7
Abaveyao ana tofaisewa ana egana Melikisedeki inubana.
1 Bana Melikisedeki inubana faꞋina nuwami ganatalafolena. BanaꞋe badi miSalema yadi kini kadu Yaubada Getane-moꞋane yana abaveyao ana tofaisewa. Bana Abelahamo gina kini tufoidi buye hilulugaviya ada giꞋivehamumudi. GiꞋivehamumudi gihavaina, gilowoga be giyewayewana tu bana Melikisedeki edeya gimaduhagana ada gigahena gigayo, “Abelahamo, gagahe velemoꞋena Yaubada ginanuwakabubuye.” Hidedemi bana kaliva kikaiwabuna gigahe. 2 Ada Abelahamo lokoloko moyaꞋaina gaviya againe giyabwana-ma boꞋu teni amine gisedakana, ada boꞋu saꞋeyana Melikisedeki givelena. Tu Melikisedeki ana egana ana kaivila faꞋina kananuwanuwa. Nagona bana higa yegayegana ana kini. Ada kadu melala ana egana Salema ana kaivila ma niwalova. Bana Melikisedeki Salema ana tovehimeya faꞋina, kadu hivewagana niwalova ana kini. Ana egana luhei ana nuwanuwa au hidede amine. 3 Kadu tamana hinana adi egana Veyao Tuwaina ana buki keke gidayakahini, ada gaveyao bana bwaneneneyao ma kadu keke gidayakahidi. Yana tubuga kadu yana alika ana aituha keke gidayakahini. Au bana Melikisedeki anafaiweya Yaubada Natuna tuwai-lokalokana gimiyamiya-vagata amanadi. Ada Bana Yaubada Natuna abaveyao ana tofaisewa ana maka giꞋabiꞋabi-vagahina amine, meda anafaiweya Melikisedeki makai-nadi giꞋabi-vagahina. Aba 14:17-20 Hi 7:15-17
Melikisedeki mali abaveyao ana tofaisewa gikaiwabuhegedi.
4 WaꞋita, bana Melikisedeki kaliva kikaiwabuna. FaꞋina yada kaliva lakahina Abelahamo, higa bwaneneda nagona, yana yabwana boꞋu teni amine gisedakana be boꞋu saꞋeyana givelena. 5 Ada Abelahamo gaisena saꞋeyana muliya gitubuyemu-ma ana egana Livai wananuwenuwena. Livai bwaneneneyao abaveyao ana tofaisewa adi maka hivaina, ada Yaubada givehimeya be higa tobohiyadiyao agaidiya yadi gaitoma hivaivaina. Badi tobohiyadiyao kadu Abelahamo ana yoꞋo agaidiya hitubuyemu, au adi yoꞋo saꞋeyana higa miIsileli. Tobohiyadiyao yadi faha o yadi lokoloko boꞋu teni amine hisesedakana tu Livai bwaneneneyao boꞋu saꞋeyana hivaivaina. Tobohiyadiyao nonogana boꞋu saꞋeyana vaita takesi amine hivaivaina. 6 Bana Melikisedeki ma keke badi Abelahamo Livai yadi yoꞋo agaidiya gidatubuyemu. Atu Abelahamo yana lokoloko ana boꞋu saꞋeyana givaina ada gigahena gigayo, “Abelahamo, o againiya gagahe velemoꞋena Yaubada ginanuwakabubuye.” Hidede amine bana kaliva kikaiwabuna gigahe. Bana Abelahamo againe Yaubada yana leme faꞋina giwonadabadaba tu Melikisedeki Abelahamo yana lokoloko ana boꞋu saꞋeyana givaina ada gigahenuwakabubuyena.
7 Hidede amine gigahenuwakabubuyena ada ide kahalamanena bana togahenuwakabubu yana gahenuwakabubu ana tonogala gikaiwabuhegena. Bwaneneda Abelahamo kikaiwabuna tu Melikisedeki gigahenuwakabubuyena faꞋina, bana kaliva kikaiwabu-moꞋena. 8 KaduꞋe badi abaveyao ana tofaisewa Livai againe hitubuyemu ada kaliva yadi lokoloko ana boꞋu teni againe boꞋu saꞋeyana hivaivaina-ma hiꞋaliꞋalika. Bana Melikisedeki ma Abelahamo yana lokoloko ana boꞋu teni againe boꞋu saꞋeyana givaina-ma wayawaina gimimiyami Veyao Tuwaina ana buki gigahe amine. 9-10 Ada kadu Melikisedeki Abelahamo edeya gimaduhagana be yana yabwana ana boꞋu teni againe boꞋu saꞋeyana givelena ana toveya, bana Livai aimo gaisena Abelahamo hagaline gidauda, aimo keke gidatubuga. E, Livai aimo Abelahamo hagaline gidauda faꞋina, adafaiweya kanagahe vaita Melikisedeki boꞋu saꞋeyana Abelahamo againe givaina faꞋina, kadu bana Livai againe givaina. Livai ana yoꞋo higa badi abaveyao ana tofaisewa tobohiyadiyao agaidiya boꞋu saꞋeyana hivaivaina, atu Melikisedeki vaita Livai againe gidavaini. Hidede amine Melikisedeki Livai againe givaina faꞋina, kahalamanena bana abaveyao ana tofaisewa Melikisedeki badi abaveyao ana tofaisewa Livai ana yoꞋo agaidiya gikaiwabuhegedi. Ail 18:21
Yesu mali abaveyao ana tofaisewa gikaiwabuhegedi,
Melikisedeki amine.
11 Tu Livai ana yoꞋo kalivai-dina abaveyao ana tofaisewa yadi faisewa hiꞋabina. Vehimeya tuwaina inubana ma badi abaveyao ana tofaisewa adi maka againe giyemu be kaliva hiveledi. KaꞋi abaveyao ana tofaisewa Livai ana yoꞋo agaidiya yadi faisewa againe kaliva moyaꞋaida hidakiveyeveyegada be Yaubada buye kadaveyao-vagata digo, kadu abaveyao ana tofaisewa tulina keke ada lauboda. Tu keke kadaveyao-vagata faꞋina, abaveyao ana tofaisewa tulina a gilakayemu, ada keke Livai bwanenena ana egana Eloni ana maka amine gidavaini, au Melikisedeki ana maka tulina amine givaina. 12 Yaubada abaveyao ana tofaisewa tulina gisena faꞋina, gilubodana be kadu vehimeya tulina gidasena. 13-14 Tuwaina vehimeya nagona againe Livai ana yoꞋo kalivai-dina abaveyao ana tofaisewa adi maka hivaina, ada Mosese Yuda ana yoꞋo kalivai-dina faꞋidiya keke tamo gidagahe higa vaita abaveyao ana tofaisewa adi maka hinaꞋabini-yo Yaubada yana atudidigeya abaveyao hinamunudi, keke-moꞋa. Atu ide ahe kahalamanena mena abaveyao ana tofaisewa tulina Bana yada Kaiwabu Yesu ma keke Livai ana yoꞋo kalivana, au Yuda ana yoꞋo agaidiya gitubuyemu. Abaveyao ana tofaisewa tulina yoꞋo tulina kalivana faꞋina, Yaubada vehimeya tulina giseyemaunena.
15 Tu abaveyao ana tofaisewa tulina Melikisedeki amine ahe gilakayemu. FaꞋina yaku gahe abaveyao ana tofaisewa tulina kadu vehimeya tulina faꞋina a gimahali-moꞋena. 16-17 Bana Yesu ahe gilakayemu ada abaveyao ana tofaisewa ana maka givaina. Mena makai-nadi inubana ma keke vaita Bana Yesu Livai ana yoꞋo kalivana yo higa abaveyao ana tofaisewa yadi faisewa ginaꞋabini, keke. Mena makai-nadi givaina-ma inubana yawai-vagahina yana faiwala againe gimimiyami, ada keke-moꞋa ginaꞋalika. E, yawai-vagahina yana faiwala againe gimimiyami faꞋina abaveyao ana tofaisewa ana maka givaina, Veyao Tuwaina ana buki gigahe gigayo,
Abaveyao ana tofaisewa ana maka
O againiya ginaduva-vagata.
Tuwai-moꞋena Abelahamo yana toveya
Melikisedeki mena makai-nadi
giꞋabina amine, kadu O unaꞋabina.
Au OꞋeni bana yana yoꞋo kalivana.
18-19 Vehimeya tuwaina abaveyao ana tofaisewa faꞋidiya ma yana faiwala keke, kadu keke ada leme mena vehimeyai-nadi againe kadavaini. Keke Mosese yana vehimeya againe yada yegayegana kadanuhagani-yo Yaubada buye kadaveyao-vagata. FaꞋina Yaubada eda ivaguna giseyemaunena be ide adafaiweya yada wavemwamwala kananuwanuwa kanagayo, “Yesu yana leme againe kanayegayega be Yaubada liline kanayemu.” Mena eda ivaguna Yaubada Yesu againe giseyemaunena-ma vehimeya tuwaina gitubutagona. Md 2:6 Sam 110:4 Ga 2:16, Lo 8:3-4
Yaubada Tauna ana egana giyakahini-yo Yesu maka givaina.
20-21 Atu Yaubada keke abaveyao ana tofaisewa ana maka Yesu gidavele-kawowoni, au Tauna ana egana giyakahini-yo givelena. Livai ana yoꞋo kalivai-dina ma abaveyao ana tofaisewa yadi faisewa hivaina againe, keke tamo hakwadi Yaubada ana egana gidayakahini-yo adi maka hidavaini. Bana Yesu ma abaveyao ana tofaisewa ana maka givaina againe, Yaubada Tauna ana egana giyakahina gigahena gigayo,
OꞋeni abaveyao ana tofaisewa
ana maka unaꞋabiꞋabi-vagahina.
Iya Yaubada hidede amine gawonadabadaba
ada yaku gahe keke-moꞋa ganayawelini.
22 Au hidede amine Yaubada Tauna ana egana giyakahina be giwonadabadaba faꞋina, Yesu yana faisewa againe veyao ivaguna ginaꞋitaveꞋavina be ide Yaubada buye velemoꞋena kanaveyao. Mena veyao ivaguna ma veyao tuwaina gitubutagona.
23 Kadu badi abaveyao ana tofaisewa Livai ana yoꞋo agaidiya moyaꞋai-moꞋedi, faꞋina hiꞋaliꞋalika tu adi hilafa himidimidi. 24 Bana Yesu ma gimiyamiya-vagata faꞋina, abaveyao ana tofaisewa ana maka giꞋabi-vagahina, ana hilafa keke. 25 Bana gimiyamiya-vagata be ide faꞋideya Yaubada matane giveꞋoveꞋoꞋola toyogina faꞋina, ide gaveyao Yesu ana eganeya Yaubada liline kayemu, medema anafaiweya ginakibababale-moꞋeda be tova moyaꞋaina ginaꞋitaꞋitaveꞋavida. Sam 110:1 Hi 8:6 Lo 8:34, 1Yn 2:1
Bana Yesu abaveyao ana tofaisewa yamuyamumu-Ꞌowogina.
26 Yesu kaliva mahamahalina. Keke tamo koyona Bana againe gidadauda, au Toyegayegana-moꞋa. Kadu BanaꞋe sevesevehailana, tokoyona adi yoꞋo tulidi, Bana tulina. Kadu lobama getane-moꞋane gilaka be Yaubada matane gimimiyami. Yesu ana itaꞋita hidede amine faꞋina, BanaꞋe abaveyao ana tofaisewa ada lauboda-moꞋa, faꞋina ada leme tulina tulina Bana anafata. 27 Kadu BanaꞋe keke mali abaveyao ana tofaisewa kikaiwabudiyao Livai ana yoꞋo agaidiya amine. BadiꞋiyao ma tova moyaꞋaina abaveyao hififaisewana. Nagona taudiyao yadi koyona ana abaꞋaiyawela faꞋina yadi abaveyao hiseusena, tu mulina kaliva moyaꞋaidi yadi koyona ana abaꞋaiyawela faꞋina hiseusena. Tu Bana Yesu ma keke gidahuluva badi amine. BanaꞋe keke Tauna faꞋine abaveyao gidafaisewani, au ide tokoyona faꞋideya gifaisewana. Kadu keke tova moyaꞋaina abaveyao gidafifaisewani, au tova saꞋeyanaga Tauna wowona ana hawahega againe abaveyao gifaisewa-vagahina, ada mena abaveyao moyaꞋaida yada koyona ana aiyawela anafata. 28 Mosese yana vehimeya ana huluva ma kaliva saꞋeyana saꞋeyana abaveyao ana tofaisewa ana maka hivaivaina, ana hilafa ana hilafa amine. Badi tomiyababi kowakowadiyao. Mosese yana vehimeya lauva tunugina gidauda tu Yaubada Tauna ana egana giyakahina be yana wonadabadaba againe Natuna givegidena be abaveyao ana tofaisewa kikaiwabuna ana maka ginaꞋabi-vagahina. Badi tomiyababi ma kowakowadiyao yadi wakoyona tu Bana Yaubada Natuna ma Toyegayegana-moꞋa, ada yana halamana veyao-vagata ana faisewa faꞋina gitubuga-moꞋa. Hi 4:15 Hi 10:10, Ef 5:2 Hi 5:1-2,9