1 Teko Izaew wà,

ko 'ar rehe Tupàn peapo arer uze'eg nezewe kury.

— Pekyze zo nehe, ta'e apupyro putar ihe nehe xe.

Apuenoz pener rupi ihe. Peiko heremiruze'eg romo.

2 'Y typy ma'e hahaw mehe nehe,

aiko putar nerehe we nehe.

Nerezeapypyk kwaw nehe.

Tata myteromo neho mehe nehe,

nanerapy kwaw nehe.

3 Ta'e aiko Tupàn Tuweharupi Wiko Ma'e pezar romo ihe xe.

Aiko Izaew wazar Ikatuahy Ma'e romo. Aiko pepyro har romo.

Amono na'iruz ywy penekuzaromo: Exio, Ezit, Xema.

Nezewe mehe peiko hema'e romo. Aiko pezar romo.

4 Amono ywy tetea'u penekuzaromo ihe.

Ywy rehe har tetea'u amono penekuzaromo ihe wà,

ta'e apuamutar ihe xe.

Teko heremiamutar romo peiko.

Apumuigo kar putar tuwihaw romo nehe.

5 Pekyze zo nehe ta'e aiko penehe we ihe xe.

Kwarahy ihemaw wi amuzewyr kar putar heremiaihu waiwy pe ihe wà nehe.

Arur putar kwarahy heixe haw wi wà nehe no.

6 — Pemuhem kar heremiaihu peneko haw wi nehe, a'e putar kwarahy heixe haw awyze har kutyr har wanupe nehe.

— Pemupyta kar zo heremiruze'eg peywy rehe nehe, a'e putar kwarahy ihemaw awyze har kutyr har wanupe nehe.

— Tuwe hera'yr uzewyr weko awer pe herazyr wanupi wà nehe, a'e putar ywy muite wera'u rehe har wanupe nehe.

7 A'e paw wiko heremiaihuete romo wà.

Azapo ihe wà. Amuigo kar ihe wà no.

Nezewe mehe wexak kar putar hekàg wera'u haw purupe wà nehe,

8 Tupàn Tuweharupi Wiko Ma'e uze'eg kury.

— Perur heremiaihu wà nehe. Amume'u putar wanemiapo kwer nehe.

Heta waneha wanupe. Nuexak kwaw ma'e wà.

Heta wapyakwar wanupe. Nuenu kwaw ma'e wà.

9 Pezemono'og tuwihaw wanenataromo nehe, teko ywy nànànar wà.

Pezemono'og nehe, teko paw wà.

Aipo amo tupàn a'ua'u penemimuwete umume'u uzeapo ma'e ràm wà.

Aipo amo umume'u ko 'ar rehe uzeapo ma'e ràm wà.

Tuwe werur umyrypar wà nehe.

Wamyrypar umume'u putar wakatu haw wà nehe.

Nezewe mehe, wanenu mehe, — Azeharomoete, i'i putar teko paw wà nehe.

10 Tupàn Tuweharupi Wiko Ma'e uze'eg.

— Izaew wà, peiko putar heremiapo kwer imume'u har romo nehe.

Peiko heremiruze'eg heremixamixak kwer romo.

Azekwaw kar peme. Apumuzeruzar kar hezehe ihe.

Xo pitài Tupànete zo heta. Aiko Tupànete romo ihe. Pekwaw hereko haw.

Naheta kwaw tupàn herenataromo har wà.

Naheta kwaw amo tupàn heraikweromo har wà nehe no.

11 Xo ihe zo Tupàn Tuweharupi Wiko Ma'e romo aiko ihe.

Xo ihe zo apuner pepyro haw rehe.

12 Ihe amume'u pepyro àwàm ihe.

Ihe apupyro azeharomoete no.

Pekwaw pepyro har romo hereko haw.

Pekwaw amo tupàn pepyro har romo heko 'ymaw no.

13 Aiko Tupàn romo ihe. Tuweharupi aiko putar Tupàn romo ihe nehe no.

Ni amo nupuner kwaw hekàgaw wi uhemaw rehe wà.

Aze azapo ma'e, ni amo nupuner kwaw a'e ma'e imuzewyr kar haw rehe iapo 'ym awer pe wà, i'i Tupàn.

purupyro ma'e a'e, uze'eg teko wanupe a'e.

— Apuamutar katu ihe.

A'e rupi amono kar putar zauxiapekwer tetea'u Mawiron ikutyr ihe wà nehe.

Upyro putar Mawiron tawhu wanuwi wà nehe.

— Urywete haw rehe Mawiron wanehapukaz taw uzeapo putar uzemumikahy haw rehe wazai'o haw romo nehe.

15 Aiko Tupàn Tuweharupi Wiko Ma'e romo pezar Ikatuahy Ma'e romo ihe.

Aiko Izaew iapo arer romo. Aiko wanuwihawete romo no.

16 Kwehe mehe Tupàn Tuweharupi Wiko Ma'e uzapo teko wanape yryhu myteromo a'e.

'Y typy a'u ma'e umunyryk a'e, pe iapo pà a'e, waho àwàm iapo pà a'e.

17 Uzuka zauxiapekwer tetea'u ikàg ma'e wà.

Umumaw ywyramawa tetea'u no. Uzuka kawaru zeàmàtyry'ymawhu pe har tetea'u wà no.

U'ar paw wà. Nupu'àm wi pixik kwaw wà.

Aze tatainy ipor upaw, uwew tuwe a'e. Nezewegatete upaw a'e zauxiapekwer wà.

18 Ko 'ar rehe Tupàn Tuweharupi Wiko Ma'e uze'eg wemiaihu wanupe kury.

— Pema'enukwaw zo peiko kwehe mehe uzeapo ma'e kwer rehe nehe.

Pema'enukwaw tetea'u zo heremiapo kwer kwehe arer rehe nehe.

19 Ta'e ko 'ar rehe azapo putar ipyahu ma'e ihe nehe xe.

Na'iàrew kwaw izeapo àwàm.

Tàrityka'i pexak putar nehe.

Azapo putar pe ywyxiguhu rehe nehe.

Ahaw kar putar ywy uxinig ma'e peme pe iapo pà nehe.

20 Miar hehaite ma'e umume'u putar hekatu haw wà nehe.

Zawar zàwenugar hehaite ma'e, xakaw her ma'e, umume'u putar hekatu haw wà nehe. Wiranu umume'u putar hekatu haw wà nehe no.

Azapo putar ytyzuzàmaw ywyxiguhu rehe nehe.

Amuyryk kar putar yrykawhu ywy uxinig ma'e kwer rupi nehe no.

Nezewe mehe heta putar 'y heremiaihu heremixamixak kwer wanupe nehe.

21 Azapo 'aw teko heremiaihu romo wamuigo kar pà ihe wà.

A'e rupi umume'u putar hekatu haw a'e wà nehe, i'i Tupàn.

22 Tupàn Tuweharupi Wiko Ma'e uze'eg wemiaihu wanupe.

— Pekweraz ihewi.

Pepytu'u hemuwete re.

23 Napeapy kwaw àràpuhàràn hawitu ma'e herenataromo pe wà. Napemunyk kwaw tata wanehe.

Napemur kwaw amo ma'e ihewe.

Nahemuwete kwaw nezewe.

Namur kar kwaw arozràn peme. — Peapy yhyk hyàkwegatu ma'e herenataromo nehe, na'e kwaw peme.

24 — Peme'eg kar ma'eputyr hyàkwegatu ma'e ihewe imur pà nehe,

na'e kwaw peme.

— Pemur ma'ea'yr wakawer ihewe hemurywete kar pà nehe,

na'e kwaw peme. Nan.

Hemukene'o kar pe penemiapo kwer ikatu 'ym ma'e pupe.

Hemuikwahy kar pe pekatu 'ymaw pupe.

25 Ihe ae aiko pezar romo ihe.

A'e rupi amunàn penemiapo kwer ikatu 'ym ma'e wanuwi hereharaz tà.

26 Teko heremiaihu wà, aze pepurumume'u wer amo heremiapo kwer rehe nehe,

zaha tuwihaw wanenataromo nehe.

Pemume'u kar heremiapo kwer hexak arer wanupe nehe.

Xinu putar tuwihaw waze'eg nehe.

27 Teko wanu a'e, penu a'e, uzapo ikatu 'ym ma'e herenataromo kwehe mehe a'e.

Heze'eg imume'u arer peinuromo arer uzapo ikatu 'ym ma'e herenataromo a'e wà no.

28 Penuwihaw umuaiw heràpuzuhu wà no.

A'e rupi amumaw kar Izaew amo zauxiapekwer wanupe ihe.

Amuigo kar heremiaihu ikàg 'ym ma'e romo ihe wà, i'i Tupàn.