— Nako heremiruze'eg a'e. Amukàg tuweharupi ihe.

Heremixak kwer romo hekon. Umurywete kar tuwe hepy'a a'e.

Amono herekwe hehe ihe.

Umume'u putar heremimutar teko ywy nànànar wanupe nehe.

2 Nuhapukaz kwaw nehe. Nuze'egahy kwaw nehe.

Nupurumu'e kwaw nahu rupi nehe.

3 Nuzuhazuhaw kwaw ni pitài ywyra hàkàgwer imonohok pyrer nehe.

Numuwew kwaw tatainy heny katu 'ym ma'e nehe.

Umume'u katu putar heremimutar nehe.

4 Na'ikene'o kwaw nehe. Nuzemumikahy kwaw nehe.

Umume'u wi wi putar heremiapo putar haw oho iko nehe. Ikàg putar imume'u mehe nehe.

Teko ywy muite har nànànar wàro ipurumu'e haw henu haw waiko wà,

5 Tupàn Tuweharupi Wiko Ma'e uzapo ywak a'e. Upupirar a'e.

Uzapo ywy no. Uzapo hehe har paw wà no.

Umuikuwe kar paw rupi wà. Umupytuhem kar paw rupi wà no.

Ko 'ar rehe Tupàn Tuweharupi Wiko Ma'e uze'eg iko wemiruze'eg pe kury:

6 — Ihe Tupàn Tuweharupi Wiko Ma'e ihe, urenoz ihe. Urupyhyk nepo rehe.

Urumuigo kar putar teko wapyro har romo ihe nehe.

Uruapo ihe. Oromono kar heremiaihu wanupe no.

Nerexak mehe teko uze'eg putar nezewe wà nehe.

— Azeharomoete Tupàn uzapo putar wemimume'u kwer a'e nehe, i'i putar wà nehe.

Apyro putar amo teko ihe wà nehe.

Ereiko putar tatainy ài wanupe nehe, wapyro àwàm hexak kar pà wanupe nehe.

7 Eremuehazawok putar hehàpyhà 'ym ma'e ne wà nehe.

Eremuhem kar putar iàpixipixi pyrer wazemunehew paw wi ne wà nehe.

Eremuhem kar putar zemunehew paw ipytunahy ma'e pe wiko ma'e wamono ne wà nehe.

8 Aiko Tupàn Tuweharupi Wiko Ma'e romo ihe. Tupàn Tuweharupi Wiko Ma'e herer romo ihe.

Tuwe teko hemuwete katu wà nehe, amo imuwete 'ym pà nehe.

Namuwete katu kar kwaw tupàn a'ua'u wanagaw paw teko wanupe ihe.

Xo ihe zo aiko wanemimuwete katu romo ihe,

9 Uze'eg Tupàn wemiaihu wanupe.

— Heremimume'u kwer kwehe arer uzeapo kwez kury.

Amume'u putar ipyahu ma'e peme nehe kury.

Nezewe mehe pekwaw putar a'e ma'e wazeapo 'ym mehe we nehe,

10 Pemuzàg zegar haw ipyahu ma'e Tupàn Tuweharupi Wiko Ma'e pe nehe.

Tuwe teko ywy nànànar umume'u ikatu haw wà nehe.

Tuwe yryhu rehe kanuhu pupe wata ma'e umume'u ikatu haw wà nehe.

Tuwe yryhu pupe wiko ma'e umume'u ikatu haw wà nehe.

Tuwe teko ywy muite har nànànar umume'u ikatu haw wà nehe.

11 Tuwe ywyxiguhu pe har umume'u ikatu haw wà nehe. Tuwe tawhu ywyxiguhu rehe har pe har umume'u ikatu haw wà nehe.

Tuwe Kenar tawhu pe har umume'u ikatu haw wà nehe.

Xera tawhu pe har wà, penurywete nehe.

Pezegar ywytyruhu apyr nehe.

12 Tuwe teko umume'u Tupàn Tuweharupi Wiko Ma'e ikatu haw wà nehe.

Tuwe umume'u ikàgaw ipuràgaw ywy nànàn wà nehe.

13 Tupàn Tuweharupi Wiko Ma'e uzemuàgà'ym zeàmàtyry'ymawhu pe oho pà.

Nuzawy kwaw zauxiapekwer ipuruzukaiwahy ma'e.

Uhapukaz wahy haw rupi zauxiapekwer wanerur pà zeàmàtyry'ymawhu pe.

Ukàgaw rupi weityk wàmàtyry'ymar wà.

14 Uze'eg Tupàn Tuweharupi Wiko Ma'e kury.

— Amumaw kwarahy tetea'u heze'eg 'ym pà ihe.

Namume'u kwaw ma'e. Nawazar kwaw amo waze'eg wanupe.

Ko 'ar rehe ahapukaz putar kuzà imemyrahy ma'e ài nehe kury.

Azai'o putar ma'erahy haw rehe nehe.

15 Amumaw putar ywytyr nehe. Amumaw putar ywytyruhu nehe no.

Amuxinig putar ka'a paw wà nehe. Amuxinig putar ywyra paw wà nehe no.

Azapo putar yrykawhu ywyxiguhu romo nehe.

Amuypaw putar 'yzygwar paw nehe.

16 Araha putar hehàpyhà 'ym ma'e amo pe wanemigwaw 'ym rupi ihe wà nehe.

Nuwata pixik kwaw a'e pe rupi ko 'ar 'ym mehe wà.

Ipytunaw hehàpyhà 'ym ma'e waiwyr har azapo putar tatainy romo nehe.

Amumew putar pe ihym 'ym ma'e wanupe nehe.

Na'aw heremimume'u kwer xe kury.

Azapo putar ma'e heremimume'u kwer rupi katete iawy 'ym pà nehe.

17 Aityk putar tupàn a'ua'u wanagapaw wanehe uzeruzar ma'e paw ihe wà nehe.

Amuigo kar putar ikàg 'ym ma'e romo wà nehe.

— Peiko urezar romo, aze amo i'i tupàn a'ua'u wanagapaw wanupe wà nehe,

azapo putar nezewegatete wanupe nehe no.

— Pezeapyaka katu nehe, iapyha 'ym ma'e wà.

— Peme'egatu nehe, hehàpyhà 'ym ma'e wà.

19 Ni amo teko nahehàpyhà kwaw Izaew heremiruze'eg wazàwe wà.

Ni amo na'iapyha kwaw ko teko heremimono kar ài wà.

Naheta kwaw teko heremimono kar zàwenugar wà. Nahehàpyhà kwaw a'e.

Naheta kwaw teko Tupàn Tuweharupi Wiko Ma'e hemiruze'eg zàwenugar wà. Na'iapyha kwaw a'e.

20 Teko Izaew izuapyapyr wà, pexak ma'e tetea'u pe wà.

Napekwaw kwaw ni pitài.

Peinu ma'e tetea'u pe.

Napezemu'e kwaw ni pitài rehe, i'i Tupàn peme.

21 Tupàn Tuweharupi Wiko Ma'e wiko wemiaihu wapyro har romo a'e.

A'e rupi ipurukwaw kar wer uze'eg rehe wanupe. Ipurumuwete kar wer uze'eg rehe wanupe no.

22 Waàmàtyry'ymar upetek hemiaihu wà.

Imunar wama'e rehe wà no.

Umunehew kar zemunehew paw pe wà.

Naheta kwaw ipupyaikaw pyrer wi wamuhem kar àràm wà, zemunehew paw wi wà.

Naheta kwaw wamuhem kar àràm wà.

23 Aze mo amo penehe we har uzekaiw heze'eg rehe,

Aze mo ko 'ar henataromo amo uzeapyaka katu, upuner mo ikatu ma'e iapo haw rehe.

24 Mo omono kar Izaew waàmàtyry'ymar wanupe wà.

Mo umumunar kar wama'e rehe wà.

Tupàn Tuweharupi Wiko Ma'e a'e ae uzapo kar a'e ma'e wanupe a'e.

Xiapo ikatu 'ym ma'e Tupàn henataromo zane.

Nazaneho wer kwaw hape rupi.

Nazanepureruzar wer kwaw ize'eg rehe.

25 A'e rupi uzakook wekwahy haw zanerehe.

Uzepyk zanerehe zeàmàtyry'ymawhu herur pà zanewe.

Ikwahy haw ukaz tata ài ureiwyr.

Nezewe rehe we ni amo nuzekaiw kwaw hehe wà.

Ni amo zanerehe we har nuzemu'e kwaw ma'e rehe wà. Nukwaw kwaw ma'e wà.