22
Balaão-a py ayvu reraa kuery Balaque omondoukaague
1 Israel kuery ha'e gui oje'oipa vy opyta ju okuapy Moabe yvy rupi Jordão rovaigua re, Jericó tetã rexei.
2 Ha'e gui ma Zipor ra'y Balaque oexapa va'ekue Israel kuery amorreu kuery re ojapoague.* Balaque ma Moabe pygua huvixave.
3 Ha'e rami vy ha'e kuery gui Moabe kuery okyje vaipa okuapy, heta raxa ramo. Nda'evei ete ikuai Israel kuery ou rã oexa vy.
4 Ha'e va'e jave ma Moabe pygua huvixa ma Zipor ra'y Balaque ae.
Ha'e rami vy Moabe pygua huvixa aipoe'i Midiã pygua kuery yvatekueve pe:
— Aỹ ma ha'e kuery heta ete vy omomba 'rã oreyvýry ikuai va'e, vaka nhuũ mba'ety rupi oĩ va'e ho'upaa rami avi — he'i.
5 Ha'e rami vy guembiguai kuery omondouka Beor ra'y Balaão oenoĩ aguã. Ha'e va'e ma Eufrates yakã yvýry oiko Petor py, hetarã kuery ikuaia py ae. Ha'e va'e pe aipoe'i uka:
— Aỹ ma peteĩ regua Egito yvy gui ou vy ojao'ipa ma okuapy yvy ha'e javi. Ha'e kuery ma xerekoa renonde katy ae ju ikuai.
6 Ha'e gui aỹ ajerure ndevy: Eju na ha'e kuery re ndeayvu vai aguã, xegui ipo'akapave ramo. Xapy'a rei rã ha'e kuery va'e regua ajuka vy aipe'apa 'rã xeyvy gui, mba'eta xee aikuaa reroayvu porã va'ekue rei ayvu porãmby ae 'rã ikuai, ha'e amongue re ndeayvu vai rire ma ayvu vaipy 'rã oiko — he'i uka.
7 Ha'e ramo Moabe ha'e Midiã pygua yvatekueve oje'oi. Ngupive ogueraa avi ijayvu vaia omboekovia aguã. Balaão-a py ovaẽmba ma vy ixupe omombe'u okuapy Balaque ijayvuague ha'e javi.
8 Ha'e ramo Balaão aipoe'i ha'e kuery pe:
— Pepyta ke apy kova'e pyávy, ha'e gui aikuaa uka 'rã ambovaia, Senhor ijayvua rami vy ae — he'i ramo Balaão ro py Moabe pygua yvatekueve opyta okuapy.
9 Ha'e gui Balaão-a py Nhanderuete ojekuaa vy aipoe'i:
— Marã ramigua tu kova'e avakue ndero py ikuai va'e?
10 Balaão ombovai Nhanderuete pe:
— Ha'e kuery ma Zipor ra'y Balaque Moabe pygua huvixa va'e ombou va'ekue xereve ijayvu aguã. Ha'e vy aipoe'i xevy:
11 “Egito yvy gui ou va'ekue regua ojao'ipa ma okuapy yvy ha'e javi. Aỹ ma eju na ha'e kuery re ndeayvu vai aguã. Xapy'a rei ha'e kuery re xepo'aka nho 'rã xeyvy gui aipe'apa aguã rami”, he'i va'ekue xevy.
12 Ha'e ramo Nhanderuete aipoe'i Balaão pe:
— Tereo eme ha'e kuery reve, ndeayvu vai eme guive heta va'e kuery re. Mba'eta ha'e kuery ma ijayvu porãmby ae ikuai — he'i.
13 Ha'e gui ko'ẽgue Balaão opu'ã vy aipoe'i Balaque pegua yvatekueve pe:
— Tapeo ju pendeyvy katy, mba'eta Senhor naxemondoukai penderupive — he'i.
14 Ha'e ramo Moabe pygua yvatekueve opu'ã vy oje'oi ju Balaque-a py. Ha'e vy aipoe'i okuapy:
— Balaão rima ndouxei orereve — he'i okuapy.
15 Ha'e gui yvatekueve mboae ju Balaque omondouka, jypygua kuery gui hetave ha'e omboetevepy va'e.
16 Ha'e va'e kuery ma Balaão-a py ovaẽ vy aipoe'i okuapy:
— Po rami ma Zipor ra'y Balaque ijayvu: “Ajerure ndevy: Emboare eme xea py reju aguã,
17 mba'eta anhetẽ ete rojapo 'rã omboetepy. Ndeayvua ha'e javi tema 'rã ajapo. Ha'e gui ajerure ndevy: Eju ke, ndeayvu vai kova'e kuery re”, he'i uka va'ekue ndevy.
18 Ha'e ramo Balaque pegua yvatekueve pe Balaão ombovai:
— Xevy pe Balaque ngoo prata ha'e ouro tynyẽ reve ome'ẽmba teĩ xee mba'eve ndajapoi 'rã Senhor Xeruete ojapo uka va'e e'ỹ vy, mba'emo kyrĩ'i va'e e'ỹ vy tuvixa va'e teĩ.
19 Ha'e rami avi aỹ ajerure kova'e pyávy peẽ kuery pepyta aguã apy, aikuaa aguã xapy'a rei xevy Senhor omombe'uve rã — he'i.
20 Pyávy Balaão-a py Senhor ojekuaa vy aipoe'i ixupe:
— Ha'e va'e avakue ndereraaxe vy ou ramo epu'ã, tereo ha'e kuery reve. Ha'e rami teĩ rejapo 'rã xeayvua anho.† Nhanderuete nomondoukaxei teĩ omondouka nho, mba'eta oikuaa vy Balaão ooxe etea (versículo 12). Ha'e gui Balaão ma oikuaa ma voi Nhanderuete nomondoukaxeia, teĩ oo nho Nhanderuete oipotaa rami e'ỹ.
Senhor-a guigua anjo ha'e Balaão rymba mburika'i ojoko-jokoague
21 Ko'ẽmba jave Balaão opu'ã vy ombokupe áryguapa guymba mburika'i, ha'e vy oo Moabe pygua yvatekueve reve.
22 Ha'e oo ramo Nhanderuete poxya hendy. Ha'e rami vy Senhor-a guigua anjo opyta tape henonde oo aguã py ojoko aguã. Ha'e rami jave Balaão oguata ovy mburika'i áry. Hexeve oo avi mokoĩ hembiguai.
23 Ha'e gui henda mburika'i oexa Senhor-a guigua anjo tape py opyta ho'amy rã, opo py okyxe hyru gui oekyi va'ekue oguereko reve. Ha'e ramo mburika'i ma tape gui ojepekuavo ovy vy mba'ety rupi ju oo oiny. Ha'e ramo Balaão oinupã mburika'i tape rupi ae ju ojevy aguã.
24 Ha'e gui ma Senhor-a guigua anjo ma peteĩ henda uvaty mbyte rupi hi'aĩ, kora jovaive rupi oĩ va'e py.
25 Mburika'i ma Senhor-a guigua anjo hi'aĩ rã oexa vy kora re ojekyty vy oumbiri heravy Balaão retyma. Ha'e ramo Balaão ojeaive ju.
26 Ha'e gui henonde katy Senhor-a guigua anjo oove vy peteĩ henda ipo'i'ivea py ju hi'aĩ, ojepekuavo aguã ha'eve'ỹa py oiporu kuaa katy, neĩ oiporu kuaa e'ỹa katy ma voi.
27 Ha'e gui mburika'i ma Senhor-a guigua anjo hi'aĩ rã oexa vy ho'a oupy Balaão guy rupi. Ha'e ramo Balaão ivai ete vy oinupãmba mburika'i yvyra py.
28 Ha'e ramo Senhor ojapo mburika'i ijayvu aguã rami. Ha'e vy aipoe'i Balaão pe:
— Mba'e tu xee ajapo ndevy, mboapykue ma xenupãmba aguã?
29 Balaão ombovai mburika'i pe:
— Mba'eta xeavyky rei. Xepo py kyxe areko va'e rire aỹ'i ma voi rojuka 'rãgue — he'i.
30 Ha'e ramo mburika'i ijayvu Balaão pe:
— Xapy'a rei nda'u xee nerymba mburika'i e'ỹ ri aiko, xe'áry e'ỹ nda'u reĩ, reikoa pukukue re aỹ peve? Xapy'a rei nda'u nami ae pa ndevy ajapo jepi?
Ombovai vy
— Any ri — he'i.
31 Ha'e gui Balaão rexa Senhor oipe'a ramo oexa Senhor-a guigua anjo tape py hi'aĩ rã, kyxe hyru gui oekyi va'ekue opo py oguereko reve. Ha'e ramo oakã omboguejy vy ngova omovaẽ yvy re.
32 Senhor-a guigua anjo aipoe'i ixupe:
— Mba'e re tu mboapykue ma reinupãmba mburika'i? Ne'exa, xee ma nderovai guarã aju, mba'eta xerenonde rupi ha'eve'ỹa rami reiko.
33 Mburika'i ma xerexa vy ae mboapykue ma ojepekuavo xegui. Anhetẽ ete ha'e rami e'ỹ va'e rire xee rojuka ma 'rãgue, ha'e rã nerymba ma aeja 'rãgue oikove reve — he'i.
34 Senhor-a guigua anjo pe Balaão ombovai:
— Ajejavy, mba'eta ndaikuaai kova'e tape py xejokoarã ne'aĩa. Ha'e rã xapy'a rei rã ha'eve'ỹ va'e ri reikuaa ramo ma ajevy ju 'rã.
35 Senhor-a guigua anjo ombovai:
— Tereo tema peva'e avakue reve. Ha'e rami teĩ xeayvua rami anho 'rã ndeayvu — he'i ramo Balaão oo ju oiny Balaque pegua yvatekueve reve.
36 Ha'e gui Balaão ovaẽ ta maa Balaque oendu vy oẽ ovaexĩ aguã peteĩ tetã Moabe regua Arnom yakã ovaẽa peve, oyvy apy peve ete.
37 Ha'e rami vy Balaque oporandu Balaão pe:
— Xee namondoukai ri ty'y xerembiguai kuery nerenoĩ aguã? Mba'e re tu ndereju voi ri xea py? Xee nda'u nanemboete kuaai ri?
38 Balaão ombovai Balaque pe:
— Apy ma xee aĩ nerenonde py. Xapy'a rei nda'u xee ju aỹ ha'eve 'rã xeayvu aguã mba'emo re rei? Ha'e rami 'rãgue py ayvu Nhanderuete xevy omombe'u uka va'e rupi anho 'rã xeayvu — he'i.
39 Ha'e gui Balaque reve Balaão oo vy ovaẽ okuapy Quiriate-Huzote py.
40 Ha'e ramo Balaque ma vaka ha'e vexa'i ojuka uka vy ho'okue omondouka Balaão pe ha'e hexeve yvatekueve ikuai va'e pe.
41 Ko'ẽgue Balaque Balaão ogueraa vy oguenoẽ heravy Bamote-Baal apyte peve. Ha'e va'e gui ma Balaão oexa Israel kuery regua ha'e'i pyve ikuaia.