1 Din nainayad ay songbat et sebsebana di bonget, ngem din nasakit ay kali et sepsepena.

2 Din kalin di masirib et paragsaken da di man-adal, ngem din kalin di naong-ong et magay kowinta na.

3 Iilaen Diyos di amin ay lugar, et iilaena amin ay mangamag si siged ya lawa.

4 Din nainayad ay kali et maiarig si kaiw ay mangidawat si biyag, ngem din sinisikap ay kali et palalo ay pansakitenay nemnem.

5 Lasoyen di naong-ong din pamagbagan ama na, ngem din nanemneman et onodana di pamagbaga.

6 Din nalinteg et bomaknang da, ngem din lagbo ay gon-oden di lawa di nemnem da et makadadael.

7 Mangidawat si laing din kalin di masirib, ngem din nemnem di naong-ong et magay silbi na.

8 Sigsigaan Diyos din daton di laway nemnem na, ngem maragsakan sin kararag di nalinteg.

9 Kaliliget Diyos din am-amagen di laway nemnem na, ngem laylaydena din mangipapasnek ay mangonod si nalinteg ay panagbiyag.

10 Madagsen di dosan di mangamag si baken kosto. Matey abe din manigaan si pamagbaga.

11 Mo si Diyos yan kabaelana ay ilaen di am-in sin kad-an di natey, sigurado ay ammo na di nemnem tako.

12 Din makalasoy yan sigaana ay mabagbagaan. Polos ay adi manpaitdo sin masirib.

13 Maila sin ropan di ipogaw mo naragsak. Mo manladladingit, palalo abe ay madismaya.

14 Din masirib yan laydena ay man-adal, ngem din magay nemnem na yan nemnemena di magay silbi na.

15 Innagew ay naligat di biyag di kaseseg-ang, ngem din naragsak ay ipogaw et kanayon ay gan-ganasena di biyag na.

16 Maymayat di kasasaad di nabiteg ay mangipatpateg en Diyos mo din palalo ay baknang ay ad-adoy pandandanagana.

17 Maymayat di mansida si nateng ay waday layad mo din mansida si kam-isan ay karni ay waday liget sin nemnem.

18 Din makabonget yan pawadaena di ibaw, ngem din naanos yan pawadaena di kapya.

19 Ad-adoy ligat sin biyag di nasadot olay intoy em-emeyana, ngem din nalinteg yan magay problima ay domteng sin biyag na.

20 Paragsaken di nanemneman ay anak din akin anak en sisya. Din naong-ong anggoy di manglasoy sin napoana.

21 Maragsakan din magay nemnem na sin magay silbi na ay inoong-ong, ngem din masirib yan say amagena din kosto.

22 Magay pantongpalan di plano mo magay kosto ay pamagbaga, ngem matongpal da mo ad-adoy mamagbaga.

23 Palalo ay omiparagsak din kosto ay kali sin kosto ay timpo.

24 Say pandanan di masirib din danan ay manturong si biyag ay baken din danan ay manturong si pese.

25 Dadaelen Diyos din beey di mangipapangato si nemnem da, ngem salaknibana din sanikwan di nalasang.

26 Kaliliget Diyos din nemnem di managbasol, ngem malaydan sin kalin di nalinis di nemnem na.

27 Din mangamgam si kinabaknang yan pawadaena di problima sin pamilya na, ngem matago di manigaan si pasoksok.

28 Din nalinteg et nemnemenas kosto di ibaga na, ngem din managbasol yan mankali si lawa ay adi na nemnemen.

29 Patgan Diyos din kararag di nalinteg, ngem adi na ikaskaso din kararag di managbasol.

30 Omiparagsak di manlamiing ay ipogaw yan omipasim-et di siged ay damag.

31 Maibilang di ipogaw ay masirib mo dengngena di kosto ay pamagbaga.

32 Din adi kaitdoan et palpaligatena di awak na, ngem din mannge si pamagbaga et lomaing.

33 Din panangipateg di ipogaw en Diyos yan say somiribana. Masapol ay manpakombaba di ipogaw asi maidayaw.