23
Balaão jypy'i Israel kuery ogueroayvu porãague
1 Ha'e ramo Balaão aipoe'i Balaque pe:
— Ejapo na sete altar xevy, ha'e vy ejuka sete toro ra'y ha'e sete vexa'i — he'i ramo
2 Balaque ojapo Balaão ijayvuague. Peteĩ-teĩ altar áry Balaque ha'e Balaão oapy peteĩ toro ra'y ha'e peteĩ vexa'i.
3 Ha'e gui Balaão aipoe'ive ju Balaque pe:
— Ndee ma epyta apy altar áry reapy va'ekue yvýry, ha'e rã xee ma aa 'rã mombyry'i. Xapy'a rei Senhor xererovaexĩ vy ou ramo ma aju vy ndevy amombe'upa 'rã oexa uka va'e rei — he'i vy oẽ ovy peteĩ yvyty áry.
4 Ha'e gui Balaão reve Nhanderuete nhovaexĩ ouvy ramo aipoe'i ixupe:
— Xee ma sete altar ma ajapo ndevy, ha'e gui peteĩ-teĩ áry apy ma peteĩ toro ra'y ha'e peteĩ vexa'i — he'i.
5 Ha'e ramo Senhor ome'ẽ ayvu Balaão omombe'u va'erã. Ha'e vy aipoe'i:
— Tereo ju Balaque-a py. Ha'e vy xeayvua rami ae 'rã ndeayvu — he'i.
6 Ha'e katy ju Balaão oo vy altar ikuaia py ovaẽ rã altar yvýry teri Balaque hi'aĩ, Moabe pygua yvatekueve ha'e javi reve.
7 Ha'e ramo ayvu omombe'u vy aipoe'i:
— Balaque ma xereru ruka Arã gui,
Moabe pygua huvixa xerenoĩ kuaray ou katy yvyty oĩ va'e gui.
“Eju na, Jacó ramymino kuery re ndeayvu vai aguã,
eju ndeayvu rei Israel kuery re”, he'i uka.
8 Ha'e rami avi mba'exa tu xeayvu vai ta Nhanderuete nda'ijayvu vaia kuery re?
Mba'exa tu xeayvu rei ta Senhor nda'ijayvu reia kuery re?
9 Mba'eta xee ma yvyty áry gui aexa Israel kuery,
yvy'ã xe'aĩa gui ama'ẽ ha'amy ha'e kuery re.
Ha'e vy xee aexa rã ha'e kuery ae'i ikuai va'e regua,
ha'e kuery pe “Yvy regua” nda'eai 'rã.
10 Mava'e ha'vy oipapa kuaa ta Jacó ramymino kuery yvy ku'i rami heta va'e,
mava'e oipapa kuaa ta Israel kuery heta va'e apy re'i voi?
Xee ma tamano heko porã va'e kuery rami,
ha'e kuery opaa rami avi tapa — he'i.
11 Ha'e ramo Balaque aipoe'i Balaão pe:
— Mba'e tu rejapo xere? Xee ma roenoĩ xerovaigua kuery re ndeayvu vai aguã, va'eri ndee ma reroayvu porã.
12 Ha'e rã ombovai:
— Xapy'a rei nda'u ayvu Senhor omombe'u uka va'ekue rupi e'ỹ 'rã ri xeayvu? — he'i.
Balaão mokoĩguea Israel kuery ogueroayvu porãague
13 Ha'e ramo Balaque aipoe'i ixupe:
— Xee ajerure ndevy: Eju, amboae katy ju jaa xerupive, ha'e kuery rexa aguã py. Ha'e'i rupive ikuai va'e anho 'rã rexa, ha'e javi e'ỹ. Ha'e vy ndeayvu vai 'rã ha'e gui — he'i vy
14 Zofim regua nhuũndy rupi ju ogueraa, Pisga yvyty apyte áry. Ha'e py ma sete altar ju ojapo, ha'e peteĩ-teĩ áry oapy peteĩ toro ra'y ha'e peteĩ vexa'i.
15 Ha'e ramo Balaão aipoe'i Balaque pe:
— Epyta ke apy altar áry reapy va'ekue yvýry, ha'e rã xee ma aa ta pe'i py Senhor reve aikuaa pota aguã — he'i.
16 Balaão-a py Senhor ojekuaa ju vy ixupe ome'ẽ ayvu omombe'u va'erã. Ha'e vy aipoe'i:
— Tereo ju Balaque-a py. Xeayvua rami 'rã ndeayvu.
17 Ha'e gui Balaque oĩa py ojevy rã ho'ame teri altar yvýry. Hexeve ikuai avi Moabe pygua yvatekueve. Ha'e vy oporandu:
— Mba'e he'i Senhor?
18 Ha'e ramo Balaão ayvu omombe'u vy aipoe'i:
— Epu'ã ke Balaque, rendu aguã.
Ndee Zipor ra'y, ejapyxaka xeayvu re.
19 Nhanderuete ma ava e'ỹ oiko ijapu aguã,
ava ra'y e'ỹ guive oiko nda'evei nho ju aguã.
Xapy'a rei nda'u ha'e nome'ẽi 'rã ri ome'ẽ 'rã va'ekue?
Ha'e ijayvu rire ndojapoi 'rã ri nda'u ha'e rami he'iague?
20 Ma'ẽ, ha'e ijayvu ha'e kuery aroayvu porã aguã re.
Ha'e gui ha'e ogueroayvu porãague ma xee nda'evei amboaxa rive aguã.
21 Mba'eta Jacó kuery re ha'e ndoexai mba'emo vai,
nonhembopy'ai guive Israel kuery omoingo axy aguã.
Ha'e kuery reve Senhor tuuete oiko,
ha'e kuery mbyte gui onhendu nguvixave oguerovy'a okuapya regua.
22 Egito yvy gui Nhanderuete ogueraapa raka'e,
ha'e kuery ma toro ka'aguy regua rami 'rã imbaraete.
23 Mba'eta Jacó kuery rovai rupi mba'evykya nda'eve ranhei 'rã,
Israel kuery rovai mba'ekuaa ndovarei 'rã.
Aỹ ma Jacó ha'e Israel kuery re aipo'ea 'rã:
“Mba'emo iporã ete va'e ha'e kuery pe Nhanderuete ojapo!”
24 Ma'ẽ, ha'e kuery opu'ã 'rã guary kunha rami,
guary rami ete 'rã opu'ã.
Mba'eta nonhenoi 'rã guembia ho'upa e'ỹa ja,
ojuka va'ekue ruguy voi oy'u va'e — he'i.
25 Ha'e ramo Balaque aipoe'i Balaão pe:
— Ndeayvu vai eme ha'e kuery re, neĩ eroayvu porã eme guive.
26 Ha'e rã Balaão ombovai vy aipoe'i Balaque pe:
— Aipo nda'ei ri ty'y: “ Senhor ijayvua ha'e javi ma xee ajapo 'rãe”, nda'ei ae ty'y ndevy?
27 Ha'e rami rã Balaque aipoe'ive ju Balaão pe:
— Neĩ ke eju, amboae katy jevy ta rogueraa. Xapy'a rei ma ha'e py Nhanderuete ojou porã 'rã ndeayvu vai aguã — he'i.
28 Ha'e rami vy Peor yvyty apyte peve ju Balaque ogueraa Balaão. Ha'e va'e gui ma tekoa e'ỹa ha'e javi ojekuaa 'rã.
29 Ha'e gui Balaão aipoe'i Balaque pe:
— Apy voi ke ejapo xevy sete altar, ha'e eapy ju sete toro ra'y ha'e sete vexa'i — he'i.
30 Balaão ijayvuague rami vy Balaque ojapo vy peteĩ-teĩ altar áry oapy peteĩ toro ra'y ha'e peteĩ vexa'i.