3
Ḻakarama yukurra nhaltjanarawuy nhinanharawuy waŋgany‐manapanminyarawuy Godkala
3:1–17 (Fellowship offerings)
1 “Ga ŋunhi nhuma yurru yolŋu'‐yulŋuyu wekama wiripu mundhurr ŋunhi ŋuli yukurra ḻakarama waŋgany‐manapanminyarawuy bitjan gam', nhuma yurru gämanydja buliki buyuwuyu'mirri yana, djomumirri, ŋula nhämiriw yana. 2 Ŋäthilinydja nhe yurru muḻkurrlili ŋal'yurra goŋ ŋurikalayi wäyingala, bala wutthurrana ŋunhiliyinayi dhurrwaraŋurana buṉbuŋura galkina. Bala ŋayinydja yurru ŋuriŋiyi ḏalkarra'mirriyunydja märrama maŋguny'tja, bala djalkthunna marrtji ḻiw'marama yana ŋunhiwalayi dhaliyarra'lilinydja, ḏämbumiriwlili yana ḻika'‐ḻikanlili. 3-5 Bala ŋayi yurru ŋuriŋiyi ḏalkarra'mirriyu guḻk‐guḻkthunna marrtji ŋanaktja ŋunhiyi wäyinnha, ga dhuwalanydja malanha ŋayi yurru bathan Godkuna gam', yaḻmanga' ga biḏila ga ḏiny'ṯiny yaḻmanga'mirri; dhuwalanydja yurru malanha ŋayi ŋuriŋi ḏalkarra'mirriyunydja ŋunhimalayina bathan dhaliyarra'lilina, rrambaŋikumana yurru ŋunhimala wiripuŋulilina dhambay, ŋunhi walala bumara yätjpuy walalaŋgalaŋuwuy ŋäkirrmaranhara. Bala yurru ŋayi ŋunhi buŋgandja yukurra ŋawululny'tja gaŋgathirrina nhanŋu Garraywuna, bala ŋayi Garrayyunydja yana ŋoy‐ŋaḏupthunna märramanydja yurru nhanukuŋu wekanharanydja, ga yuwalknha yanana ŋayi yurru ŋunhiyi yolŋu nhina yukurra waŋganyŋuranydja, waŋgany‐manapanmirrina yurru Godkala.
6-17 “Ga balanyarayi liŋgu yana ŋayi yurru yolŋuyu gäma bembinha mak nanikutnha, yurru yaḻmangany'tja ŋunhiyi nhanŋuway yana dhulŋuŋu Garraywu, yaka yurru nhuma * 3:6–17 IsraelYitjuralpuyŋuyunydja yolŋu'‐yulŋuyu ḻuka yukurra yaḻmangany'tja wäyin.
“Ga bitjandhi nhuma yurru yakayi yana ḻuka gulaŋdja, ga ŋanak gulaŋmirri yakayi yana nhuma yurru ḻuka. Dhuwalayinydja rom yurru yukurra djingaryunna yana bitjanna liŋguna gupaḏalnha‐wala.” Ga bitjarra ŋayi Godthu waŋananydja.
Ḻakarama yukurra yolŋunha nhaltjan nhanŋu yurru bäy‐ḻakarama ŋurikiy ŋunhi ŋayi djäma yätj märr‐wawu
4:1–35 (Offerings for unintentional sin)
4:1–12
“Ga ŋuli yurru yolŋuyu djäma ŋula nhä yätj märr‐wawunydja yana, ŋayi yurru ŋuriŋiyinydjayi yolŋuyu gäma wäyinnha Garraywalana Buṉbulili, märr yurru ŋuriŋi wäyingalanydja gulaŋ‐waṉḏinyarayu nhanŋu yätjtja buwayakkumana ŋäkirrmaramana. Mak ŋayi yurru gäma buliki, mak bembi mak nanikut, yurru ḻatju' wal'ŋu yana buyuwuyu'mirri ŋula nhämiriw wäyin ŋayi yurru gämanydja, märr nhanŋu yurru ŋurikiynydja buku‐dhumukthinyarawuynydja yätjpuy ŋäkirrmaramana yana.
Yo, ŋuli ŋayi yurru ŋunhi ḏalkarra'mirri yolŋu, ŋurruŋu wal'ŋu ŋayipi dhuwurr‐yätjthirri, ŋayinydja yurru bitjandhi yana liŋgu gämayi wäyin yuṯa wal'ŋu yana. Yana ŋayi yurru goŋ‐ŋal'yunna ŋurikala wäyingalanydja muḻkurrlili, bala bumana yana ŋunhi wäyinnhanydja, bala gäma gulaŋdja djinawa'lilina ŋunhana wal'ŋu, ga ŋunhiyi maŋguny'tja ŋayi yurru bikpikthunna ŋunhiwala dhaliyarra'lili ŋunhi ŋuli yukurra buŋgan bäw' gaŋgathirri ŋuliŋuruyi bala Godku. Bala ŋayi yurru rumbalnydja ŋunhiyi wäyinnha bathan warraŋulnha wäŋaŋurana, ŋayi yurru wäyindja ŋunhiyi burakirri dharapulŋura ŋurikala ḏalkarra'mirriwalana yolŋuwala, märr yurru ŋayi Garraynydja yakana ŋaramurryirri yolŋu'‐yulŋuwunydja bukmakkunydja ŋuriki Yitjuralpuyŋuwunydja.
13-21 Ga ŋunhi walala yurru bukmakthu ŋuriŋi wal'ŋu Yitjuralpuyŋuyu miṯtjiyu djäma yätjtja rom märr‐wawunydja yana, dhunupana yana walala yurru ŋuriŋinydja walalay bukmakthu miṯtjiyu gäma wäyinnha buliki märr‐yuṯa, ga ŋunhiyi walala ŋurru'‐ŋurruŋunydja yurru goŋ‐ŋal'yun ŋurikala wäyingala muḻkurrlilinydja, bala yurru bumana. Ga dhunupana ŋayi yurru ḏalkarra'mirriyunydja gäma gulaŋdja djinawa'lilina wal'ŋu buṉbulili, bala walala yurru bikpikthunna ŋunhiwala dhaliyarra'lilina, ŋunhi ŋuli yukurra buŋgan bäw' gaŋgathirri ŋuliŋuruyi bala Godku, bala ŋayi yurru rumbalnydja ŋunhiyi wäyinnha bathan wäŋaŋurana warraŋulnha, märr yurru ŋuriki yolŋuwunydja walalaŋgu yätjtja warrpam'nha ŋäkirrmarama ŋuriŋiyinayi maŋgu'‐waṉḏinyarayu wäyingalana.
22-26 Ga ŋuli yurru buŋgawa wal'ŋu yolŋu yätjthirri, märr‐wawu ŋayi yurru djäma ŋula nhä yätj, ŋayinydja yurru bitjandhi yana liŋgu gämayi wäyin, märr yurru wäyindja ŋunhiyi burakirri nhanukala ŋurikala buŋgawawala yolŋuwala dharapulŋura.
27-35 Ga bitjandhi liŋgu ŋunhi ŋayi yurru gali'wuyyu yolŋuyu djäma dhuwurr‐yätj märr‐wawu yana, ŋayinydja yurru bitjandhi yana liŋgu gäma wäyin, ga ŋunhiyinydja yurru wäyin burakirrina ŋurikalayina dharapulŋura, märr yurru Garrayyunydja bäy‐ḻakaramana yanana ŋuriki yolŋuwu yätjpuynydja, yakana ŋayi yurru dhä‐ḏir'yun ŋurikiy djämawuy.”
5:1—15:32
Yo, ŋayi Garrayyu nherraranydja guḻku' yana mirithirri romdja malanha ŋuriki nhanukalayŋuwu yolŋu'‐yulŋuwunydja, ŋayi ḻakaraŋala yukurrana nhaltjan ŋayi yurru Godthu bäy‐ḻakaranharawuy wekama ŋunhi walala ŋuli nhä djäma yätj. Ga dhiyakuyina märrwu ŋayi ŋunhi nherrara wiripunydja ga wiripunydja rom malanha, märr yurru walala nhina yukurra ḏarrtjalk yana ŋula nhämiriw. Liŋgu ŋunhi Godtja ŋayipinydja ḏarrtjalk yana, gäna wal'ŋu ŋayipi, ga Garraynydja ŋayinydja djäl muka nhanukalaŋunydja yolŋu'‐yulŋuwu walala yurru nhina yukurra ŋamakurru' wal'ŋu yana, ganaŋ'thun yana yätjŋurunydja, ga ganaŋ'thun yana ŋuliŋuru nhäŋuru malaŋuŋuru ŋunhi yurru romdhu ŋuriŋiyi yolŋunha walalanha baḏuwaḏuyun.