1 Manplano di ipogaw, ngem si Diyos di mangiturong si ibaga na.

2 Kaman kosto sin pannemnem di ipogaw din am-in ay am-amagen da, ngem si Diyos di akin ammo si panggep da.

3 Mo italek mo din planom en Diyos et matongpal da.

4 Waday planon Diyos sin am-in ay inamag na. Din inkeddeng na ay pantongpalan di ipogaw ay lawa di nemnem na et madosa da.

5 Kaliliget Diyos am-in din mangipapangato si awak da. Sigurado ay dosaenas daida.

6 Mapakawan di basol di ipogaw mo napodno di layad na ya komakaman ay matalek. Mo egyatan ya patgen di ipogaw si Diyos, addawiana di panbasolana.

7 Mo mapnek si Diyos si esa ay ipogaw, iturong na din nemnem di kaibaw din ipogaw ay sana ay makikapya en sisya.

8 Maymayat di nabiteg ay kosto di ogali na mo din baknang ay makasowitik.

9 Manplano di ipogaw, ngem si Diyos di mangiturong en sisya.

10 Adi mankamali di ari si ikeddeng na, tan si Diyos di mangipanemnem.

11 Say layden Diyos di kostokosto ay timbangan ya salopan.

12 Napigsa di turay di ari mo nalinteg da, isonga sigaan da din lawa.

13 Say layden ya patgen da din mangibaga si tet-ewa.

14 Mo bomonget din ari, mabalin ay ipapse daka, isonga mo masirib ka, anapem di iyat mo ta mabaew din bonget na.

15 Mo naragsak din ari ya malaydan en sik-a, seg-angan daka et mabalin ay say katagoam.

16 Addawi ay nabanbanol di sirib ya panang-awat mo balitok ya palata.

17 Addawian din nalinteg di lawa. Estena din ogali na et say salaknibanan biyag na.

18 Din pantongpalan di mangipapangatos nemnem na et din kadadaelana.

19 Maymayat di maitapis nabiteg ay napakombaba mo din makibingay si kinabaknang ay pinnos di ipogaw ay mangipapangatos nemnem na.

20 Mayat di pantongpalan di ipogaw ay mangonod si mait-itdo en sisya. Din mantalek en Diyos yan naragsak.

21 Mo kosto di iyat mo ay mangikeddeng et say kailaan di kinasirib mo. Mo mayat di iyat mo ay mankali, ad-ado di maitdoan.

22 Din kinasirib yan maiarig si obbog ay mangidawat si biyag, ngem din kinaong-ong di ipogaw di mangidawat si kadosaana.

23 Din masirib yan naannad ya makaawis di iyat na ay mankali.

24 Din mayat ay kali yan kaman anig ay mam-is ya mangipasalon-at.

25 Mo mamingsan, waday kaman mayat sin pangilan di ipogaw, ngem din pantongpalana et din kateyana.

26 Gapo sin layad di ipogaw ay mangan, gomaget ay man-obla.

27 Din ipogaw ay magay silbi na yan say nemnemnemen da di panproblimaan. Pati din kali da yan domadael ay kaman manbidbidang ay apoy.

28 Lawa di mantayoktok, tan din apat yan pawadaena di ibaw ya dadaelena di panaggagayyem.

29 Din makedse ay ipogaw yan solisogena din iib-a na, tan awisena ay man-amag si lawa.

30 Din ipogaw ay manginenengneng ono mangililid-is en sik-a yan waday lawa ay panggep na.

31 Din ando ay biyag et gon-gonan di nalinteg ay ipogaw, isonga kaman dan korona din oban da.

32 Maymayat di naanos ay ipogaw ay kabaelana ay mangitpe si bonget na mo din nalaing ay makigobat ay makabael ay mangabak si esa ay siyodad.

33 Manbobonot di ipogaw, ngem si Diyos di mangikeddeng si mapasamak.