Siraga
Mbuga ogoha gilibu ngagonaga nemandi ogo
Ainde Siraga mbuga ogoni mini dewa dege nga. Mo tubagi howa Siraga ngagoni. Luni lolene ngadagua mini tigabi wulene mini giga bulenebi Siraga igini Yasunaga manda winigobi laga. Ani bialu lone dege mini mende Egelisiasigasa lagago ogoni Siosinaga mbuga lalu laga. Bamba Siosi pigane henedangi howa tigua mbuga ogoni daga laabo halu mini giga bulene mbuga ogoniha wiago hamelo haga hene.
Ainde agali mbira ibu mini kira Yosua lalu Yasu lalu biaga henego ibugua mbuga ogoni Hiburu bi lowa gili bini. Mani howa ibu aguane mbirame Girigi bi lowa lo beregedene.
Ai mbuga ogoniha mini mandabi bayale tigabi wulene Yuda tinaga wiago heba biamaga howa gili bini. Ai Ngode Datagaliwabe ibunime mini bayale tigabibi manda bayalebi ngini lalu mo walia ho nga. Mbuga ogoha bi dewaore Ngode Datagaliwabe bi lolenenaga bi lalu bayale holenenaga bi gilibu nga. Ani bialu bi bayale marubi nga.
Agali bi lo beregedenedago ibunaga bi ogo
I̱na manda bayale dewaore mana mbuga wiagoha howabi agali Anduane Homogonaga bi mana latagi haga hearunaga mbugaha howabi agali manda timbuniwi mani heneruha howabi migi biru. Anigo ainde Isaraele tiniha mini bayale manda bayaleru wu kagonaga iname tinaga mini yaraga holene nga.
Ainde mbirali ibu mbuga ogoha ngaru daga lalu mini manda bayale tigabiru manda bulene hame lo heagua nde ibuni hangunaga mitangi bialu daga lowa lo manda bulene nakarulape. Ani ndo ibugua daga lalu manda biai howa maru karu lawai holene bayaore nga. Mbirali ibu mbuga mbira gili biragoha biamogo bilobi bayaleore nga.
I̱naga mamali Yasu Siraga ibu ogonidagua biaga hene. Ibugua hongo howaore Ngode Datagaliwabenaga mana mbuga wiagobi agali Ngode Datagaliwabenaga bi mana latagi haga hearunaga mbugabi ina mamalirunaga mbuga maruhabi baya hangu hongo howa lo manda bini. Ibu mbuga uruniha baya hangu lo manda biaiore howa ibu agali manda timbunibi hene. Ani howa ibugua nde mbuga mbira agali mini bayale wulene mini gigabi bayale tigabi bulene ngago manda bule hame lo karu lawai holenaga mbuga mbira ibugua gili bulene hame lene. Ibugua ibunaga mbuga ogo wali agalime daga larago ibuha mana ngago baya hangu talialu holene biamogo bulebira.
I̱na ibunaga mbuga ogoni lo beregedarugo ainde tígua i̱naga mbuga ogoni baya hangu daga lalu hondo manda bilimulo hame ledo. Bi maru i̱na baya hangu lo beregeda nabiruyagua nde tígua i̱hondo miniha genda nahalimu.Ani larogo irane i̱na baya hanguore ngadagua lo beregedai holene hamelo howa birugo ainde bi galone maru Hiburu bi gilibu ngago ogonidagua bi tara lalu lo beregedolene ndelaheore nga. Genda ogoni ale mbuga ogoninaga hangu ndo nga. Bi mana gilibu ngaruhabi Anduane Homogonaga bi mana latagi haga henerunaga mbugaha gilibu wigi bidarubi mbuga maruha gili bu ngaruha genda ogoni ale wiai ka. Marungi nde agalime bi mbira lowa gilibu ngago bi tara mende lowa lo beregedolene awedaga ndo ngagola bi ledadaguaore ndo gili bu wiaga nga.
Ainde i̱ Iyibi dindiha ibu hewangi Uegedese ibu mali pira tebirani haliria (38) bibahende kini hene hearia ibiru. Ai i̱ Iyibi dindiha hewagola i̱ lawai halu biamogo bulene ale tara tara wiaria handa walia haru. Ani wiago hondowa ainde i̱ mbuga ogoniore baya hangu lo beregedoliya lowa hongo haru. Ani bialu ogoningi howa ha̱lo emene nahe biabeore hongo haabo haru. I̱na manda tara tara yu hewago mo ilu mogo bialu biabe ogoni abale bu maro bulene manda biru. I̱na mbuga ogoni wali agali dindi tara tarani bu hearu biamogo bialu ti mule lo manda biru. Ani manda birudago tigua Mosesenaga mana ngago talialu holene hame timbuni lalu howa ti manda bulene hame lalu heagola mule manda biru.
Mini gigabi wulenela manda bayale bulenelame mana bayale Ngode Datagaliwabehondobi mana bayale bialu holoma̱ya biamogo biagane.
1
(Be 1.1–4.10)
Mini gigabi wulene ngagohondo turu halu bi lenego ogo
1 Mini gigabi wulene ibu Anduane Homogo ibuha howa ibinigo ibunila haabobo bu hagane nga.✡ Min 2.6 2 Iba angeni iba mu ngaru aiwa daga lai habehebe. Iba dalu ibiyaru daga lai habehe ai kabe. Horo piyago bibahendebi horo mani ibule ngagobi ogodaguaore lalu daga lai habehe ai kabe. 3 Ai hari damindiniha manda biadaga holenebi dindi ogo yangalenaga manda bulenebi iba solowara timbuni bedago andane dindiha manda biadali holenebi uruni bibahende ogodagua nga lole manda bibehe ai kabe. Ani bialu mini bayale ibu baya hangu begelo handabehe ai kabe. 4-5 Mbirale bibahende nawiha mini gigabi wulene ibu ala ibalu bambaore henego ka.* Abale howa mbuga maru alatawe wini ngagoha bi marubi hobane ogoniha wini nga. Bi ogoni ogodagua leda. Ngode Datagaliwabenaga bi ibu daligaore ngago ogoni ibu mini bayalenaga tene haganebi mana wiaabo holene ngagobi uruni bayale bulene ngago damenenaga hariga ogoni nga, lalu gili wini nga. 6-7 Ngode Datagaliwabehanda mini gigabi wualenaga tene aihondo mo walia hayabe. Mini bayale ibunaga biabe tara tara biaga ngaru damene ai ibugua manda bidabe.† Abale howa mbuga maru alatawe wini ngagoha bi marubi hobane ogoniha wini nga. Bi ogoni ogodagua leda. Ainde wali agalibi mbirali ibu mini bayale wulene ngago baya hanguore manda biaheore walaihe mbirali kabe. Ani bialu ibunaga biabe tara ngago aiwa hendedabe, lalu gili bu winigo nga. 8 Mbiraoreli hangu mini gigabiwi ka. Iname ibuhondo gi halu ibu andaneha haabo halu ibunaga mini timbuniore mini lene ngago yaraga halu holene nga. 9 Anduane Homogo ibunime mini gigabi wulene ogoni helene. Ibugua baya hangu begelo handalu ibu baya hangu talebu handalu ibugua ibunime wabini wiaru bibahendeni odope hai helene.✡ Min 8.22-31, Sir 24.9 10 Anduane Homoghanda mini gigabi wulene wali agali bibahende tini hangu hanguhondo tini karulape headagua mo ta haga bialu ibuhondo gubalini ho haga hearuhondo dewaore mini.
11 Wali agali Anduane Homogo gi halu ibuni andaneha haga bu karu ti mini lene timbuni halu yari bayale bu holebira. Ani howa tinaga bu miniha dungulo howa turu taraore ho holebira. 12 Wali agali Anduane Homogo andaneha karu ti turu howa tinaga bu miniha obaho haga. Ani bialu tinaga dindini holene luore haga. 13 Wali agali ogoniale karu tinaga holene kaware biba hole tu ngagola ti bayaleore halu homolene horo tagira ibirangi tiha mini burugu nale biralu homolebira. 14 Mbiralime Anduane Homogohondo gubalini ho howangi hayagua ibuha mini gigabi wulene tagira ibulebira. Ibu mini gigabi bamba ibu ai̱ya tombeha bereangi howa mo yu hene ka. 15 Bambaore howa mini gigabi wulene ibu wali agali heba mandagi hama ibinigo haabo mani tinaga waneigini aguane aguanali hama polobadaru heba haabore holebira. 16 Mini gigabi wule bibahendeore wali agali Anduane Homogo ibuniha haga karu tiha to̱lai ho kagola mini bayale urunime lini bayale tagira ibiraru yu howa turu ho holebira. 17 Mini gigabi ibugua wali agali tini hame lo karu ale ti andagaha wu to̱latagi halu tinaga tomo anda ngagoha tomo tara tara ngaru dewaore wu to̱latagi hai holebira.✡ SMG 7.11 18 Anduane Homogonaga mana hale hagane mana ngagome mini gigabi wulene mo yaribia halu bayale holenebi miniha mo palia holene karulo holenebi hongo holenebi mo wia haga nga. 19 Mini gigabi wuleneme manda buwa mo yulenebi iba dalu ibiradagua ibilaga. Ani ibilowa ibunaga wali agali gubalini ho mini lene helo helaga. 20-21 Ani ibiragome ira pini hongohe dindiha piagadagua polebira ibuni lu dindini holene ginigene lu hagagobi holebira.‡ Mbuga maru alatawe ngagoha bi marubi nde hobane ogoniha gilibu nga. Bi ogoni ogodagua. Wali agali Anduane Homogonaga bi mana hole haga karu ti mana ko bulene ngago hondo wandialu haga ka. Tigua anidagua bialu heagua keba holeneme ti ngola naholebira. ✡ Min 3.16, 4.10
Mini la haru holenego mana bayaleore ngago ogo
22 Wali agali keba timbuni haga kago ibu wali agali tigabi ndo ka. Keba abale haganeneme wali agali abale mo pila hagane nga. 23 Wali agali hendeore haga kago ibu deme hondo kagola mani tiha turu holene tagira ibaga. 24 Tigua abale latagi nahe deme hondo howa laragola mani wali agalime ibunaga manda bayale ngagonaga te lalu holebira.
Mana tigabi howa bulene tara tara ngago ogo
25 Mini gigabi wulene ibu tomo wiaga anda alehowa biawai holene baya tara tara wu to̱latagi ka. Anigo ainde Anduane Homogo gi howa ibuni andaneha hagane mana ngagome wali agali mana ko biaga karu ti mana bayale nabilo manga haga ka. 26 Ainde mini gigabi wu holene hame lo keyagua Anduane Homogonaga bi mana lo ngago taluwa bialu kegola ibugua í̠ha mini gigabi wulene mo to̱la hai holebira. 27 Heneneore í̠na Anduane Homoghondo gubalini ho howa gi hariyagua nde mini gigabi wulenebi biawai holenebi mo yu holebere. Anduane Homogohanda wali agali tini mo dindiha halu ibu talima piaga karuhondo turu haga ka. 28 Í̠ ibu poleyagua mini kira wu yalu na polebere. Anduane Homogonaga bi ledago mo wanahe holene nga. 29 Í̠na wali agali mohondo howa í̠naga mini mo yaraga halu bi tara tara ke̱ howa lalu wali agalinaga bu mini tiha yamule nalalimu. Í̠naga ne harigaha bi larego mamage howa lalimu. 30 Mani í̠ni pilalu howa taga pani nolene wuligo í̠ninaga mini yaraga howa nalalimu. Ai Anduane Homogohanda í̠naga miniha yadoho kego wali agalinaga deni mo pana ho ngelowa í̠ guruligo í̠na í̠ninaga mini yaraga nahabe. Ani buleberego irane í̠ni Anduane Homogo karia ibalu howa í̠ni ibunaga deni mo dindiha nahe eberegome ke̱ hagane mana í̠ha emene ndo wu to̱leda.
*1:4-5: Abale howa mbuga maru alatawe wini ngagoha bi marubi hobane ogoniha wini nga. Bi ogoni ogodagua leda. Ngode Datagaliwabenaga bi ibu daligaore ngago ogoni ibu mini bayalenaga tene haganebi mana wiaabo holene ngagobi uruni bayale bulene ngago damenenaga hariga ogoni nga, lalu gili wini nga.
†1:6-7: Abale howa mbuga maru alatawe wini ngagoha bi marubi hobane ogoniha wini nga. Bi ogoni ogodagua leda. Ainde wali agalibi mbirali ibu mini bayale wulene ngago baya hanguore manda biaheore walaihe mbirali kabe. Ani bialu ibunaga biabe tara ngago aiwa hendedabe, lalu gili bu winigo nga.
‡1:20-21: Mbuga maru alatawe ngagoha bi marubi nde hobane ogoniha gilibu nga. Bi ogoni ogodagua. Wali agali Anduane Homogonaga bi mana hole haga karu ti mana ko bulene ngago hondo wandialu haga ka. Tigua anidagua bialu heagua keba holeneme ti ngola naholebira.