1 Iwe, a wor ükükün fik nöün Ahap mwän me lon Samaria. Jehu a makela toropwe ren ekewe sounemenemen ewe telinimw Samaria, ren ekewe souakom, pwal ren ekewe mi foleni nöün Ahap kewe mwän. Iei usun mine Jehu a makei lon ekewe toropwe, 2 “Ra nom remi, nöün ämi we king kewe mwän, a pwal wor remi woken me oris, pwal telinimw mi pöchökül tittir me pisekin maun. Lon ewe otun, lupwen ei toropwe a torikemi, 3 oupwe filätä eman me lein nöün ämi we king kewe mwän, ätewe mi mürina o pwora seniir meinisin, oupwe seikätä lon wisen king o maun fän itan.” 4 Nge ekewe sounemenem ra fokun niuokus o üra, “Nengeni, ekewe ruoman king resap tongeni fiu ngeni Jehu. Epwe ifa usun ach sipwe tongeni fiu ngeni?” 5 Iei mine ätewe mi wisen nemeni imwen ewe king me ätewe mi wisen nemeni ewe telinimw, pwal ekewe souakom me ekewe mi foleni nöün Ahap kewe mwän ra titila ren Jehu o üra, “Äm aia noum chon angang, aipwe föri meinisin mine kopwe ürenikem. Äm aisap seikätä eman pwe epwe king. Kopwe chök föri mine a mürina me reöm.” 6 Mürin, Jehu a makela rer aruachön toropwe. Iei usun mine a makei lon, “Are oua nom won peki o molotä ämi oupwe aleasochisiei, oupwe pökü üen nöün ämi we king kewe mwän o uwato rei me lon Jesrel lesor lon ei chök otun.” Iwe, nöün ewe king kewe mwän ükükün fik ra nom ren mwän mi iteföüla me lon ewe telinimw, pun ra foleniir. 7 Iwe, lupwen ewe toropwe a toriir, ra angei nöün ewe king kewe fik mwän o nirela, nge ra anomu mökürer lon chüük o tinirela Jesrel ren Jehu. 8 Nge lupwen ewe chon künö a feito ren Jehu o üreni pwe ra uwato möküren nöün ewe king kewe mwän, Jehu a üra, “Oupwe iseniir lon ruu ioi leasamalapen tittin ewe telinimw tori lesosor.” 9 Iwe, lon ewe sosoran, Jehu a feila ren ewe asamalap o üreni ekewe aramas meinisin, “Ämi ousap tipis. Ngang ätewe mi rawangauei king Joram o niela. Nge iö a niela ätekei meinisin? 10 Iei oupwe mefi pwe än ewe Samol mi Lapalap kapas meinisin usun chon leimwen Ahap ra pwönüetä. Pun ewe Samol mi Lapalap a föri usun mine nöün we chon angang Elias a apasa fän alon.” 11 Mürin, Jehu a niela chokewe meinisin mi chüen manau seni chon leimwen Ahap me lon Jesrel, pwal nöün kewe meilap mi iteföüla, chiechian kewe me nöün kewe souasor, tori esap chüen wor eman mi manau me leir. ✡ Os 1.4

12 Mürin, Jehu a towu seni Jesrel o feila Samaria. Nge lupwen a nom won ewe al o kan ngeni Pet-eket ewe lenien chon fofol sip, 13 Jehu a churi märärin Ahasia ewe kingen Juta o aisiniir, “Ämi märärin iö?” Nge ir ra pälüeni, “Äm märärin Ahasia. Äm aia feito, pwe aipwe churi än ewe king famili me än kiwin Isipel famili.” 14 Nge Jehu a üreni ekewe mwän mi eti, “Oupwe turumanaueer.” Iwe, ra turumanaueer o nirela ükükün faik me ruoman mwän ünükün ewe chönüttu lon Pet-eket. Jehu esap amanaua eman me leir.

15 Iwe, lupwen Jehu a feila seni ikenan, a churi Jonatap nöün Rekap we mwän, pun a feito pwe epwe churi. Jehu a kapong ngeni o aisini, “Ifa usun, lelukom a wenechar ngeniei usun lelukei ngonuk?” Jonatap a pälüeni, “Ewer.” Mürin, Jehu a üreni, “Ika a iei usun, sipwe kamwöchüpöüfengen.” Iei mine ra kamwöchüpöüfengen, nge Jehu a amwöchätä, pwe epwe mot ren won waan woken. 16 Iwe, Jehu a üreni, “Kopwe etiei pwe kopwe küna ai tiliken fän iten ewe Samol mi Lapalap.” Iwe, a eti Jehu le sai won waan woken. 17 Nge lupwen ra tori Samaria, Jehu a niela meinisin mi chüen manau seni chon leimwen Ahap, tori a aroserela usun Elias a apasa fän alon ewe Samol mi Lapalap.

18 Mürin, Jehu a achufengeni ekewe aramasen Samaria meinisin o üreniir, “E fen kükün än king Ahap angang ngeni ewe anü Paal. Nge ngang epwe kon watte ai angang ngeni. 19 Iei mine oupwe körato rei nöün Paal kewe soufos meinisin, ekewe chon fel ngeni, pwal nöün kewe souasor meinisin. Esap tiwela mwo eman, pun a wor eu asor mi watte üpwe eäni ngeni ewe anü Paal. Iteiten eman me eman mi tiwela epwe mäla.” Nge Jehu a föri ei fän rawangau, pwe epwe arosala chokewe meinisin mi fel ngeni ewe anü Paal. 20 Mürin, Jehu a allük, “Oupwe asilefeili eu mwich mi pin fän iten Paal.” Iwe, ra asilefeili ei pworaus. 21 Jehu a pwal tinala chon künö lemenen Israel meinisin, pwe repwe körato ekewe chon fel ngeni ewe anü Paal meinisin. Iwe, ra feito meinisin, pwe esap wor eman a tiwela. Ra tolong lon ewe imwen Paal, pwe ewe imw a urela seni esop tori esop. 22 Iwe, Jehu a üreni ätewe mi wisen tümwünü ekewe üf, “Kopwe uwawu ekewe üf mi pin fän iten chokewe meinisin mi fel ngeni Paal.” Iei mine a uwawu ekewe üf mi pin fän iter. 23 Mürin, Jehu me Jonatap nöün Rekap we mwän ra tolong lon ewe imwen Paal. Iwe, Jehu a üreni ekewe mi fel ngeni Paal, “Oupwe pii pwe esap wor eman nöün ewe Samol mi Lapalap chon angang epwe nom leimi, pwe ämi chök chon fel ngeni Paal.”

24 Iwe, Jehu a tolong, pwe epwe eäni asor ekewe mönün asor me asoren kek ngeni Paal. Nge Jehu a anomu walik mwän lükün ewe imwen Paal o üreniir, “Oupwe niela ekei aramas meinisin. Ika eman me leimi a mwütätä pwe eman me leir epwe süla, ätewe epwe mäla.” 25 Lon ewe otun, lupwen Jehu a wes le eäni ewe asoren kek, a üreni ekewe chon mas me ekewe meilap, “Oupwe tolong o nirela, nge ousap mwüt ngeni eman epwe süla.” Iwe, ra tolong o nirela ren ketilas o atururowu lükün. Mürin ra tolong lon ewe rumwen lon ewe imwen Paal, 26 ra uwawu ewe ür mi pin mi nom lon o kenala. 27 Iei usun ra atai ewe ür mi pin me ewe imwen Paal. Nge aramas ra eäni ewe imw lenien ngasala tori ikenai.

28 Iei usun Jehu a aükätiu än aramas fel ngeni ewe anü Paal me lon Israel. 29 Nge Jehu esap kul seni ekewe tipis Jeropoam nöün Nepat we mwän a föri, lupwen a emweni chon Israel ngeni tipis. Pun a sopwela le fel ngeni ekewe uluulun kow seni kolt mi nom lon Petel me Tan. ✡ 1.King 12.28-30 30 Iwe, ewe Samol mi Lapalap a üreni Jehu, “Pokiten ka angangöch le föri mine a pwüng fän mesei, ka pwal föri ngeni chon leimwen Ahap meinisin mine üa ürenuk, mwirimwirum kewe repwe wiseni ewe wisen king me lon Israel seni ei tettel tori arüanün.” 31 Nge Jehu esap aleasochis ngeni än ewe Samol mi Lapalap ewe Koten Israel allük ren unusen lelukan. Esap kul seni ekewe tipis Jeropoam a föri, lupwen a emweni Israel ngeni tipis.

32 Lon ekana rän ewe Samol mi Lapalap a popuetä le akükünüla ewe fanü Israel. Iwe, Hasael ewe kingen Siria a liapeni ekei kinikinin fanü me lon Israel: 33 Ewe fanü peliötiuen ewe chanpupu Jortan, unusen ewe fanü Kiliat, iei kinikinin chon ekewe ainangen Kat, Rupen me Manasa, seni Aroer mi nom lon ewe lemolun ewe chanpupu Arnon, tori Kiliat me Pasan. 34 Nge lusun pworausen än Jehu föför meinisin me an pwora a mak lon puken uruwon ekewe kingen Israel. 35 Iwe, Jehu a mäla, nge ra peiaseni lon Samaria. Nge Jehoahas nöün we mwän a siwili lon wisan wisen king. 36 Jehu a nom lon Samaria o nemeni Israel lon ükükün rüe me walu ier.