68
1 Nhanderuete opu'ã vy omoaĩmba ngovaigua kuery.
Henonde gui onhamba oayvu e'ỹ va'e.
2 Hataxĩ oaĩmba ovya rami ndee remoaĩ 'rã.
Tata gui ei raity hykupaa rami avi
heko vai va'e kuery okanhymba 'rã Nhanderuete renonde gui.
3 Ha'e rã heko porã va'e ma ovy'a 'rã okuapy,
Nhanderuete renonde oporaei 'rã.
Oguerovy'a pavẽ 'rã.
4 Peporaei ke Nhanderuete pe, hery rupi peporaei.
Pemboete arai áry rupi oiko va'e.
Senhor ae hery. Pevy'a henonde.
5 Ha'e ma tyre'ỹ ikuai va'e ru, ha'e imeve'ỹ va'e re oikuaa pota va'e oiko.
Nhanderuete oiko o'amba iky'a e'ỹ va'e py.
6 Nhanderuete ojapo 'rã amongue ha'e ae'i oiko va'ekue ngoo pygua heta reve ju oiko aguã rami.
Nhuã py omboty pyre voi ogueraa jepe 'rã ikuai porã aguã py.
Onhe'ẽ rendu e'ỹ va'e kuery anho 'rã ikuai yvy porã e'ỹa re.
7 Oreruete, ndevygua kuery renonde reẽ reovy ramo,
tekoa e'ỹa rupi reroguata ramo
8 yvy oryryipa raka'e,
yva voi otykypa ndee Oreruete renonde.
Sinai yvyty voi omyĩmba ndee ore Israel kuery Ruete renonde.* Egito yvy gui Nhanderuete judeu kuery ogueraa jepe vy henonderã omondouka arai ha'e tata (Êxodo 13.21-22). Ha'e gui Sinai yvyty yvýry ha'e kuery ovaẽ ramo ojapo yvy oryryi aguã rami (Êxodo 19.16-18).
9 Oreruete, oky ja'ea rembou ndeyvy re.
Na'iporãvei ramo rembopyau.
10 Ha'e py ma ikuai nerymba kuery.† “Nerymba kuery” he'ia ma Nhanderuete pegua kuery re ijayvu vy (Salmo 100.3).
Oreruete, oikotevẽ va'e pe rejou uka mba'emo ndeporayvua rupi.
11 Senhor ae oikuaa uka ayvu.
Heta ete ikuai kunhague ayvu porã mombe'ua.
12 Huvixave kuery onhamba, oxondaro kuery reve ojavapa,
ha'e gui imba'e rei-rei va'ekue ma kunha hoo va'e ju omboja'o.
13 Mba'e re tu pepytu'u peiny mymba kora yvýry?‡ Kova'e ayvu rupi Débora ijayvu raka'e Rúben kuery pe joe opu'ã aguã katy ndooi ramo (Juízes 5.16).
Apykaxu pepo ma prata py onhovãmbaa mbyre,
hague ipukuve va'e re ma ouro rexakã oĩ.
14 Ha'e py Ipo'akapa va'e huvixave kuery omoaĩmba jave
Zalmom yvyty áry ho'a yro'y apĩ.
15 Nhanderuete pegua yvyty ma Basã,
yvy'ã yvateve va'e ma Basã regua yvyty.
16 Ha'e gui ndee yvyty yvateve va'e,
mba'e re tu remoaruã reia rupi rema'ẽ yvyty Nhanderuete oiporavo va'ekue re?
Ha'e py ma Senhor oiko 'rã raka'e rã peve.
17 Nhanderuete pegua karóxa joe opu'ãa pygua ma vinte mil ikuai,
tá, mbovy rei e'ỹ oguereko.
Ha'e va'e kuery mbyte rupi Senhor oiko.
Sinai yvyty ojeapo henda iky'a e'ỹ va'e rami.
18 Yvate katy reo ju vy reraa nerembiguairã rejopy va'ekue.
Rejopy avakue ndejeupe guarã, heko vai va'ekue guive,* Efésios 4.7-13
Senhor Oreruete, ha'e kuery mbyte reiko aguã.
19 Ima'endu'a porãmby toiko Senhor ko'ẽ nhavõ nhandevoyi ogueraa va'e.
Nhanderuete ma nhanderepya oiko.
20 Nhanderuete ma jogueraa jepea.
Nhanderuete Senhor reve vy jaa jepe 'rã manoa gui.
21 Mba'eta Nhanderuete ombovo ngovaigua kuery akã,
hi'a vuku va'e ha'e kuery ae oipotaa rupi ikuai va'ekue akã ombovopa.
22 Senhor aipoe'i: “Basã yvy gui arojevy uka ju 'rã ha'e kuery,
ye'ẽ typyvea peve ojava teĩ ha'e gui aru rukapa ju 'rã”, he'i.
23 Ha'e ramo pepyrõ 'rã penderovaigua kuery ruguy re,
ha'e penerymba jagua kuery oy'upa 'rã.
24 Xeruete, ojekuaa ndevygua kuery hyxy ovy va'e.
Xeruete, Xeruvixave pegua hyxy jogueravy vy oike henda iky'a e'ỹ va'e py.
25 Henonde ma oje'oi oporaei va'e,
hakykue ma ixã va'e mbopua kuery oje'oi.
Mbyte rupi ma kunhataĩgue oparã'i va'e revegua ou.
26 Teta mbyte penema'endu'a porã ke Nhanderuete re.
Peẽ Israel ramymino kuery, penema'endu'a porã Senhor re.
27 Pe py ma oĩ kyrĩve va'e Benjamim regua, amboae kuery renonde re oo,
ha'e Judá regua huvixa kuery ngupivegua kuery reve.
Ou avi huvixa kuery Zebulom ha'e Naftali regua.
28 Oreruete, exa uka ju ke nembaraetea,
mbaraete marã e'ỹ orerepya rupi reiporu va'ekue,
29 Jerusalém tetã py ndevygua templo guigua.
Huvixa kuery ome'ẽ 'rã mba'emo nemboetea rupi.
30 Emondyipa vixo takuaty rupigua,§ “Vixo takua ty rupigua” he'ia ma Egito pygua ruvixa re ijayvu vy (Ezequiel 29.3, 32.2).
heta regua kuery guive vaka rami imbaraete teĩ,
ha'e gui amboae regua vaka ra'y rami ikuai va'e.
Epyrõ prata oipota rei va'e kuery re.
Emoaĩmba joe opu'ãxe vai va'e.
31 Huvixa kuery ou Egito yvy gui,
Etiópia pygua avi onha 'rã jogueruvy,
opo tynyẽ va'e omokuave'ẽ reve Nhanderuete pe.
32 Yvy regua pendekuai va'e, peporaei Nhanderuete pe,
peroporaei Senhor.
33 Ha'e ma yva áryve rupi oĩ, yva ymave guare áry rupi.
Ha'e ojapo 'rã ijayvua oendua aguã rami,
ijayvua ipo'akapa ramo.
34 Peroporaei Nhanderuete Israel áry rupi ipo'akaa oexa uka va'e,
ombaraetea oexa uka arai yvatevegua re.
35 Oreruete, omboetevepy reiko ndevygua henda iky'a e'ỹ va'e py.
Israel kuery Ruete omombaraete ha'e ombopo'aka 'rã ojeupegua kuery.
Ima'endu'a porãmby toiko Nhanderuete!
Messias nda'eveia re ijayvua
Jogueroporaei va'e pe Davi ombopara va'ekue “Yvoty lírio” he'ia py oporaeia rami oporaei aguã.
*68:8 Egito yvy gui Nhanderuete judeu kuery ogueraa jepe vy henonderã omondouka arai ha'e tata (Êxodo 13.21-22). Ha'e gui Sinai yvyty yvýry ha'e kuery ovaẽ ramo ojapo yvy oryryi aguã rami (Êxodo 19.16-18).
†68:10 “Nerymba kuery” he'ia ma Nhanderuete pegua kuery re ijayvu vy (Salmo 100.3).
‡68:13 Kova'e ayvu rupi Débora ijayvu raka'e Rúben kuery pe joe opu'ã aguã katy ndooi ramo (Juízes 5.16).
*68:18 Efésios 4.7-13
§68:30 “Vixo takua ty rupigua” he'ia ma Egito pygua ruvixa re ijayvu vy (Ezequiel 29.3, 32.2).