1 Ko bei rutu gea na pukuna rana tangotangodika:

mo ko bei nira sika ahei te gonia te dika.

2 Kara malu horu vagha na buburu:

Ma kara sesebe vaghara na lei tautalu maumauri.

3 Ko varava ngasi tatana Lord:

Mo ko gonia na hava te uto,

ko kabu tana pari tu vahegho,

mo ko vola.

4 Ko togotogo kolu tatana Lord: me ke vahego na hava te liona na tobamu.

5 Ko talua na hava to gonia tana limana Lord:

Mo ko varava ngasi tatana, ma gaia ke hangagho.

6 Ma gaia ke nea nimua na kabu maemane

ge ke maghora vagha na ghama ni labota

marara ni dani kama.

7 Kai kabu beto i naghona Lord:

Ko pitu tatavahalea ta nina bosa ni arevaghi:

bei ghanaghanara ra hei tara dika,

ra liona ge kara nia tangomana.

8 Betoa nimua na rutu,

ko ririu oli tana hava to gonia:

bei lio dika vanira rana keha:

Ke huligho va gea tana halautu te dika.

9 Rana tangotangodika kara taghalaghi nira:

Mara hei tara nia kikinima God,

Kara loghoa na pari ni tumu va.

10 Mi tana pile bona,

gaia na tangotangodika ke tagha haliua,

ko kenea manaa, ma kara tagha haliura tua.

11 Ma hei vamua te kabu totovongona ke loghoa na pari ni tunuva,

me ke nia togo na mabo iga.

12 Gaia te tangohahi te kenea na dikalana ahei te gehegehe uto,

me girigirighi na livona vania

13 Ma Lord te kia vamua,

na pukuna te righia na bongidira te dutu ni sara mai tua ge ke taghalaghinira.

14 Rana tangotangodika tara suai dida na isi,

mara lohighi dida na baghe

ge kara labura nia tara bona mara kosimogo

ma kara matera ara hei tara lutu maemane

15 Dida na isi ke sutu potai na lokadira,

ma dida na baghe ke tagoti.

16 Me uto va nina lologho pile na tinoni uto tatana nina lologho au na tinoni tangotangodika.

17 Na pukuna a Lord ke hola kehai na lagadira tara tangotangodika, me ke righi taonira tara lutu uto.

18 Ma Lord ke righitaonira ara hei tara gehegehe uto

ma kara holaa na taba te kabu kasila.

19 Kara mua vahaghitaili tana bona ni bongi dika sughua

tana bongi ni vitolo kara loghoa so na hava te manadira.

20 Rana tangotangodika kara mate, mana ghana na levunimate na Lord, Kara dudu vaghara na buburu.

21 Rana tangotangodika tara hola kau

mara mua tutughu oli,

na tinoni uto te vei arovi

me hevei nia na lio te maemane.

22 gaira te vautora na Lord

Kara loghoa na bona kara sopou ga.

Mara hei ke varangara kara ghuru horura.

23 Ma Lord te uhulia, na sakutuana na tinoni ivei ke va iga

me righitaonira ara hei tara holopangotiana na Ahana.

24 Kara saisari keba ke, ma kara mua tumu

na pukuna Lord ke tabe daroa nia so na limana.

25 Inau tu tinoni vaolu, mu saravia tua na tonikamaagu,

mu mua righi topoa mua siki tinoni uto ke righi leara na ahana aua hei

pe ke mua kutira dalena kara nongi vanga.

26 Na tinoni uto te hevei nia na toba te maghora me uto,

me hangara rana keha,

ma dalena kara loghoa na vauto.

27 Ko ririu sania na tangotangodika,

mo ko gehegehe uto, mo ko kabu kasila ivei te talugho ga Lord

28 A Lord te dolovia na uto,

me mua nira ponolio ara hei tara maemane:

Me righi taonira ke va me va,

me ke tagha laghinira daledira tara tangotangodika.

29 Rana maemane kara loghoa na komu ni tunuva;

ma kara sopou ga ke va me va.

30 Na mangana na tinoni manaha te bosaa na lei bosa manaha,

mana ghiduna te bosaa na lei bosa maemane.

31 Na vetena nina God tana tobana, mana sakusaku tuana ke mua dororo.

32 Na tinoni ghighirou te toghatogha na tinoni uto me kenea ivei ke nea ge ke matea.

33 Ma Lord ke mua lubatia a hei te tangohahi ge ke laga vule,

pa rana maemane kara hurura tana bona ni dete.

34 Ko pitu dila Lord, mo ko tona taonia na halautuna

ke ghaedatogho me ke vahegho na bona ko sopou ga,

ma rana tangohahi kara tapusi keha ka, mo ko righi kalea so.

35 Inau heghegu tu righi kalea ta nina lavi mataghu na tinoni tangohahi,

E talu tatea heghena te vagha na ghai lodu ni leao.

36 Mu rei va mu mua righi sodora,

sakai vamua ku kenera ke,

mu ku mua sodora tua.

37 Ko righia gatu na nilabuna na tinoni te maemane

kolua nia na tinoni uto te loghoa na mabe tana volana,

na dalena kara taonia va na nilabu te loghoa.

38 Mara hei tara gehegehe dika kara taghara udolu

ma daledira tara gehegehe dika taghora tana sosoko.

39 Ma Lord ke volara tara gehegehe uto,

gaia didira na vatu tana bona ni gunaguna.

40 Ma Lord ke hangara me ke lavi olira tatana te gehegehedika,

ke volara mi tatana vamua kara sodoa na beala ni ahevata.