1 Kanan Diyos en Moses, 2 “Ibagam sin am-in ay Israelita, ‘Naey da di tinodingan Diyos ay fiesta ay say masinopan ya pandaydayawan yo en sisya.’ ”

3 “ ‘Mabalin ay man-obla kayo si enem ay agew, ngem nemnemnemen yo ay sin maikapito ay agew, maga di man-obla, tan din agew ay nay et naitoding para en Diyos. Isonga olay mo into di kad-an yo, siya na di agew ay pan-ibbayan yo ya say masinopan yo ay mandayaw en Diyos.’ ”

4 “ ‘Naey da din nasantoan ay fiesta ay inbilin Diyos, et say masinopan yo ay mandayaw en sisya sin kostokosto ay agew ay tinodingana. 5 Din fiesta ay makwani en Nalabas et manlogi sin kadiposan di agew sin pitsa 14 sin damo ay bowan,* Natken di kalindaryon di Judio. Mo layden ay ammoan di maitompongan dana ay fiesta sin kalindaryo tako, ilaen di maipanggep si fiesta sin glosario sin likod di libro ay nay. 6 et mo pay ta sin pitsa 15 et siya abe di panlogian di fiesta ay makwani en Tinapay ay Magay Labadura na. Manlogis na ay agew et adi kayo mangmangan si tinapay ay wada di labadura na si pito ay agew. 7 Maga abe di en mangamag sin obla na sin damo ay agew sin pito ay agew ay doy mo adi et masinop kayo ay mandaydayaw. 8 Siya abe ay sin pito ay agew ay doy, inag-agew ay man-idaton kayo si mapooan para en Diyos. Mo sin maikapito ay agew abe, adi yon amagen di obla yo mo adi et masinop kayo kasin ta mandaydayaw kayo.

9-10 “ ‘Et mo wada kayo sin ili ay idawat ko en dakayo, iey yo sin padi din omona ay tan-ay mo man-ani kayo. 11 Itan-ang na ay mangidaton en Diyos ta say awaten Diyos si dakayo. Amagen din padi na sin kabigatan di agew ay pan-ibbayan. 12 Sin iso na met laeng ay agew, omiey kayo sin padi si bomaro ay karnero ay esa di tawena ya magay kolang na ta pooana ay mangidaton en Diyos. 13 Tapian yo abe din daton ay iey yo en sisya si dowa ay kilo ay arina ay malaokan si mantikan di olivo. Mo mapooan dana ay daton, mansengseng-ew ay panlaydan en Diyos. Pakoyogan yo din daton ay nay si esay litro ay arak. 14 Et mo pay ta adi yo pay laeng inikdeng dadi, adi kayon mangmangan sin kaan-ani yo olay mo maata, naiilog ono naoto si tinapay. Olay intoy ili ay kad-an yo, masapol ay tongpalen yo ya siya abe din poli yo si eng-enggana.’ ”

15 “ ‘Manlogi sin agew ay pangidatonan yo sin omona ay nasingay ay apit yo, manbilang kayo si opatapolo ya siyam ay agew. 16 Et mo sin maikalimapolo ay agew ay say kabigatan di maikapito ay agew ay pan-ibbayan, man-idaton kayo en Diyos si tinapay ay inoto yo sin baro ay apit yo.† Din omona ay nasingay ay apit da ay maibagbaga sin v.15 ya siya abe sin v.10-11 et tapin di inani da ay sabog. Mo emey di pito ay dominggo, siya abe di pinag-aani si bakakew. 17 Dowa ay tinapay ay naoto si sagdodowa ay kilo ay arina di iey yo sin padi ta itan-ang na ay mangidaton. 18 Wada abe di datdaton ay mapooan ay itapi yo sin doy ay tinapay. Din maitapi et pito ay lalaki ay karnero ay magay kolang da ay sag-eesay tawen da, esa abe ay bomaro ay baka ya dowa ay bomaro ay karnero, pati din makidaton ay makan ya arak. Mapooan am-in dana ta mansengseng-ew ay panlaylaydan Diyos. 19 Masapol abe ay man-idaton kayos esa ay lalaki ay kalding ay manglinis si basol yo ya dowa ay lalaki ay karnero ay saes-a di tawena ay say pan-ookoban yo ya makikadkadwaan yo en Diyos.‡ Din kalasin di daton ay say makikadkadwaan da en Diyos et nakikan din akin oka ay nangiali ya din padi ay nangidaton. 20 Din nay dowa ay karnero et pakitan-ang di padi sin tinapay ay say nasantoan ay maidaton en Diyos para sin papadi. 21 Sin doy met laeng ay agew, adi yo amagen di obla yo mo adi et masinop kayo ay mandaydayaw. Sinay ay bilin et masapol ay tongpalen yo ya siya abe din poli yo si eng-enggana, olay mo into di panbebeeyan yo.

22 “ ‘Mo man-ani kayo sin payew yo, adi yo palaloan ay anien din wadas benget na ya sageyen di labsan yo. Bay-an yo ta waday okan di nabiteg ya mangili. Tongpalen yo na tan sak-en si Yahweh ay Diyos yo.’ ”

23-24 “ ‘Din omona ay agew sin maikapito ay bowan§ Din maikapito ay bowan et Septembre-Octobre sin kalindaryo tako. et nabanol ay agew ay pan-ibbayan yo. Mo dengngen yo di tanggoyob, masinop kayo ay mandayaw. 25 Adi yon amagen di obla yo, mo adi et en kayo man-idaton si mapooan para en Diyos.’ ”

26-27 “ ‘Mo manpitsa 10 sin maikapito ay bowan, siya na di agew ay malinisan di basbasol di ipogaw. Sin siya di ay agew, adi kayo mangan, mo adi et masinop kayo ay mandayaw ya man-idaton si mapooan para en Diyos. 28 Adi kayo aben man-obla sin agew ay nay, tan siya na ay agew di kalinisan di basol yo sin sangoanan Yahweh ay Diyos yo. 29 Mo sino ay Israelita di mangan si kompormi sin isna ay agew et maipowira sin iib-a na ay ipogaw en Diyos, 30 et mo sino abe di man-obla, si Diyos ay mismo di manosa en sisya ta matey. 31 Masapol ay tongpalen yo na ay bilin ya siya abe din poli yo si eng-enggana, olay mo intoy ili ay kad-an yo. 32 Manlogi sin kadiposan di agew sin pitsa 9 enggana sin kabigatana ay kadiposan aben di agew, ibilang yo ay nabanol na ay agew ay pan-ibbayan ya adi yo abe panganan si olay sino.’ ”

33-43 “ ‘Mo makdeng ay man-ani kayo, silibraren yo din fiesta ay makwani en Ab-abong ay pandaydayawan yo en Diyos. Pito ay agew di kabayag na ay manlogi sin maikasinpo ya lima ay agew di maikapito ay bowan. Sin damo ay agew, adi yo amagen di obla yo, mo adi et masinop kayo ay mandayaw. Man-a kayo si kamayatan ay prutas, tobon di palma, pangan di masaybog ay kaiw, ya napintas ay molmola ay gomabay sin kad-an di ginawang, et ilogi yo ay mansilibrar sin fiesta. Inagew ay man-idaton kayo si mapooan para en Diyos si pito ay agew. Et mo pay ta sin maikawao ay agew, masinop kayo ay mandaydayaw kasin ya man-idaton kayo abe si mapooan. Adi yo amagen di obla yo sin agew ay nay. Masapol abe ay man-iyan kayo am-in ay Israelita sin amagen yo ay ab-abong sin nay pito ay agew ta say maammoan di poli yo ay nanbebeeyen Diyos din aap-o da si ab-abong sin nangibelaana en daida ed Egipto. Tongpalen yo na ay bilin ya siya abe din poli yo si eng-enggana. Siya na di kanan Yahweh ay Diyos yo.

“ ‘Si da doy ngarud din nasantoan ay fiesta ay masapol ay tongpalen yo. Nabanol dadi ay masinsinopan ya pandaydayawan yo panggep si pan-idatonan si makan, apit, arak, daton ay mapooan, ya odom ay daton para en Diyos sin kosto ay agew ay maibagayan da. Maitapi dadi ay fiesta sin agew ay pan-ibbayan, et di maitapi abe sin datdaton yo ay doy et din sigod pay dedan ay idatdaton yo ay mapos nemnem yo ya din inkari yo ay datdaton en Diyos.’ ”

44 Siya dadi din bilbilin ay inbagan Moses sin Israelita ay maipanggep sin amin ay nasantoan ay fiesta ay pandayawan da en Diyos.