1 I̱ mamalirunaga Ngode Datagaliwabebi dara holene irane nawini dara holene Ngode Datagaliwabebi kego í̠naga bi degeme mbirale bibahende ngaru wabiai hariya.✡ 1 Kin 3.6-9, SMG 7.7 2 Í̠ninaga mini gigabi ngegome mbirale ngaru bibahende handaya ho howa haru hai helonaga wali agali wabiriya. 3 Ani bialu tigua mini gigabi wulenebi mini bayale wulenebi wu howa mbira ngaru bibahende handaya ho howa mo tale bialu helonaga wabiriya. 4 Ngode Datagaliwabe-o mini gigabi wulene í̠ heba mandagi ka. Ani bialu libu haru mandagi mbirale ngaru handaya ho kebigo ainde mini gigabi ogoni i̱ ngibe. I̱ í̠naga waneigini bu karuha hatago hole anda ibulino naibule nalabe. 5 I̱ í̠naga garabaya biabe ale biaga kogoni ndobe. I̱ wali í̠naga biabe biaga biago igini ko. Ani howa i̱ agali hongo naheore kogo dindi ogoria tigimandi hangu holebero. I̱na tigabiore lolenaga mana tigabi ngadagua lolene manda nabiore kogoni. 6 Ai wali agali mbira ibu mana bayale ngago bibahende taluwa bialu howa ibuha mini bayalebi mini gigabi wulenebi í̠ha howa ibini nawi heagua nde wali agalibi ogoni ibu habane nabulene mbira holebira. 7 Ngode Datagaliwabe-o í̠na i í̠naga wali agalinaga kini holiya dabo helalu í̠ waneigini uruni ti mana larago hale howa mo tale biaga holiya dabo helede. 8 I̱naga hari nene biagoria í̠ anda buliyabi loma bu delaga dabu mbira Yarusalemeni bia holiyabi ani bibe lalu i̱hondo langiri. Yarusaleme í̠ni biragane tano timbuni ngagola anda kago ibu dahuliya andanaga manane ka. I̱nime Yarusaleme bambaore howa manda manda bu winiya. 9 Mini gigabi wulene ibu í̠la haabo haga. Bamba í̠na dindi harila wabiringi ibu í̠la mandagi hene. Ani howa ibugua í̠ hame ledego manda biai halu mbirale í̠naga mana lo ngago talialu bialu holene tigabi wiagobi manda biai hene. 10 Mini gigabi wulene í̠nila dahuliya andagaha kago ibu ibilabe. Ibugua mbirale í̠na hamelo kego damene bibahende i̱ lawai helo ibu í̠naga wá timbuni taraore holene ngego wahalu dalialu ibilabe. 11 Ibuha manda bayale bialu mbirale bibahendenaga mini wále bayale ngago ainde ibugua mbirale bibahende i̱na bule manda bidogo damenenaga mini baya hangu haru hai helo. Ani bialu ibunaga hongome i̱ haru helo. 12 Anidagua biragola i̱naga biabe berogo damene bibahende í̠naga deni bayale hai helo ani bibe. I̱na wali agali í̠naga karunaga dabolene tigabi lolene ngadagua lalu tinaga bi larago bibahende baya hangu mo tale buliya. Ani bialu i̱ni kini bayale holiyabi i̱ aba Debidinaga henge muliyabi ibugua haru helo ibi labe.

13 Ainde mbiralime Ngode Datagaliwabenaga mini mandala ngago baya hangu manda biai habehebe. Ndo manda biai habe naheore. 14 Nahabehedago irane agalinaga mini bayaleore ndo howa mbirale bulebirago damene bibahende biako hai haga. 15 Anidagua biagago irane wali agalinaga tingini dindi kagome abale mo ko hai hagaya. Tingini ogonime wali agalinaga holene ngagoha genda mo ngialu mini abale puguagaya. 16 Ai iname manda bialu mbirale dindini ngaru damene bibahendenaga manda bulenego ndelaheda lo manda beremali. Ani bialu mbirale inanaga deni kaware ngaru baya hangu handa tiga naberemali. Anidagua beremaligo ainde mbirale wiado hene dahuliya andaga ngaru baya hangu manda bibehe ai kabe. 17 Ngode Datagaliwabe-o í̠naga hame ngego mbiralime manda nabiore ndobe. Ainde í̠nime í̠naga mini gigabi wulene wali agalihondo mialu í̠naga dinini dindini dalilalu miriyagua nde wali agalime baya hangu manda bibehe ka. 18 Anidagua dege dindini wali agali bu karume talialu helonaga hariga baya hangu mo tiga biriya. Í̠na mbirale í̠ni hamelo keru wali agali lawai haregola mini gigabi wulene ibugua ti biamogo biaga, lene.