap ngeni Jehoiachin ewe kingen Juta nöün Jehoiakim we mwän, “Mwo manauei, inamwo ika kopwe wewe ngeni efoch ringen pwau mi nom won pöüifichi, üpwe chök üttukowu ✡ 2.King 24.8-15; 2.Kron 36.9-10 25 o asechukolong lepöün chokewe mi mochen angei manauom, lepöün chokewe ka niuokusitiir, fokun lepöün Nepukatnesar ewe kingen Papilon me nöün kewe sounfiu. 26 Üpwe säsikemiila me inom mi nöünuk lon eu fanü ewe ia ousap uputiu me ie, iwe, oupwe mäla ikenan. 27 Nge ewe fanü oua positi, ousap fokun liwiniti.” 28 Ifa usun, ei mwän Jehoiachin esap wewe ngeni eu pör mi mök o pöütüla, esap wor eman a mochen eäni? Pwota i me nöün kana ra oola lon eu fanü resap sisilei?
29 Ämi chon ei fanü, ämi chon ei fanü, ämi chon ei fanü,
oupwe rongorong än ewe Samol mi Lapalap kapas,
30 “Oupwe makeetiu pwe ei mwän esap wor nöün,
i eman mwän esap fefeitä lon ränin manauan.
Pun esap wor eman mwirimwirin
epwe king o siwili Tafit
le nemenem lon Juta.
Ngang ewe Samol mi Lapalap üa kapas.”