2
Ḻakarama yukurra mundhurr‐wekanhara ŋathawuy
2:1–16 (Offerings of grain and bread)
1-2 Ga biyapul ŋayi Garrayyu nherrara wiripuna rom malanha, märr ŋuliwitjandja dhukarrkurru walala yurru yolŋu walala marrtji galkithirrina nhanukala Godkala, wekanhamirrina manapan. Walala yurru yolŋu'‐yulŋuyunydja ŋathanydja gäma maŋutjinydja nhanŋu Godku wekanharawu, yurru ŋäthilinydja walala yurru ŋunhiyi yarrwa'yun ŋatha wal'ŋu, bala bikpikthunna weyika'na ga buŋgan bäw'nha, bala gämana yurru ŋunhiwala ḏalkarra'mirriwalana. Ŋayi yurru ŋuriŋiyi ḏalkarra'mirriyunydja märramana, bala dhiṯthun yurru goŋdhunydja waŋganydhu ŋuliŋuruyinydja, bala bathan ŋunhimalayina dhaliyarra'lilina, ga ŋunhinydjayi bitjarra ŋayi ŋuriŋiyi yolŋuyunydja bukmaknha wekaŋala Garraywuna. Ga ŋunhi yurru ḻatjuny'tja buŋgan yukurra gaŋgathirrina nhanŋu Garraywu, bala ŋayinydja Garrayyunydja yurru ŋoy‐ŋaḏupthunna yana märramanydja nhanukuŋu wekanharanydja. 3 Ga wiripunydja malanha ŋunhi ŋatha dhuḏi'yunmaranharawuynydja, ŋunhiyinydja ḏalkarra'mirriwu ŋuriki walalaŋgu ḏarramuwurruŋgu, ŋunhiyinydja walalana yurru ḻuka, liŋgu ŋathanydja ŋunhiyinydja dharrpalnha wal'ŋu, ganaŋ'thun yukurra, liŋgu ŋunhiyi mundhurr wekanharanydja nhanŋuwaynha Godkuna Garraywuna.
4-10 Ga ŋunhi walala yurru yolŋu'‐yulŋuyu ŋatha gäma bathanara balwurnydja dämba mundhurr‐wekanharawu Godkunydja Garraywunydja, ŋunhiyinydja yurru ŋathanydja ruwaŋga'kunharamiriw yana, yurru ŋämiṉaranydja weyika'wuy waŋganybuy ŋapanydja. Ga ŋunhalayi buṉbuŋuranydja ŋayi yurru ḏalkarra'mirriyunydja märrama ŋathanydja ŋunhiyi, bala gäma yurru ŋunhiwala dhaliyarra'lilina, ga ŋunhalanydja ŋayi yurru ḏaw'‐ḏawyunna, bala wiripunydja malanha ŋayi yurru djalkthun gurthalilina ŋunhiwalayi dhaliyarra'lilina, bathan yurru nhanŋuna Garraywuna. Ga ŋunhi yurru buŋgandja ŋunhi gaŋgathirri yukurra, bala ŋayinydja yurru Garrayyunydja galŋa‐djulŋithirrina yana märrama bukmaknha ŋunhi nhanukuŋu wekanhara. Ga wiripunydja malanha ŋunhiyi ŋatha dharrpalnha yana; walalana yurru ŋuriŋi ḏalkarra'mirriyuna walalay ḻuka ŋunhiyi ŋatha, ŋunhi walala yukurrana yolŋu'‐yulŋuyu mundhurr‐wekaŋala nhanŋu Garraywu.
11-16 Ga ŋunhi nhuma yurru mundhurr‐wekama ŋathanydja nhanŋu Garraywu, yaka nhuma yurru warrkuḻuma ŋunhimalayi ruwaŋga'kunharamirrinydja; ŋunhiyinydja ŋatha ruwaŋga'kunhamiriw yana nhe yurru rulwaŋdhundja, ŋäthilimirriyama Garraywunydja, ga yaka yana nhuma yurru beŋgurru gukunydja ŋunhiwalayi. Yurru djalkthundja nhuma yurru yukurra ŋathalilinydja ŋunhimalayi dje'lana, liŋgu dje'layunydja ŋuriŋi yukurra ḻakarama mayali' ŋunhina dhawu'‐nherraṉminyarawuynha, ŋunhi yukurra dhärra dhambay‐manapanmirri waŋganygumana yana, nhe ga Garray.