1 Ai Tobaiasala dahuliyali biagola Media dindi pole pialu Tobaiasanaga biango heagobi ti haru mandagi pene. Libu pu dege bialu alendo ni anda pialu paliyagola libu Iba Taigirisi peago angeni haanda palene. 2 Tobaiasa ibu ge wayawaya bolenaga ibaha daliape hene. Ani biyagola wena timbuni mbirame ibaha howa pogoladaga halu Tobaiasanaga ge mendego nole bini. Ani biyagola Tobaiasa mogolalu ya lene. 3 Ani layagola dahuliyali biagome olowa lalu, Wena ogoni yupe halu peloleni hongo howa minu yania habe, lene. Ani layago hale howa Tobaiasahanda wena biago minu yania howa iba angeni gililo yu irigi hene.

4 Ani biyagola dahuliyali biagome Tobaiasahondo lamialu, Wena ogoninaga buni gubalini lilinibi baya hangu dugu wiai habe. Wena buni gubalini lilini uruni marasini bayaleorego iya pialu yalu dai bibiyago baya hangu mo ngelabe. Tini maru maru bu karu dugu wahai habe, lene. 5 Ani layagola Tobaiasahanda dahuliyali biagome bibe layadagua bini. Ani biai halu wena biago hirini. Hiruwa dagane mende libuni nalu mende harigani nole Tobaiasa ibugua nuha henene. Libu pu dege bialu Media dindi anda pene. 6 Tobaiasa ibugua dahuliyali biagohondo hale halu lalu, I̱ hambi Asaria-o ai wena bunibi gubalini lilinibi dugu hanaribagome warago agialego mo dabi holebirabe, lene.

7 Ani hale hayagola dahuliyali biagome ladai bialu lalu, Wena buni gubalini lilinibi irani delaregola dama wali agali mo ko haga karu ibida piai holebira. Wali agali mo ko halu henego yu wahalu ibida piai howa mani lone wali agaliha hole dai nabulebira. 8 Ai wena buni dugu yidegonime mbirali de ko halu deha hagua paleaguabi mbiraleme de andane halu nde handabe nahe heagua nde í̠na mbirali de kohe bedagonaga de wena buni ogonime domalu mbiraleme de dambi kago pulo waharegola de lone bayale halu handabehe holebira, lene.

9 Tobaiasa Labaelela Media dindini anda pialu ai Egebadana tano ngago kaware dege anda pole pene. 10 Ani puwa Labaele ibugua lalu, I̱ hamene Tobaiasa-o, lene. Ani layagola Tobaiasahanda ladai bialu lalu, Áyu mbiraga haragola iya agali í̠ damene Laguele andaga palibiya. Agali ogoni ibu wane mbira mini Sara beda.

11 Í̠ni ibu dameneore kegoni. Inanaga mamali mana ngagome wali ogoni dabu bulene karulape í̠ore kegoni. Ani bialu ina mamali mana mende ngagome wandari abanaga paluni ngago damene bibahende mo yai holene karulape í̠ni dege kegoni. 12 Wandari ogoni ibu baya taraore mbirani ibu gi nahaga mbira beda. Ibu ababi agali bayale dege mbira ka. Ani kago ainde áyu mbiraga i̱na wandari abala bi lalu í̠na ibu wane ogoni dabu bulene karulapebe lalu hale holiya. I̱na manda bu handalu koria ibugua wandari ogoni í̠ore ngiragola dabu bibelo. Ai Lagese howa dai berebangi dabu bialu tomo timbuniore dawalu tomo nami̱ya. Laguele ibugua wandari ogoni agali mendeme damu ibiragola e̱ nalolebira. Ani bialu ibugua Sara í̠ dabu bibelo ngulebira. Ibu wane ogoni agali mende dabu bilo miyagua Mosesehanda mana lowini ngagome lalu wandari aba homelo bo waholene nga leda. Í̠ hangu ibu wane ogoni dabu bulene karulape howa ibunaga paluni ngago karu lolenebi karulapeore kego manda bida. Ani bidago ai i̱na bi larogo baya hangu hale habe. Áyu mbiraga í̠na Sara dabu bibelogo Laguele iyame bi lo tiga bialu mo tiga biai holobaya. Ani bialu Lagese dai berebangi Sara haru halu dai bibiya, lene.

13 Ani layagola Tobaiasahanda Labaelehondo ladai bialu lalu, I̱ hamene Asaria-o Sara ogoninaga te maru agali marume layane hale haru. Tigua lalu agali karia bibahendeme wali ogoni dabu bigi binigo ainde agali uruni ti mbiraga mbira mbirani tini dabu bigi biyadangi wandari ogoni baba mandagi palia nabi howa wandari ibu tamuha wene anda pialu hearia agali uruni homaga biniya. 14 Te tigua layane hale harugo agua laya. Dama ko mbirame agali uruni bo wahaga biaga laya. Dama ogonime Sara bo wanahe agali ibu padagoha pole kaware porago bo wahaga, laya. Ani layago ainde i̱ aba ai̱yala waneigini mende nahe i̱ hangu kogo ainde i̱ giba. I̱ homaruyagua nde i̱ aba ai̱yalame dara timbuni howa libubi homaragola mo hora holene libu igini mende nahe, lene.

15 Ani layagola dahuliyali biagome lalu, Ainde í̠ abahanda bi galone lawai hayago embeda haribe. Í̠ wali mbira í̠ni dameneore bedago dabu bulene nga laya. Ai bi o larogo baya hangu hale habe. Dama ko ogoninaga í̠na gi nahabe. Í̠ Sara dabu bule pu dege bia. Áyu mbiraga Laguelehanda Sara í̠ dabu bibelo ngulebira. 16 Ai í̠na Sara ibunaga tamu hobane kagoha anda pialu howa wena gubalini lilinibi hanarigo yalu anda puwa irani delaregola dalu hagua biragola tumutumu biragome anda tamu hobane ogoniha dunguame holebira.✡ Tob 5.12 17 Dama ibu tumutumu birago ngu halu ibida puabo halu Sara bedaria lone dai nabulebira. Anigo ai libu mandagi palia nabi dege biruwa pigane libugua dahuliya andaganaga Anduane Homogo kagome libu dara halu baya hangu handaya ho haabo helo ibuhondo bi ala lalibu.✡ Pig 24.44

Hale harene. Gi nahabe. Ngode Datagaliwabehanda dindi pigane wabiangi howa Sara ibu í̠ one berelo manda buwa berelene. Í̠na dama Sara ibuha kago taliatagi halu Sara í̠ dindiha haru halu polebere. Sara libunaga waneigini dewa haragola libunaga waneiginiruhondo turu howa miniha dungulo holeberebi. Mini dege dindi nahabe, lene.

Ani layagola Tobaiasa ibugua Labaelehanda bi layago baya hanguore hale hai hene. Ai Tobaiasa ibu aba dameneha Sara libu hameigini mbiraore kago manda bu hene. Ani manda buwa ibunaga miniha Sara gubalini timbuniore ho howa ibugua Sara dabu bulene hamelo hene.