8
Yesu abaveyao ana tofaisewa kikaiwabuna ana maka
ide faꞋideya giꞋabi-vagahina.
1-2 Tu yama lukahihi abaveyao ana tofaisewa kikaiwabuna ana maka faꞋina matana lakahina hidede amine. Abaveyao ana tofaisewa kikaiwabuna ahe alukahihiyena amine weꞋa ide faꞋideya gimimiyami. BanaꞋe lobameya gilaka digo Tokaiwabu-moꞋa yana didigaꞋuꞋu iꞋatagine givetoga, ada wese lobameya Yaubada yana manuwa ana Vetawana Tabu-moꞋa againe gifififaisewa. Mena manuwai-nadi au Yaubada yana abamiyami velemoꞋena ada Kaiwabu manuwai-nadi Tauna gikivemididina, au keke kaliva hidakivemididini.
3 KaduꞋe abaveyao ana tofaisewa kikaiwabuna saꞋeyana saꞋeyana adi vehimeya gidadauda, higa kaliva yadi abahawahega tulina tulina kadu kevakeva higa kaliva yadi abaveyao Yaubada matane hiseusena be yadi koyona ginayawelina faꞋina. Ada au gilubodana be yada abaveyao ana tofaisewa tamo gavadi yana abahawahega Yaubada againe ginasena, higa Tauna wowona. 4 Boi tuwai-moꞋena Mosese badi Livai yana yoꞋo kalivai-dina adi vehimeya giveledi, higa vaita abaveyao ana tofaisewa adi maka hidaꞋabiꞋabini-yo abaveyao tulina tulina Yaubada matane hidaseuseni. Badi hiseusena faꞋina, kaꞋi Yesu babiya gidamiyami digo, BanaꞋe keke abaveyao ana tofaisewa adi maka gidaꞋabini, faꞋina Bana keke Livai yana yoꞋo kalivana. 5 Boi tuwaina Mosese oya Sainai gilaka be Yaubada buye hilukahihi. Hilulukahihi tu vaita avayauna amine Yaubada yana manuwa lobameya gidadauda-ma giꞋitana. Muliya falai lakahina Yaubada yana abamiya hidakivemididina ma Yaubada Mosese gikivetuvetununa gigayo, “Unogali! AbaꞋita boi oyeya gavehawale amine yaku abamiya ana gaitoma moyaꞋaina medemi wanabubuna.” Ada au manuwa hikivemididina, ada mena manuwai-nadi ma manuwa lobameya gidadauda-ma anununa amine. Keke manuwa-moꞋena au anununaga. Ada badi Livai yana yoꞋo kalivai-dina manuwa lobameya anununa babiya medede againe hififaisewa. 6 Atu Bana Yesu ma ana vehimeya abaveyao ana tofaisewa faꞋina givaina-ma badi Livai yana yoꞋo kalivai-dina adi vehimeya gitubuhegena. Meda anafaiweya Yesu Yaubada ideꞋeyao adahinafeya gimidi-yo giulayagiyagilida be veyao giꞋihagihagiyena ada veyao-nadi veyao tuwaina gitubuhegena, faꞋina veyao ivaguna ana wonadabadaba Yaubada Yesu awane giyakahina-ma, veyao tuwaina ana wonadabadaba Mosese awane giyakahina-ma gitubuhegena. Hi 1:3, 10:12 Yem 25:40, Kl 2:17 Hi 7:22, 9:15
Veyao ivaguna ana wonadabadaba faꞋina.
7 Veyao tuwaina ma keke waꞋagevavana, faꞋina kaliva Yaubada yana vehimeya keke hidaꞋitaveꞋavini. KaꞋi veyao tuwaina againe kaliva faiwala hidavaini-yo Yaubada bonana hidaꞋabina digo, kadu Yaubada veyao anavelu keke gidaseni-yo veyao nagona gidatubutagoni. 8 Badi bwanenedeyao yadi dewa keke yegeyegana Yaubada matane faꞋina gigahedi gigayo,
Iya Kaiwabu gagahe,
Aituha giꞋelaꞋela be
veyao ivaguna ganasena
badi miIsileli higa miYuda agaidiya.
9 Veyao ivaguna keke veyao tuwaina
bwanenediyao agaidiya gasena-ma amine.
Boi tuwai-moꞋena bwanenediyao
Idifita againe gana gavegaꞋauledi ana toveya,
yaku veyao agaidiya gasena.
Tu yaku veyao keke hidaꞋitaveꞋavini,
faꞋina gavekwaulaugedi.
Hidedemi Iya Kaiwabu gagahe.
10 Kadu veyao ivaguna faꞋina Kaiwabu gigahe,
Tova tuwaina ginahavaini-yo
yaku veyao miIsileli adi yoꞋo agaidiya
hidede amine ganasena, higa
yaku vehimeya nuwadiya ganasena,
yaku kivetunu aseꞋasediya ganaꞋetoladina.
Iya yadi Yaubada ganamiyami,
tu badi yaku yoꞋo hinamiyami.
11 Tovai-nadi moyaꞋaidi hinahalamaneku.
Kaliva saꞋeyana saꞋeyana
keke tawaneyao o taineyao
aku halamana faꞋina ginavehawaledi,
Gavadi-yo keke ginavehawaledi?
Me kaliva lakahina kadu kwamana kabisona
au moyaꞋaidi hinahalamane-moꞋeku.
12 Gavaimi-yo Iya yadi Yaubada hinahalamaneku?
Badi tokoyona nonogana ganahinekalikaliyedi
ada yadi koyona ganayawelina be
keke kadu gananuwa-nunauyeni.
Hidede amine Iya Kaiwabu gagahe.
13 Mena yana veyao givewagana veyao ivaguna faꞋina, yana veyao nagona gikivetuwaina ada ana vehimeya gihavaina be gisena. Ada gavadi gavadi tuwaina, medema ana faiwala havahavaina be tova kabisona ginayawowola. Yel 31:31-34 1Yn 2:27