Osea
Kapas akom
I. Iten ei puk: Osea, pun mine a mak lon, püsin pworausan me an kapasen osuni. Wewen ei it Osea: Ewe Samol mi Lapalap i ai Chon Amanau, ika Kot ai Chon Alilis.
II. Chon makei ei puk: Osea
III. Itelapemongen ei puk: Kot a pwäri an tong ngeni chokewe mi kul seni.
IV. Kapas aüchean ei puk Osea: Mi wor ülüngat kapas aüchea:
1. Esap wor lomoten än eman pwomweni chök pwomwen souläng.
2. Aramas ra fokun ngau, esap wor och mi mürina lon manauer.
3. Än Kot tong esap müchüla.
V. Masouen ei puk Osea: Ewe soufos Osea a afalafala ekewe aramasen Israel lon ewe mwün Efeng, lupwen fansoun a wor osukosuk me weires, mwen Samaria a tala lon ewe ier 721 mwen Kraist (B.C.) Osea a föri an angang mürin ewe soufos Amos. A fokun ekieki usun än ekewe aramas angang ngeni uluulun anümwäl me ar resap allükülük ngeni Kot. Osea a aliosunätä ar kirikiringau won püsin an pwüpwülü ngeni eman fefin mi kirikiringau. Usun chök än pwülüan we itan Komer kirikiringau ngeni, iei usun nöün Kot kewe aramas ra likitala ewe Samol mi Lapalap. Kot epwe apwüngüür fän iten met ra föri. Nge lesopolan epwe chök wor än Kot tongei nöün aramas. Kot epwe aliwinisefäli ekewe chon Israel ngeni püsin i o aöchüsefäli lefiler. An tong a pwä lon ekei ititin kapas: “Ifa usun ai üpwe tongeni fangatä en Israel? Ifa usun ai üpwe tongeni likitukela? ... Letipei a siwil, ai tong a pwichikar o nüküchar” (11.8).
VI. Tettelin masouen ei puk:
Än Osea pwüpwülü a aliosunätä lefilen Kot me chon Israel 1.1–3.5
Kapasen osuni usun feiengauen Israel 4.1–13.16
Eu afalafal usun ekieksefäl me än Kot pwon 14.1-9
1
Pwülüen Osea we mi kirikiringau me nöün kana
1.1-11
1 Iei ewe pworaus ewe Samol mi Lapalap a asile ngeni Osea nöün Peri we mwän lon mwün ekewe kingen Juta iter Usia, Jotam, Ahas me Hiskia, pwal lon mwün Jeropoam nöün Joas we mwän ewe kingen Israel. ✡ 2.King 15.1-7; 2.Kron 26.1-23; 2.King 15.32-38; 2.Kron 27.1-8; 2.King 16.1-20; 2.Kron 28.1-27; 2.King 18.1–20.21; 14.23-29
2 Iwe, lupwen ewe Samol mi Lapalap a popuetä le fos ngeni Osea fän iten chon Israel, a üreni, “Kopwe feila o angei eman fin lisowu pwe pwülüom, epwe pwal nöünöü me womw, nge nöün kana repwe kirikiringau usun chök i. Pun iei usun aramasen ei fanü ra föri angangen lisowu ren ar likitieila ngang ewe Samol mi Lapalap.” 3 Iei mine Osea a feila o angei Komer nöün Tiplaim we föpwül, pwe pwülüan. Nge neminewe a pwopwo me won o nöüni eman ät.
4 Iwe, ewe Samol mi Lapalap a üreni Osea, “Kopwe aita ngeni ewe ät ‘Jesrel’, pun ekis chök fansoun mürin üpwe apwüngü chon leimwen Jehu fän iten än Jehu ni ekewe aramas me lon Jesrel, üpwe pwal awesi ewe mwün Israel. ✡ 2.King 10.11 5 Lon ena fansoun üpwe akufu än Israel mwichen sounfiu me lon ewe lemolun Jesrel.”
6 Iwe, Komer a pwopwosefäl o nöüni eman nengin. Mürin, ewe Samol mi Lapalap a üreni Osea, “Kopwe aita ngeni ewe nengin ‘Esechen’. Pun ngang üsap chüen echeni ekewe chon Israel ika amusala ar kewe tipis. 7 Nge üpwe echeni ekewe chon Juta. Ngang ewe Samol mi Lapalap ar we Kot üpwe amanaueer, nge sap ren pisekin maun, ren föün esefich ika ketilas, ren oris ika chon wawa oris.”
8 Iwe, lupwen ewe nengin itan Esechen a mwü seni oup, Komer a pwal pwopwo o nöüni eman ät. 9 Mürin, ewe Samol mi Lapalap a üreni Osea, “Kopwe aita ngeni ewe ät ‘Sap Nei Aramas’. Pun ämi chon Israel ousap nei aramas, nge ngang üsap ämi Kot.”
10 Nge iteiten ekewe chon Israel repwe wewe ngeni ekewe föün pien aroset esap tongeni aükük ika lea. Iwe, iei Kot a üreniir, “Ämi ousap nei aramas.” Nge epwe war ewe fansoun epwe üreniir, “Ämi nöün Kot ewe mi Manau.” ✡ Rom 9.26 11 Nge ekewe aramasen Juta me ekewe aramasen Israel repwe chufengensefäl o filätä fän iter eman chök chon emweniir. Repwe fefeitä me lon ewe fanü, pun ewe ränin Jesrel epwe eu rän mi fokun aüchea.