1 Natugu, una nuk pa kaugu kabinana,

Ma ra talingam na valongore kaugu minatoto;

2 Upi una vatur vake ra bo na varbalaurai,

Ma upi a kabinana na ki ta ra ngiem.

3 Tago ra bul na ngie i ra enana vavina i vatua ra polo na livur,

Ma ra ngiene i duladula ta dir ma ra dangi;

4 Ma namur i mapak da ra kaumal,

Ma i mangi vartalai da ra pakat na vinarubu.

5 A ura kauna dir vutvut upi ra vinirua,

Ma i ruarua ra ruarua na tulungen;

6 Pa i nuk bulu pa ra nga na nilaun;

Kana lavur mangamangana pa dia tur bulu, ma pa i kapa.

7 Io, a umana bul, avat a valongore iau,

Ma koko avat a vana kan ra tinata na ngiegu.

8 Boina ba kaum nga na tur vailik kan ia,

Ma koko una vana maravai ra matakilalat i ra kubana;

9 Kan una tul tar kaum minamar ta ra umana enana,

Ma kaum nilaun ta ra tena varvakadik;

10 Kan a umana vaira diat a maur ma kaum peal magit,

Ma na tup u ra papalum ta ra kuba i ra enana;

11 Ma ta ra mutuaim una riri,

Ba i palaur ra pakam ma ra viom,

12 Ma una ga biti dari: Iau ga milikuane ra varvateten,

Ma ra balagu i ga pidimuane ra varpit!

13 Ma pa iau ga torom ta ra nilai kaugu umana tena vartovo,

Ma pa iau ga valongore ra tinata kai kaugu umana tena varvair.

14 I ga maravai ba ina kaina kakit

Livuan ta ra kivung kai ra tarai na lotu.

15 Una mome ra tava ta kaum tung na tava iat,

Ma ra tava ba i alir rikai ta kaum kivu.

16 Ta ra ava kaum lavur mata na tava diat a talingir vurvurbit,

Ma ra umana tava alir diat a alir ta ra lavur pal a nga?

17 Boina ba kaum uka diat,

Ma koko kamumur ma ra vaira piram.

18 Boina ba kaum mata na tava na ti doan;

Ma una gugu ta kaum taulai nina amur taulai me ba u barmana boko.

19 Na da ra potar na me ma ra vakak na vavaguai piram;

Boina una gugu vatikai ta ra iuiuna,

Ma una ga vatikai ta kana varmari.

20 Natugu, ta ra ava una rara ma ra enana vavina,

Ma amur a varkabait ma ra enana?

21 Tago ra lavur mangamangana kai ra tutana dia kapa ta ra mata i ra Luluai,

Ma i nuk bulu pa kana lavur nga.

22 Ra lavur nirara iat kai ra tena varpiam diat a vi vake,

Ma na vavakai ta ra vinau na varpiam kana iat.

23 Na virua tago pa i ga vartovo,

Ma na vana rara tago i lunga tuna.