38
1 Lord ko bei kokoe laga vaniu tana bona ko rutu:
mo ko bei torou gea ta nimua na rutu papara.
2 Nimua na kuali tara vauvausuka haghe tagua:
mana limamu te saro horuu nia mai so.
3 Na pukuna nimua na rutu:
na huligu udolu tara vahaghi:
me mua mahebo na volagu na pukuna na lei palugu
4 Ma nigua na lei hahi tara saro udolua na ulugu
vagha na hohola te mava na holana.
5 Na palugu tara utu mara vei sikani:
na pukuna na lei palugu.
6 Inau tu rongorongo mu neu ge u tinoni toposo:
mu nia ole kolili na dikalio tana dani udolu.
7 Na levugu te paralamuta:
Me taho na laga ni vola tana huligu.
8 Inau tu labe mu tapele kolili:
mu gutuveve na pukuna na maghae tana lokagu.
9 Lord o ghilalai na hava tu lioni,
ma nigua na dikalio te mua polo itamua.
10 Na tobagu te tuputupu mana lagagu te kubolu
mana reireina na matagu te taghoi
11 Rana kulagu mana ghagua udu tara tabalili keha tana vahaghiagu,
ma rana kulagu na vure tara tughuru sagauviu.
12 Ra hei tara liona na hola kehana na volagu tara lohi ghagua na piti:
Ma gaira tara tona olioli na kanahaghiniagu tara vavaranga
mana kene ghanaghanaana na halautu ni posoagu.
13 Mi nau te vaghau na tinoni te pui
me mua rongo te vagha na tinoni te laghu,
te mua vukesia na mangana.
14 E utuni, inua tu mai vuha vaghau na tinoni te mua rongo,
mana mangagu te mua kokoe tughu.
15 Mi nau tu pitugho so Lord,
Ighoe vamua ge ko bosa tughu vanira,
Ighoe a Lord, nigua na God.
16 Inau tu liona ge rana ghagua na kana kara bei laga vuleu gea:
mi tana bona ku turi padi: Kara bei lavi mamagu gea.
17 Ku mua tangomana tua ge ku ghoi tughuru dato,
na pukuna nigua na vahaghitaili haia tagua.
18 Ku toghighi lei nigua na hahi:
mu ku nighi dika lio na lei palugu.
19 Ma rana ghagua na kana kara ghahara:
mara laga lee:
ma gaira tara kanahaghi leau tara subo vule.
20 Gaira ghua tara nia tutugu na dika tara uto:
tara hughuhughuu na pukuna Inau tu taonia te uto.
21 Ko bei sivilaghiniu:
Ighoe, Lord, nigua na God,
mo ko bei kabu sagauviu.
22 Ko mina, mo ko hangau:
Ighoe Lord God nigua na vavola.