69
1 Xeruete, xereraa jepe ke,
mba'eta yy ou ma xerekovea peve.
2 Xepija ma yapo py,
yvy ndarovyi.
Yy typyvea py aĩ.
Oxyry atã vy xemoinge.
3 Ajapukai riae ete vy xekane'õ ma,
xejyryvi pirupa ma guive.
Xerexa voi ndoexavei ma,
Xeruete arõ riae ete rã.
4 Mba'e py e'ỹ ndaxerayvui va'e kuery ma
xe'a xeakã regua gui hetave ikuai.
Xemombaxe va'e kuery ma ipo'aka va'e meme,
mba'e py e'ỹ xerovaigua kuery xere opu'ã va'e.* João 15.25
Ha'e rami vy xeapo okuapy xemonda ague'ỹ voi ame'ẽ ju aguã rami.
5 Xeruete, ndee reikuaa porã xee ae 'arandua rupi e'ỹ aikoague,
atekoavyague ndereikuaa e'ỹi.
6 Senhor, Xeruete nexondaro reta va'e,
xekáuxa toxĩmba eme ndere ojerovia va'e.
Israel kuery Ruete,
xekáuxa toĩ vai eme ndereka va'e kuery.
7 Mba'eta ndevy aiko ramo xere ijayvua vaikue-ikue.
Xerova re axĩmbaa anho ojekuaa.
8 Xeryvy kuery rexaaty rami ve'ỹ ma aiko,
ha'i pi'a kuery voi ndaxerexa kuaavei ma.
9 Mba'eta ndevygua oo ayvu etea xemomba,
ndere ijayvu rei va'e kuery ijayvu reia ma xere ae ou.* João 2.17; Romanos 15.3
10 Ajae'o akaru e'ỹ re aikoa py.
Ha'e rami aikoa re ju ijayvua.
11 Ajukue voxa guigua py anhemonde ramo* Ha'e kuery ipy'a vai vy onhemonde 'rã ajukue vaikue voxa guigua py gueko rami vy (Lucas 10.13; Apocalipse 11.3).
ha'e kuery xembojaru rei rive 'rã okuapy.
12 Okẽ py oguapy va'e opuka rei okuapy xere.
Oka'u rei va'e kuery voi xerery rupi oporaei 'rã okuapy.
13 Ha'e rã Senhor, xee ma ndevy anhembo'e ha'eve jave.
Xembovai ke Xeruete, opa mba'e py renhomboaxya rupi,
mba'eta ojeroviapy reiko vy renhopytyvõ 'rã.
14 Xereraa jepe ke ijaxuru va'e py aike e'ỹ aguã.
Xereraa jepe xere ija'e e'ỹ va'e kuery gui,
yy typyvea py aikeague gui.
15 Xereroxyry uka eme yy oxyry atã va'e pe,
yy jere py guive xemoinge uka eme,
yvykua voi xe'áry tonhemboty eme.
16 Senhor, xembovai ke renhomboaxya rupi rejoayvu va'e vy.
Opa mba'e py renhomboaxy va'e vy ejevy ju xea py.
17 Xee nerembiguai pe ejexa uka e'ỹ eme,
ajexavai aikovy ramo.
Xembovai voi ke.
18 Enhemboja xerekovea re, xerepy,
xereraa jepe xerovaigua kuery gui.
19 Ndee ma reikuaa ae xembojaru rei okuapya,
xemoxĩmbaa ha'e xemoĩ vai reia guive.
Xerovaigua kuery ha'e javi rexaa rupi meme ikuai.
20 Axĩmbaa gui xepy'a ovopa, xekangy vy.
Xemboaxyarã ma arõ rive,
xembovy'aarã aeka teĩ ndajoui.
21 Ha'u va'erã iro va'e rive ome'ẽa xevy,
ha'e xey'uvei ramo vinagre ome'ẽa.† Ha'e ramigua oiko Jesus kuruxu re oĩ jave (Mateus 27.33-34, 48; João 19.28-30).
22 Ha'e kuery mesa tojeapo nhuã rami ha'e kuery renonde,
imba'e rei-rei topyta imbo'aarã.
23 Ha'e kuery rexa voi tapytũmba ndoexavei aguã,
ikupe ma ejapo oryryipa aguã rami.* Romanos 11.9-10
24 Ha'e kuery pe exa uka ndepoxya,
ndepoxya toupitypa.
25 Hekoa topyta tekoa e'ỹa rami,
avave rei toiko eme hoogue py.‡ Kova'e ayvu rupi Judas rekokue re ijayvu Atos 1.15-26 py.
26 Mba'eta ha'e kuery omoingo axy raxave rire ndee remoingo axy va'e,
ndee remboguai va'ekue ha'e kuery ojapo haxy oendu vaipave aguã rami.
27 Ha'e kuery re emoĩve tema teko vai káuxa opaga aguã,
remboaxy aguã rami e'ỹ ikuai aguã.
28 Hery emboguepa kuaxia tekove oguereko va'e kuery rery oĩa gui,* Filipenses 4.3; Apocalipse 3.5, 13.8, 17.8, 20.11-15, 21.27
toĩve eme heko porã va'e kuery rery reve.
29 Ha'e rã xee ma ndavy'ai ete aikovy ajexavai vy.
Xeruete anhemiaty yvate va'e, exa uka ju xereraa jepea.
30 Nhanderuete rery rupi aporaei 'rã,
amboete 'rã arovy'a reve.
31 Namigua ma Senhor ojou porãve 'rã
vaka ra'y, e'ỹ vy vaka hakua ha'e ipyapẽ va'e ome'ẽmby gui.
32 Ha'e va'e ojexavai va'e kuery oexa vy ovy'a 'rã okuapy.
Peẽ Nhanderuete re penema'endu'a va'e,
tapendeky'a guaxuve ju.
33 Mba'eta Nhanderuete ombovai 'rã iporiaukue'i ojapukaia,
ndaexarai 'rã nhuã py ixupegua omboty pyre gui.
34 Ha'e gui yva ha'e yvy regua, toporaei ixupe,
ye'ẽ ha'e opa mba'e hexe omyĩ va'e avi.
35 Mba'eta Nhanderuete ogueraa jepe 'rã Sião pygua kuery,
ojapo ukapa ju 'rã guive Judá yvy regua tetã.
Ha'e py ma ha'e kuery hekoa ju 'rã, ixupegua ae 'rã ikuai.
36 Ha'e gui hembiguai ramymino kuery ju 'rã ikuai porã ha'e py,
hery oayvu va'e kuery ikuai avi 'rã ha'e py.
Salmo 40.13-17
Jogueroporaei va'e pe Davi ombopara va'ekue ima'endu'a aguã.
*69:4 João 15.25
*69:9 João 2.17; Romanos 15.3
*69:11 Ha'e kuery ipy'a vai vy onhemonde 'rã ajukue vaikue voxa guigua py gueko rami vy (Lucas 10.13; Apocalipse 11.3).
†69:21 Ha'e ramigua oiko Jesus kuruxu re oĩ jave (Mateus 27.33-34, 48; João 19.28-30).
*69:23 Romanos 11.9-10
‡69:25 Kova'e ayvu rupi Judas rekokue re ijayvu Atos 1.15-26 py.
*69:28 Filipenses 4.3; Apocalipse 3.5, 13.8, 17.8, 20.11-15, 21.27