1 Mini gigabi wulene ibugua biabe hongo howaore bialu ibu dindi ngaru bibahendeha piai haga bialu dindi anda bu kagoria irigi haga biaga. Ani irigi halu mbirale ngaru bibahende mo tiga bigi biaga.

2 I̱na mini gigabi wulene hamelo haru. Abale igiri daliahe hewangi i̱ ibula haru mandagi haabo haru. Ibu i̱naga gubaliniore hene. Agalime wandari bayaore mbira bedago gubalini ho hagadagua i̱na ibu gubalini timbuni ho haru.✡ Sir 15.2 3 Ibu Ngode Datagaliwabe howa ibalu mini lene timbuni haya. Ibunaga mini daligaore ngago irane ibu Ngode Datagaliwabela mandagi haabo haga kagome. 4 Mbirale bibahendenaga Anduane Homogo Ngode Datagaliwabehanda ibu gubalini ho haga ka. Mini gigabi ibugua Ngode Datagaliwabenaga biabe bulene ngago bialu ibunila haru mandagi haga ka. Mini gigabi ibugua Ngode Datagaliwabenaga mini ngago damene bibahende manda biai ho kagome libu haru biabe bialu haga ka.✡ Min 8.27-30 5 Wali agalime dindini wini ngaru dewaore mo mogo bu wu hayagua nde karulape dege. Anigo mini gigabi bayale wu holene ngago ibu baya taraore mbira dindini wini ngaru bolangua howa ngago irane ibunime mbirale ngaru bibahende wabiai hene kagome nga. 6 Wali agalime mbirale ngaru tininaga mandame wabiyagua nde karulape dege. Anigo mini gigabi wulene ngago ibugua agalinaga manda ngaru bolangua haiho ngago irane ibuni wabiai hene ka. 7 Wali agalime ti tigabi holene hamelo heagua nde mana bayale mini gigabi ibugua biagago mitangi bulene nga. Wali agali tigua tininaga mini hamela haru howa mini ngagobi biabe bulene ngagobi baya hangu mo tale bilonaga mini gigabi ibugua ti lawai haga ka. Ani bialu wali agali tigua mana tigabi ngago talialu howa wali agali gi nahe hongo ho hagadagua howa helonaga mini gigabi ibugua dege lawai haga nga. Mana bayale uruni bibahendeme wali agali dege biamogo biaga. Holene uruni aria mbira hangumebi mini gigabi ibugua biamogo biagadagua nabulebira. 8 Wali agalime biabe tara tara bulene taya biyaguabi mini tara tara wulene taya biyaguabi uruni bibahende mini gigabi wulene ibugua biamogo bulebira. Ibugua bambaore bini ngagobi mani bulubadarubi bibahende manda biai ho kagome mini gigabi ibugua ti biamogo bulebira. Ibugua wali agalinaga bi tara tara larago mo tiga buwa mo wála halu bi latagi nahe ngagonaga irane mo walia halu latagi haga ka. Ngode Datagaliwabehanda manane mbira mo walia hole ngagobi agalime nabiagane ale bule ngagobi manda biai halu mbirale bibahende maniore ibulebiragobi manda biaho ka.

9 Ai mini gigabi ibugua ibunaga manda wiago bibahendeme i̱ biamogo bialu i̱ha genda bulenebi mini burugu lolenerubi anda ibirangi i̱ biamogo bulubada lo manda bido. Ani bulebirago manda bialu i̱na ibu gubalini timbuni ho howa ainde ibu i̱ heba mandagi haabo helo hame timbuni lo ko. 10 I̱ninaga mini giga bulene wu hewagome wali agalinaga deni i̱ mini lene timbuni henego kogoni. Heneneore i̱ igiri emene ha kogonigo ainde agali haguane ala hene bu karu tigua i̱naga mini yaraga haga ka. 11 Ai wali agali tigua handalu karia i̱ manani tigatigaore mo tale bialu tigatiga laga henedane hondolebira. Ani hondowa agali haguane bu karu tigua i̱hondo turu timbuni holebira. 12 I̱na bi la nabi kogola wali agali tigua bi nale nimulo hagahaga biaga. Ai i̱na bi larogola tigua baya hangu hale hai ho haga. I̱na bi lu lalu kogola wali agali ti hale ho habe manga nahaga. 13 Mini gigabi wulene ibugua binime i̱naga mini yaraga henego ainde ani wiaho wiaabo holebira. Ai wali agali mani holebiraru tigua i̱naga mini embeda nahe mitangi biaho wiaabo holebira. 14 I̱na dindi tara tara ngaru dewaore haru howa handaya ho kogola wali agali dindi uruniha bu karu i̱naga hongo gibi kogo andaneha hai holebira. 15 Ani kogola wali agali tigua i̱ tinaga kini bayalebi wai biaga agali hongohebi i̱ henedalo hondolebira. 16 Ai i̱ni andaga dai berogola mini gigabime i̱naga bu miniha mo palia holene karula haga. Anidagua biagago irane ibu i̱naga nenegeore kagome i̱ha genda ho holene mbira anda naibaga. I̱ ibu heba mandagi howa i̱ha mo ko nahe haruli. I̱ turu ho haabo haruli.

17 I̱na mbirale uruni i̱naga miniha tombehabi ngelo howa ogodagua laro. Mbirale ibu mini gigabi ngago baba mini mbiraoreho hayagua nde ibuha haabobo bu holene yu holebira. 18 Maru tí nde agali ogoni nenege hayagua ti turubiore ka. Mbirale tinaga biabe bia haga kago ibu mbirale bayale ngaru mo yu holebira. Ani bialu mini gigabi ibuha howa mbirale bayale dewaore tagira ibulebira. Wali agali ibu heba te lalu bedago ti mini leneore holebira. Ani bulene wiago hondowa i̱na mini gigabi bayale ogoni ngola howa i̱nila mandagi holenaga hariga tara tara wiaru taya biru. 19 I̱ waneigini galioreni i̱naga tingini Ngode Datagaliwabehanda ngiya. Ani bialu mana bayale bulene i̱ha ngelalu biya. 20 Ai wahalu i̱ni bayaore ko lolene karulapeda. Ani bialu i̱nime tingini baya tara mbiraha anda piru. 21 Anigo ai i̱nime manda bido. Ainde i̱nime mini gigabi bayale ngago mulenego Ngode Datagaliwabehanda nangiyagua nde mo yulene nakarulapeore. Ai Ngode Datagaliwabehanda i̱hondo mbirale ogoni bameore i̱ mo turu halu ngiyago ai manda ogonime i̱ mo walia kagome i̱naga miniha wáleore kogo mo walia ka. Ani bidago manda bialu i̱naga miniha dege Anduane Homogohondo bi lalu holebero.