1 Tobaiasahanda ibu abahondo bi ladai bialu lalu, Í̠na mbirale i̱hondo bibe lalu langiriruni bibahende biai holebero. 2 Anigo Gabaelehanda muni yu haruago agua mo poliyadabe. I̱ ibu handa nabidogo. Ibugua i̱ abogoda lo manda bialu muni i̱hondo agua ngulubadabe. Ayubi nde i̱na Media dindi polene hariga manda nabi kogoni ndobe, lene. 3 Tobidihanda ladai bialu lalu, I̱na beba mbira bamba Gabaele iyame iyanaga mini gili binigo ai i̱na buda ki binigo ai budini mendego Gabaele ibu yalu mendego i̱ni yu kogoni. Beba Gabaele ibunagago i̱ yu hewane mali pira kira (20) piya. Ai áyu í̠na agali bayale tigabi hongohe mbira í̠ heba hariga pialu libu haru mandagi dai bulene bayale mbira taya bialu haru dai bule pu. Libugua pialu dai berebigola ibu yolo bimi̱ya. Anigo ai í̠na muni Gabaelehanda hondo helo miwadago ala mo yalu ogoria dai bule pudaba, lene.

4 Ai ibugua agali mbira Media polene hariga manda bi ibula Media polenaga mbirali taya bima pene. Ibu andaga howa wene pole pialu hearia abaleore Labaele ngola hene.✡ Hi 13.2 5 Agali ogoni Ngode Datagaliwabehanda ibileneda lowa Tobaiasa ibu manda nabi hene. Ani howa Tobaiasa ibugua Labaelehondo hale halu lalu, Í̠ aniali kebe, lene. Ani layagola Labaelehanda ladai bialu lalu, I̱ Isaraeleali kogo. I̱ í̠ damene dege mbirago i̱ Niniba tanoha howa ibinigo ai biabe taya bero, lene. Ani layagola Tobaiasa ibugua hale halu lalu, Media dindiha polene hariga í̠ manda bidebe, lene. 6 Ani hale hayagola Labaelehanda ladai bialu lalu. I̱na pialu agali í̠ damene Gabaele kago andaga pialu paligi biruli. Ibu andaga Lagese tano mbira ngagoria ka. Egebadana tano timbuni ngagoria howa pialu Lagese tano polenaga handa halu kira paliaga. Lagese tano ogoni hari hombeneni nga, lene.

7 Ai Tobaiasa ibugua Labaelehondo lamialu lalu, Hambi-o í̠na i̱ aba lamule porogo í̠na ogoria hondo habe. I̱na iya haru Media dindi mbaliya hame ledogo pialu dai buwa í̠ yolo nguliya, lene. 8 Ani layagola Labaele ibugua lalu, Karulapego i̱na ogoria kogo í̠na pialu lu nahe abale dai bibe, lene. 9 Ai Tobaiasa ibugua puwa ibu abahondo lalu, Agali i̱la Media dindi polene mbira hearia handa walia haru, lene. Ani layagola Tobidihanda ladai bialu lalu, Í̠na puwa agali ogoni haru halu ibule pu. I̱na agali ogoni ibu hameigini emene ai ariadabe dabo hondoliya. Ani bialu ibu agali bayale í̠la haru hariga mandagi pobehedabe hondoliya haru halu ibule pu, lene.

Ai Tobaiasa ibugua puwa Labaele olowa lalu, I̱ abahanda í̠ ibu bedaria ibabelo hamelo beda, lene. Labaele ibu andaga tamuha anda ibiyagola Tobidila ibiribe lalu mo bila hene. Ai Labaele ibugua Tobidi hale halu lalu, Í̠ bayale holedabe, lene. Ani layagola Tobidihanda ladai bialu lalu, I̱ agua bialu karulape bayale holeda. I̱naga de ndibulo wahene mbirale mbira deme handabe nahe bedogoni ndobe. I̱na wali agalime bi larago hale holeberogo ai deme nahondolebero, lene. Ani layagola Labaelehanda ladai bialu lalu, Mbirale ogoninaga mini burugu nalabe. Emene howa Ngode Datagaliwabehanda lone í̠ mo bayale holebira, lene. Ani layagola ai Tobidihanda Labaele lamialu lalu, I̱ igini Tobaiasa ibu Media dindiha polebirago í̠na ibu hariga mo walia haga bima libu haru mandagi polene karulape kebe. Pialu dai berebigola nde i̱na í̠ yolo nguliya, lene. Ani hale hayagola Labaelehanda ladai bialu lalu, Í̠na dewa haluore dindi ogoniha hariga hari bare bare wiagoha pearubi dindi ulini panda panda dangi pale wiaruhabi ibaga biai henego hariga baya hanguore handalu manda biaore kogo i̱na ibu heba mandagi polene karulape, lene. 10 Ai Tobidihanda hale ha dege bialu lalu, Aiore i̱ nenege-o í̠ nde hameigini timbuni ai aria howa aba igini emene ai aria kebe, lene. 11 Ani layagola Labaele ibugua ladai bialu lalu, Irane aginaga í̠na mbirale uruni hale howa manda buleberebe, lene. Ani layagola Tobidihanda lalu, Í̠naga minibi í̠ aba igini emene minibi tiga tiga langibelo hame ledo. 12 Ani layagola Labaelehanda ladai bialu lalu, I̱ Ananaiasa igini Asaria kogoni. Ananaiasa ibu í̠ damene dege mbira ka, lene.

13 Ani layagola Tobidihanda Labaele lamialu lalu, Í̠na i̱ andaga ibirigo bayuwa ibiridago ainde i̱ igini-o Ngode Datagaliwabehanda tawe helo. Aiore í̠nibi í̠ aba ai̱yabi baya hangu daba hondolenaga hale ha dege buleberogo í̠na i̱hondo keba nahabe. I̱na handalu koria ai í̠ni damene dege howa damene bayaleha howa ibiridane hendedo. Ananaiasa Nadanala libu Semaia igini kago i̱ manda bido. Ina Ngode Datagaliwabehondo lomabu mule Yarusaleme pole mandagi poromali. Í̠ hameigini tiore wali agali bayaleore howa í̠ damene uruni hongoheore mbira ka. Ainde libu harigani porabigoha Ngode Datagaliwabe ibunime libu baya hangu handaya ho helo laro, lene.

14 Tobidihanda laabo halu lalu, I̱na í̠ horo mbira mbira bibahendenaga yolo ngialu libu tomo nalibulobi muni ngia dege bulebero. 15 Ainde í̠ Tobaiasala baya hanguore ibaga bu hariyagua nde yolo muni maru lone tago halu ngulebero, lene. 16 Ani layagola Labaelehanda ladai bialu lalu, Í̠ miniha gi nahabe. Iya harigani pialu howabi dai bialu howabi waitigi mbira ngola nahe bayale dai bulebereba. Harigani áyu iya mo ko holene mbira nawi hariga bayale nga, lene. Ani layagola Tobidihanda ladai bialu lalu, Ai Ngode Datagaliwabe í̠ heba mandagi pelo laro, lene. Ani lowa ibugua Tobaiasa olowa lalu, Igini-o ai libu pilibulo. Ngode Datagaliwabe ibunaga dahuliyali bayale kagomebi libu baya hanguore haru pialu lone haru halu dai bilo laro, lene. Ai Tobaiasa ibu pole pialu howa ibu aba ai̱yala nunu lene. Ai Tobidihanda lone lalu, Mo ko holene mbira ngola nahe bayale ibagabu halu dai bilibu, lene.✡ Pig 24.7, 24.40

17 Anigo ai Tobaiasa ai̱yahanda hongo howa dugu bialu howa lalu, I̱ igini ogoni aguanaga pu larebe. Iya handaya ho holene iya igini mbiraore ogoni hangu ndobe. Iyanaga tomobi maruale iya burupale ngago damene aiwa taya bulubadabe.✡ Pig 24.7, Har 23.20, Iba 91.11 18 Ai í̠na muni biago mo yu dai bulenego hame timbuni lo kego ainde í̠ igini pu ereba hayagua hame nalolebere bada. 19 Ainde Ngode Datagaliwabehanda inahondo mbirale bayale dewaore ngiyaru yu howa turu hagabu holene abida, lene. 20 Ani layagola Tobidihanda ibu onehondo ladai bialu lalu, Í̠naga bu miniha genda nahe waha. Tobaiasa ibu bayale pialu bayale dege ibagabu halu lone dai biragola í̠naga deme lone hondoleberego nale waha. 21 Libunaga í̠na genda holene nawigo miniha genda nahabe. Dahuliyali bayale mbira Tobaiasa heba mandagi biaga bu holebira. Ibu ibaga bu haragoha bayale halu ibu lone dai bulebira. Ibu bayale karulape áyu kagobi dege holebira, lene. Ani layagola ibu dugu nabi berene.✡ Tob 6.16, 10.6