20
Mali daosini mbirani (1,000) dama Heyolabe garabaya helolebira lenego ogo
1 I̱na ani handa ho dege wuwa handalu hewaria dahuliyali mbira dahuliya andaga howa dalipe hayago handaru. Ibunaga gini dindi uli ko dama dege dariba ho ngagonaga panga duguagane gibi pu seni timbuni hongohebi yalu daliya.✡ Mo 1.18, 9.1 2 Ogoni ibu daluwa ibugua abagua ale timbuni puya bambaore winigo ibu mini dama Heyolabe biago minuwa pu seni biagome mali daosini mbirani (1,000) dariba ho helaya.✡ Pig 3.1, 2 Pi 2.4, Yu 6, Mo 12.9 3 Mali daosini mbira (1,000) ogoni napedaha dama ogoni ibugua wali agali dindi tara tarani bu karu mo hondo nahelo lowa dahuliyali biagome dama ogoni dindi uli ko dama dege dariba ho wiaga biagoha minu bape halu panga logo ha anda howa duguabe nahe ndelaheore paya anda haya. Mali daosini mbira (1,000) pedagola dama ogoni ibu tigi mbira hangu tagira pu helolebira.✡ Dan 6.17, Yu 6, Mo 16.14-16, 20.8
4 Handa ho dege wuwa handalu hewaria haru howa biragane dagiaru handaru. Haru howa biragane dagia urunini berearuhondo mo daba ki bulene hongo miya. Ogoni hondowa wali agali Yasuhanda mana henene latagi hayagobi Ngode Datagaliwabenaga bi manabi tigua lamialu hayagola bo wahayarunaga dinini hearu handaru. Tigua nogo gabua gibi biagobi nogo ogoni ibuni kagobiore wabu wiyagobihondo bi pupu nawini. Nogo gabua gibi ogoninaga magi tinaga wanakuiniyaguabi giniyaguabi namia dege biya. Uruni ti homalu heyu dai bialu ti kini howa Keriso heba mali daosini mbirani (1,000) handame ho haya.✡ Dan 7.9, 7.22, 7.27, 1 Ko 6.2, 2 Ti 2.12, Mo 6.9, 13.12-17 5 Wali agali maru homene bibahenderu ti mali daosini mbira (1,000) piai heagola mo heya halu dai bu helaya. O biyadagoni wali agali homayaru pigane mo heya halu heyi layadagoni. 6 Wali agali pigane o mo heya halu heyi layadagoniha howa mo heya hamaga hayaru ti mo bayale ho helayagola turu timbuniore ho ka. Ani bidago homagane homa mendeme ti home lolene hongo nawi. Ani bidago ti Ngode Datagaliwabebi Kerisobi libunaga loma binigo mo miaga howa tigua Keriso heba mali daosini mbirani (1,000) handame ho holebira.✡ 1 Pi 2.9, Mo 1.6, 2.11, 20.4
Ngode Datagaliwabehanda dama Heyolabe bope halu wayali henego ogo
7 Ai mali daosini mbira (1,000) ogoni piai haragola dama Heyolabe logo ha anda howa garabaya helayago dugua halu yupe holebira. 8 Ani biragola ibugua dindi bibahendeni wali agali tara tara ho giligalalo karu mo hondo hole tagira polebira. Dindi bibahende ogoni mini Gogo Magogola nga. Dama Heyolabe ibugua uruni bibahende wai bilo mo mogo bulebira. Mo mogo biragola dewa au lolebe tobahe iba mu emene emene iba solowara angeni ngaligobi holebira.✡ Ese 7.2, 38.2, 38.9, 38.15, Mo 16.14, 20.10 9 Uruni tigua dindi bibahendeha purogo lai halu Ngode Datagaliwabenaga tano ibu gubalini hagane wiagobi ibunaga wali agali tano ogoniha haga bu hearubi ho mabu biai holebira. Ani bu hearia dahuliya andagaha howa ira deaore ibira halu ti do mundu lelaya.✡ 2 Kin 1.10, Ese 38.9, 38.16, 39.6 10 Ani bialu dama Heyolabe wali agali dindi tara tarani bu hearu mohondo haga biago minuwa ira hungu bialu ege to̱le̱ ale mini saloba heba do kundi bu wiagoria bape haya. O bape hayadagoni nogo tara biagobi mbirali mana henene ngadagua ndo latagi haga biagobi bape hayagoria dege bape haya. Ani biyago ti ogoriani horombe mbiragabi da dege bialu heane da ho wiaabobo holebiraore.✡ Pig 19.24, Iba 11.6, Mo 14.10-11, 19.20, 20.8, 21.8
Daba ki bumaro bulene ngago ogo
11 I̱na ani handa ho dege wuwa handalu hewaria handame ho biragane dagia timbuniore mbira pele wiagobi ogoriani mbirali bereagobi handaru. Ibu heagoria howa dindi bibahendebi hari daligabi pu ereba hai halu lone handabe nahe haya.✡ Dan 2.35, 2 Pi 3.7, 3.10-11✡ Dan 7.9-10 12 Ani biyagola wali agali timbuni emenerubi ala homayaru handame ho biragane dagia wiago wanakuihayagi heyu hearia handaru. Ani handalu hewaria ogoriani mbuga dewa angala ho wia handaru. Mbuga urunini wali agali homene daibu hearu tini ala biyarunaga gilibu wiadagua mo daba ki biya. Ani buwa mbuga tara mbira haabo holene yu karunaga mini gilibu wiagoria mbuga ogoni angalo wiya.✡ Dan 12.1, Md 16.27, 25.31-46, Ab 17.31, Lm 2.6, 2 Ko 5.10, Pb 4.3, Mo 13.8, 19.5 13 Iba solowaraha homayaru ti dai bu haya. Homagane homaha howabi humbirini andagaha howabi homeneru dai bu hai haya. Ani biyagola tini hangu hangume bialu hayadagua mo daba ki biya.✡ Lm 2.6, 1 Pi 1.17, Mo 2.23, 6.8, 20.12, 22.12 14 Ani buwa homaganenagabi humbirini andanagabi ira timbuni da ho wiagoria bape haya. Ira timbuni do ho wiagoria bape hayadagoni homagane homa mende ogoni.✡ 1 Ko 15.26, 15.54-55, Mo 20.6, 21.8 15 Wali agali haabo holene yu karunaga mini mbugani gilibu ngaru heba gili bimaga naheru ti ira timbuni da ho wiagoria minu bape haya.✡ Mo 13.8, 19.20
✡20:2: Pig 3.1, 2 Pi 2.4, Yu 6, Mo 12.9
✡20:3: Dan 6.17, Yu 6, Mo 16.14-16, 20.8
✡20:4: Dan 7.9, 7.22, 7.27, 1 Ko 6.2, 2 Ti 2.12, Mo 6.9, 13.12-17
✡20:6: 1 Pi 2.9, Mo 1.6, 2.11, 20.4
✡20:8: Ese 7.2, 38.2, 38.9, 38.15, Mo 16.14, 20.10
✡20:9: 2 Kin 1.10, Ese 38.9, 38.16, 39.6
✡20:10: Pig 19.24, Iba 11.6, Mo 14.10-11, 19.20, 20.8, 21.8
✡20:11: Dan 2.35, 2 Pi 3.7, 3.10-11
✡20:12: Dan 12.1, Md 16.27, 25.31-46, Ab 17.31, Lm 2.6, 2 Ko 5.10, Pb 4.3, Mo 13.8, 19.5
✡20:13: Lm 2.6, 1 Pi 1.17, Mo 2.23, 6.8, 20.12, 22.12
✡20:14: 1 Ko 15.26, 15.54-55, Mo 20.6, 21.8