1 Wali agali mini nawi ibu lulu karunaga yutiga biaga kago lehe tiga nabiore biaga. Tigua emaga handaragome tini mo durula haragola tigua mbirale henene tagira naibulebirago bameore maliaho haga nga.✡ Man 13.1-5, 18.9-14 2 Wali agali emaga mo dunu bia ho haga karu ti ni dedago tininaga munini kago minu yania halu holenedaguabi puyabu pu larago haruru talima polenedagua pialubi haga ka. 3 Mbirale emagaha handarigo ibu mbirale iba waiha handarigo ale dege nga. 4 Mbirale dodohe ngagome mbirale dodo nahe ho aribia naholebira. Mbirale henene ndo ngagome mbirale henene ngago ona ibu he nalolebira. 5 De gandeba handaga karume de gandeba hondowa bi laragobi egame bi tara laragobi emaga tara tara handoragobi uruni bibahendeore henene ndo ke̱ hagane nga. Mana ogoni walime waneigini taba hanalu howa mini tigabi ndo lehe ngago wu biragagobi nga. 6 Anduane Homogo Daligaore kagome í̠hondo emaga ogoni nahondo ngiyagua í̠ mini burugu lo holene nawi. 7 Emagame wali agali mo luluya hagane nga. Wali agali emaga ogoniale talialu haga heneru mo ko hai hene nga. 8 Mbirale ke̱ holene tara tara uruni aleme maninaga wali agali baya hangu bi mana ngago talialu helo biamogo nabulebira. Ani bialubi wali agali bayale tigabi karu tigua tinaga mini bayale wua kago latagi helo biamogo bialu mo hongo haga ndo nga.

9 Wali agali dindi tara tara ngaru handama ibaga bu hene kago tiha manda tara tara dewaore bi ka. Ani bialu wali agali biabe tara tara bialu hene karume lawai bayale holebira. 10 Wali agali tiha bahondolene mbirame tiha anda naibini karu ti mbirale ngarunaga manda timbuni nawi ka. Anigo wali agali dindi tara tara ngaruha handama ibaga bini karu tiha biabe tara tara ngaru bulene hondo manda bu yai ho ka. 11 Heneneore i̱na dindi maruha de handama ibaga bialu howa dewaore hondo manda biru. 12 Anigo mbirale dewaore de handarugo uruni bibahende te lai holenego nakarulape. Ai mbirale manda birudagome i̱ni dege biamogo dewa biya.

13 Wali agali Anduane Homogo gi halu ibunaga bi hale halu kago ti haabo holene yu holebirago irane tigua Anduane Homogohanda hangu ti biamogo bulebira lowa mini mbiraore wu kamogo ti haabo holene yulebira. 14 Wali agali Anduane Homogo andaneha haga karu ti ibugua mbirale bayale ngaru mo miragola ti mogo lowa duru nale holebira. 15 Wali agali Anduane Homogo kago gi halu ibuni andaneha haga karu ti turu holene ngago irane Anduane Homogo ibuni ti heba mandagi holebira lo manda bidagome turu holebira. 16 Anduane Homogonaga deme wali agali ibu gubalini ho karu handaya ho haga ka. Ibugua ti baya hanguore handaya ho halu mo hongo halu haga ka. Puyabu timbuni ibalu ni hongohe dalu birangi ibugua ti mo do haga ka. Ti pi nale bayale ibaga bu helonaga ibugua ti baya hangu handaya ho kaga ka. 17 Ibugua ti mo yaraga halu tinaga de mo wá helaga ka. Anduane Homogohanda ti mo dabi halu holene tiha helo mialu buwa ibuni ti haru mandagi ore haabo haga ka.

18 Wali agali mbirame nogo egaru bo page buwa Anduane Homogohondo loma bo miyagua nde Anduane Homogo ibu wali agali tinaga loma ogoni alego hame nalaga ka. 19 Anduane Homogo Daligaore kagome wali agali ibunaga bi mo wahaga bu karunaga loma ngago ibu hame nalaga ka. Wali agali mana urunibi biaga karume loma dewa mialu hayaguabi ibugua tinaga loma ngago hondowa turu naholebira. 20 Wali agalime loma bo mulenaga nogo yagibano kagonaga bo kayu biyagua mana ogonibi birago koorene ko nga. Tigua ogonidagua birago manane waneigini mbira ibu aba handaya ho helowa agali mende kagome waneigini ogoni homelo bo waharadagua bira. 21 Wali agali yagibano bu karu tinaga holene tomo emene ngelo kagoria hangu paga ho kagoni ndobe. Ai wali agali mbirame tomo emene ogoni mo page biyagua nde yagibano mbira kago homelo bo waharagoni ndobe. 22 Wali agali mbira ibugua ibu damenenaga tomo mbira ngago ohowa mo yalu biabe biaga kago yolo nabi piyagua nde tibi wali agali mbira kago homelo bo wahaga karubi dege ka.

23 Agali mbirame anda bialu kagola mendealime gialalu heagua ogoniha galone naheore libugua biabe erekuibini bameore bialu kebi. 24 Agali mbirago ibugua mbirale mbira hame larago mendego ibu manga hayagua nde Anduane Homogohanda libu harunaga hame natalulebira. 25 Wali agalime homene tingini mbira ngago gime yania howa gi wayawaya bo howa lone ela hayagua nde gi wayawaya bayago bame dege holebira. 26 Anidagua dege wali agalime tinaga ko biyagonaga dara howa ti tomo dewa nane henego ainde mani howa tigua mana ko lone biyagua nde Anduane Homogohanda tinaga bi larago hale naholebira. Heneneore tinaga dara hayago bame yu wahayagoni ndobe.