1 I̱ waneigini-o Anduane Homogo talima polene manda biriyagua í̠ha ba hondolene anda ibulebirago manda manda bu habe.* Siragahanda waneigini ledago irane waneigini emene ibugua lawai haga bu hearu lawai halu lene. Bi ogoni ale dege Mini Bayale Gigabi 1.15, 2.1, 3.1, uruniha bi mbiraoregobi dege ngago hondolene nga. 2 Í̠ninaga mini baya hangu mo tiga buwa hongo ho habe. Ani kegola í̠ha ko mbira ibirangi í̠ abale mogo lalu duru nale holebere. 3 Anduane Homogoha haparaore ho howa ibu yu wanahabe. Ani beregola maniore í̠ha mbirale mbira tubagi holene nawulebira. 4 Mbirale í̠ha ibirago damene ibilo ha dege bibe. Mo iriari bulene tara tara ibalu Í̠ bope hayagua nde i̱ ema nabi ha dege bibe. 5 Irame ngolo dedagola dodo ngoloni para haga bidago do taulo waharagola ngolo ibuni dodo nahe bayale wiaga. Anidagua dege wali agalinaga mini mo dindiha holene ngagome wali agali tigabi karu ba handaga nga.✡ SMG 3.5-6, 1 Pi 1.7 6 Anduane Homogohanda í̠ biamogo biragola í̠ bayale howa ibunihondo mini mbiraore wu hole ibuni kagoha hapara howa habe.

7 Wali agali Anduane Homogo gi howa ibuni andaneha haga kemiru ti ibunaga dara holene irane nawini dara hagane ngago malia ho halimu. Tí pi loligo ibuni wanahalimu. 8 Wali agali Anduane Homogonaga bi ledago talialu haga kemiru tí ibuni kagoha hapara ho halimu. Ani harimiyagua nde tí yolo bayale muleberemi. 9 Ainde wali agali Anduane Homogo ibuni andaneha haga kemiru tí mbirale bayale ibulebirago maliaho halimu. Mbirale bayale ogoni turu holenebi dara holene irane nawini dara ho haabo holenebi ibulebira.

10 Tínaga mamali ala heneru mitangi bu dai bialu minime baya hangu mo tale bilimu. Ainde mbirali Anduane Homogo heagoha kaware hapara ho kagola Anduane Homogohanda mo taga hene mbira ai henebe. Mbirali ai ibu Anduane Homogonaga bi baya hangu hale halu helowa Anduane Homogohanda yu wahene ai heneyabe. Ainde mbirali ai ibu Anduane Homogo lalu heagola Anduane Homogohanda ibu erembira minibe. 11 Heneneore Anduane Homogohanda dara holene nawioreni í̠na dara timbuni haga ka. Ibugua í̠naga ko wiyadago domo wahalu í̠ha mo ko holene anda ibirangi hongo ho habelo helaga ka. 12 Wali agali hariga mende mendebi kirabali pu handalu haga howa mogo lalu duru lole kemiru tíore daraba. 13 Ti wali agali gi hagabi tiha yutiga nabiagabi kemigo Anduane Homogohanda tí handaya ho naholebiragonaga dara kogoni. 14 Ainde daraore kogoni ndobe. Wali agali manga hene kemiru tí baba Anduane Homogohanda godi lalu ko birimi larangi agua buleberemibe.

15 Ai wali agali Anduane Homogo gi halu ibuni andaneha haga karu tigua ibunaga bi ledago mo wanahaga ka. Ani bialu wali agali Anduane Homogo gubalini ho haga karu tigua ibunaga hariga piagane ngagoria pialu holebira.✡ SMG 6.18, Yo 14.15-23 16 Wali agali Anduane Homogonaga bi ledago baya hangu hale halu biaga kagome Anduane Homogohanda ibu biamogo bilo bulene ngago hongo howa bialu haga. Wali agali Anduane Homogo gubalini ho haga karu tiha ibunaga bi mana ho to̱le ka. 17 Wali agali Anduane Homogo andaneha haga karu tigua ibuni talima pule manda manda bu howa Anduane Homogo deni tini ala mo dindiha haga ka. 18 Ani howa tigua lalu, Ina wali agalinaga giha howa pi loligo inane Anduane Homogo ibuni giha mo ya holene karulapeda. Hongo gibiorebi dara holene irane nawioreni bame dara hagabi timbuniore ngago manda buwa ani bulene nga, lene.