1 A umana bul, avat a ongo ta ra varvateten kai tama i vavat,

Ma avat a nuk pa ia upi na kapa ra nuknuk i vavat tana;

2 Tago iau tul tar a bo na minatoto ta vavat;

Koko avat a vana irai kan kaugu tinata na vartovo.

3 Tago lua iau ga bul, ma iau ga ki pire tamagu,

Iau a gobolina ma ra kavakake ta ra luaina mat i nagu.

4 Ma i ga tovo iau, ma i ga biti tagu dari:

Boina ba ra balam na kodop vake kaugu tinata;

Una mur kaugu lavur vartuluai, ma una laun;

5 Koko una valubane ra tinata na ngiegu, ma koko una tapgaga kan ia.

Una ongor upi ra kabinana, una ongor upi ra kapa na ninunuk;

6 Koko una vana kan ia, ma na vaale bat u;

Una manane, ma na balaure bat u.

7 A kabinana i lia; io, una ongor upi ra kabinana;

Maia, una tul tar kaum lavur tabarikik par upi kaum ra kapa na ninunuk.

8 Una pite vangala pa ia. ma na vatavua u;

Ba u kapupi ia, na vuna ta ra variru piram.

9 Na vatoke tar ra mari na vipuar ta ra ulum,

Ma na mar u ma ra potar na kere.

10 Ea, natugu, una valongore, ma una kapupi kaugu lavur tinata,

Upi na peal kaum kilakilala na nilaun.

11 Iau tar tovo u ta ra nga na kabinana;

Iau tar agure pa u ta ra dovot na nga.

12 Ma ba u vanavana pa ta magit na tur bat ra kakim,

Ma ba u vutvut pa una tutukai.

13 Una vatur vadekdek vake ra varvateten; koko ana vung vue;

Una balaure vake, tago una lalaun tana.

14 Koko una mur ra nga kai ra bilak na tarai,

Ma koko una vanavana ta ra nga kai ra umana tena varpiam.

15 Una tur irai kan ia, koko una vana tana;

Una tur ar, ma una vana pakit ia.

16 Tago pa dia va mat, ona pa dia ga pait value ra varpiam;

Ma ra nidiop pa i tadav diat, ona pa dia ga vabura value ta tikai.

17 Tago dia en ra magit di ga long ia,

Ma dia mome ra polo na vain ba dia ga ra pa ia.

18 Ma ga ra nga kai ra tena takodo i da ra kapa i pupua,

Ma i manga kapa vanavana upi na keake tuna boko.

19 A nga kai ra umana tena varpiam i da ra bingnimuna;

Pa dia nunure ra magit dia tutukai tana.

20 Natugu, una nuk pa kaugu tinata;

A talingam na valongore kaugu lavur varvai.

21 Koko una lingan kan diat;

Una kodop vake diat ta ra balam iat.

22 Tago diat dia tikan tadav diat dia laun tana,

Ma ra paka i diat par i lagar tana.

23 Una mono bat tuna ra balam;

Tago ra nilaun i arikai tana.

24 Koko una vatang ra tinata i vaongo,

Ma koko una pukue vagege ra varvai.

25 A matam na gigira uro na lua ka,

Ma ra pilpil na matam na gigira takodo ko.

26 Una nuk bulu pa ra nga ure ra kaum,

Ma una kure mal kaum lavur nga.

27 Koko una tapgaga ta ra papar a lima tuna ba ta ra papar a maira;

Una tak vakari vue ra kaum kan ra varpiam.