1 Wali agali mana bayale ngago talialu haga bu karu tibi nde loma bayale tara tara karu bo delo miaga kagobi dege ka. Ani bialu wali agali Anduane Homogonaga bi mana hale haga karu ti Ngode Datagaliwabela mini mbiraore holene loma bo delaga bayale ngagobi dege ka. 2 Wali agali tigua mana bayale birago bia dai biaga kago ibu widi lini bayaleru loma bu miaga ngagobi nga. Ani bialu wali agali yagibano kagohondo tomo mbiraleru tale bu miaga kago ibu Ngode Datagaliwabehondo ka̱i̱ lalu loma bu miagagobi ka. 3 Ngode Datagaliwabe ibugua wali agali mana ko bulene ngagoha hogorale bialu haga karuhondo turu ho hagane ka. Ani bialu wali agali mana tiga nabi ngago wahalu piaga karunaga ko ngago domo wahaga ka. 4 Maname ogodagua leda. Í̠ Anduane Homogo andagaha ibalu loma mbira manda bu yalu ibulene nga lalu lo wini nga. 5 Wali agali bayale tigabi bu karume nogo bo loma bu mulenaga nogo bayale habe tigi kago bo loma bu miaga ka. Anidagua biragola loma bo deledagome tumutumu baya ngabiore biragome Anduane Homogo Daligaore kago mo turu hagane nga. 6 Anduane Homogo ibu wali agali bayale karume loma bu mirago turu haga howa ibugua ti embeda nahagaore ka. 7 Anduane Homogonaga mini yaraga hole turu ho howa í̠naga mabuha tomo hengedego piagane boga birago ibunihondo bu loma bu mulene nga. 8 Í̠naga lomaru bu yalu ibalu howa í̠naga denguiha keba howa aruma holene nawi. 9 Anduane Homogo Daligaore kago ibugua í̠hondo mbirale dewa ngiyago manda bialu í̠na nde ibuhondo miadai bulene nga. Í̠ mbirale dewawi karulape hariyagua nde ibuhondo dewa dege mulene nga.✡ 2 Ko 9.7 10 Anidagua buleberego irane Anduane Homogohanda í̠na mbirale ibuhondo mo turu halu mialu kego damene baya hangu ngiadai biai haga ka. Heneneore dewa haluore ngiadai biai holebira.

11 Anduane Homogo í̠na bime ladebodebo nabibe. Ibugua mbiralime mana ogonibi birago manga haga ka. Ani bialu loma ko ngaru bu merogome í̠ni biamogo bulubabe toba nahabe. 12 Anduane Homogohanda wali agali lenego timbuni haguane heaguabi ko yagibano heaguabi bibahende manani howa tinime bialu hayagonaga mo tale bulene ngadagua mo tale biaga ka. 13 Ibugua wali agali yagibano bu karu ibu mini turu howa ibugua wali wali ko uruni wali agali maru bu karunaga giha howa tandaga nalu howa tigua ibuhondo bi lalu kago hale hagaore ka. 14 Waneigini aba ai̱ya nahe hono wahene bu karunaga bi larago erembira nami baya hangu hale haga ka. Ani bialu wali dalo ibu agalini homene bedarume bi larago hole haga ka. 15 Wali dalo bedagome dugu timbuni bialu wali agali ibuhondo mana lehe biyadago manani helaga ka.

16 Wali agali Anduane Homogonaga biabe baya hangu bia halu haga bu karunaga bi baya hangu hale halu ibugua tihondo turu holebira. 17 Wali agali manda nawi karunaga bi larago Anduane Homogo karia tigatiga puabo haga. Wali agali uruni ti turu nahe haabo halu Anduane Homogohanda tinaga bi larago hale haragola wahaga.

18 Wali agali mini lene timbuni bu karu ti ha̱lo hole ndo Anduane Homogohondo bi lalu haabo halu Anduane Homogo ibuni tiheba kaware kagola wahaga ka. Ani bialu wali agali bayale tigabi bu karume wali agali ko biaga karu bo wahai helo hongo mialu haga ka. 19 Anduane Homogo ibu hondo ha nabiaga ka. Ibu ti kagoha abaleore ibuwa 20 wali agali mende kago dara halu biamogo nabiaga karunaga hongo bo podalu wali agali ibuhondo mini mbiraore nawiaga bu karu pani nelo mialuore wahaga ka. 21 Anduane Homogohanda wali agali mine haga karu bo hilo wahai halu wali agali ko karunaga hongo timbuni ngago bo haealo wahai haga ka. 22 Ani bialu ibugua tininaga mini wu kagoria howa mo tale bialu biabe tinime bialu hayadagua yolo miadai bulebira. 23 Ani bialu wali agali ibunaga heneru godini howa biamogo bialu ibunaga dara holene irane nawini dara hagane mana ngagome ti mo turu timbuni holebira. 24 Heneneore wali agali tigua hondole turu holebirago ni hongohe dedagola beralibame ni dedago mo ge hagadagua horo ko mangabi tiha anda íbu ngangi Anduane Homogonaga dara holene panaga ibu ngagola hondole turu ho hagane.