1 Įłàà sǫǫ̀mba-nàhtsį̀ı̨-dǫǫ̀ eyıts'ǫ hołı̨ı̨-hogehtsı̨ı̨-dǫǫ̀ Zezì weyatıì ts'ııhkw'ǫ̀ gı̨ı̨wǫ t'à wemǫǫ̀ nègı̨ı̨de. 2 Hanìkò Pharısee gı̨ı̨lı̨ı̨ eyıts'ǫ Nǫ̀htsı̨-yatıì-k'ègedìı-dǫǫ̀ gıgha nezı̨-le t'à ełets'ǫ̀ hagedı, “Eyı dǫ hołı̨ı̨-hogehtsı̨ı̨-dǫǫ̀ edets'ǫ̀ agohɂı̨, eyıts'ǫ goxè shètı̨,” gedı.

3 Eyıt'à Zezì goxè godo, hadı, 4 “Naxıta ts'ǫ dǫ ı̨łè sahzǫ̀ą ı̨łèakw'eènǫ wets'ǫ hanìkò ı̨łè dıkǫèhgè nı̨dè sahzǫ̀ą łǫǫ̀tǫènǫ-daats'ǫ̀-łǫǫ̀tǫ sìı ekìı-ka gehteè agole gà sahzǫ̀ą ı̨łè whìle sìı yegòhɂà gots'ǫ̀ yekanıwǫ ha hǫt'e. 5 Yegòį̀hɂǫ nı̨dè sıì wınà t'à edekǫ̀ ts'ǫ̀ nayeehgè ha. 6 Edekǫ̀ nǫ̀ǫtła nı̨dè edeàgı̨ą eyıts'ǫ dǫ yegà nàgedèe sìı ts'ǫ̀ dıı hadı ha, ‘Sets'àahdè, sesahzǫ̀ą dıkǫèhgèe ı̨lèe sìı naèhtı̨ t'à, sexè naxınà welè,’ gòhdı ha. 7 Eyı xèht'eè hołı̨ı̨-hohtsı̨ı̨-dǫǫ̀ ı̨łè edek'enadlı̨ nı̨dè, yak'e geèhkw'ee sìı sıì gınà ha hǫt'e. Łǫǫ̀tǫènǫ-daats'ǫ̀-łǫǫ̀tǫ ehkw'ı geeda kò, hołı̨ı̨-hohtsı̨ı̨-dǫǫ̀ ı̨łè edek'enadlı̨ nı̨dè yak'e geèhkw'ee sìı weghǫ denahk'e gınà ha hǫt'e.”

8 “Ts'èko ı̨łè satsǫ̀ą dètìı hoònǫ wets'ǫ sìı ı̨łè weghǫ dıkǫdeèwò nı̨dè ek'aèk'ǫ yìhtła gà hazǫǫ̀ gok'eetį̀ xè hotıì nezı̨į̀ yekanıwǫ ha-le nì? 9 Yenagòhɂǫ nı̨dè edeàgı̨ą eyıts'ǫ dǫ gıgà nàdèe sìı gokàehɂà gà hagòhdı ha, ‘Sesatsǫ̀ą dıkǫdeèwòo sìı wenagòhɂǫ t'à sexè naxınà welè,’ hadı ha. 10 Ehkw'ı anaxèehsı̨, eyı xèht'eè hołı̨ı̨-hohtsı̨ı̨-dǫǫ̀ ı̨łè edek'enadlı̨ nı̨dè Nǫ̀htsı̨ weyak'eet'ı̨į̀ gınà t'à sìgoèt'ı̨ ha hǫt'e,” Zezì gòhdı.

11 Zezì k'achı̨ dǫ xè godoò hadı, “Įłàà dǫ ı̨łè weza nàke gǫ̀hłı̨. 12 Weza nǫǫde edetà ts'ǫ̀ hadı, ‘T'asìı hazǫǫ̀ nets'ǫ sìı łats'ınewa gà ayìı sets'ǫ̀ ade ha sìı seghàı̨le,’ yèhdı. Eyıt'à wetà edeza gogha t'asìı whehłaa sìı gogha łats'ıyı̨ı̨wa.

13 “Whaà-le-t'ıì weza nǫǫde t'asìı hazǫǫ̀ wets'ǫ sìı sınìı̨la gà nıwà kǫ̀taèhtła. Ekǫ sìgoèt'ı̨ zǫ nıwǫ t'à, t'asìı wet'àaɂà-le ts'ǫ̀ edesǫǫ̀mbaà hǫt'ıì k'ehǫǫhwho. 14 Edesǫǫ̀mbaà hazǫǫ̀ k'ehǫǫhwho tł'axǫǫ̀ eyı nèk'e bò whìle agòjà. Whaà-le-t'ıì yeghǫ shèwetı̨ whìle. 15 Eyıt'à eyı nèk'e dǫ gha eghàlaedaà adììdlà. Eyı k'àowo gha gogòò k'èdì ha ekǫ ts'ǫ̀ ayį̀į̀là. 16 Gogòò yeghǫ shètı̨ı̨ sìı weghǫ shèwehtı̨ nıwǫ, hanìkò dǫ wı̨ı̨zìı yewàedı-le.

17 “Nǫǫde ts'ǫ̀ ts'ı̨ı̨woò lajà t'à edets'ǫ̀ hadı, ‘Dǫ setà gha eghàlageedaa sìı nezı̨į̀ shègezhe hǫt'e, ekò sı̨ sìı jǫ bò dę whıhda. 18 Setà ts'ǫ̀ anahde gà dıı hawèehsı̨ ha: Età, Nǫ̀htsı̨ wek'èch'a hòwhıhtsı̨, nı̨ sı nek'èch'a hòwhıhtsı̨. 19 Jǫ gots'ǫ ı̨daà neza aht'e dehsı̨ ha dìì. Hanìkò dǫ negha eghàlageedaa lanì, sı̨ sı negha eghàlaıhdà, haehsı̨ ha,’ nıwǫ. 20 Eyıt'à eyı cheko sìı nıìtła gà edetà ts'ǫ̀ naèhtła.

“Įłaà nıwà naeda et'ıì wetà yaɂı̨, weghǫ wedzeè eteèɂı̨. Hanì-t'ıì edeza ts'ǫ̀ tı̨mǫèhza, edeyàdo gà yı̨ı̨ts'į̀.

21 “Weza edetà ts'ǫ̀ hadı, ‘Età, Nǫ̀htsı̨ wek'èch'a hòwhıhtsı̨, nı̨ sı nek'èch'a hòwhıhtsı̨. Jǫ gots'ǫ ı̨daà neza aht'e dehsı̨ ha dìì,’ yèhdı.

22 “Hanìkò wetà wınà t'à edecheekeè ts'ǫ̀ hadı, ‘Įwhąą̀ goht'ǫ denahk'e nezı̨ı̨ sìı nìahwha gà yeyìetłaà aweahłe. Lamǫ̀ǫ wek'e nèahchı eyıts'ǫ ke nezı̨ı̨ sı yìı weahtà. 23 Ejıezaa łek'àa sìı ełaahwhı, nàsı̨ hots'ıhtsı̨ xè sìgoèt'ı̨ ha. 24 Seza sìı ełaı̨wo ı̨lè, hanìkò dıì eda. Dıkǫehtła ı̨lè, hanìkò dıì wenagòt'ǫ,’ gòhdı. Eyıt'à wegha nàsı̨ hogèhtsı̨.

25 “Ekò k'e weza ǫhdaà t'asìı dehshee k'è eghàlaeda ı̨lè. La ghǫ nǫǫt'e t'à edekǫ̀ ts'ǫ̀ naetłe ekò wekǫ̀ ts'ǫ̀ nàdahoowo hǫt'e. 26 Eyıt'à wetà wecheekeè ı̨łè ts'ǫ̀ gode, dayeehke. ‘Dàgodıì-agodı?’ yèhdı. 27 Wetà wecheekeè hayèhdı, ‘Nechı nǫ̀ǫtła! Wexè t'asagòjà-le t'à, netà yegha ejıezaa łek'àa ełaı̨hwho,’ yèhdı.

28 “Hanìkò weza ǫhdaà wınì-le, gıgà goyaehtła ha nıwǫ-le. Eyıt'à wetà yets'ǫ̀ xàèhtła, yeghǫnàdaetì. 29 Hanìkò edetà ts'ǫ̀ hadı, ‘Łǫ xo negha hòtł'ò eghàlaıhdà eyıts'ǫ t'aats'ǫǫ̀ nek'èɂaıht'è. Hanìkò seàgı̨ą gıxè shèhtı̨ ha, sahzǫ̀ą nechà-lea wı̨ı̨zìı seghàneehtı̨ whìle. 30 Ekò eyı neza sìı ts'èkojıı ts'ǫ̀ nesǫǫ̀mbaà k'ehǫǫhwho. Hanìkò dıì nǫ̀ǫtła t'à wegha ejıezaa łek'àa ełaànèehwho,’ edetà èhdı.

31 “Wetà yets'ǫ̀ hadı, ‘Seza, nı̨ sìı t'aats'ǫǫ̀ sexè anet'e, eyıt'à t'asìı hazǫǫ̀ sets'ǫ sìı nets'ǫ hǫt'e. 32 Goınà xè sǫts'ı̨ı̨wǫ ha t'ıį̀t'e. Nechı wewhìle ı̨lè, hanìkò dıì edaà anajà. Dıkǫehtła ı̨lè, hanìkò dıì wenagòt'ǫ,’ yèhdı,” Zezì hadıì goxè godo.