1 Ala kava nene, huꞌna, muki vayaꞌaiteꞌmo yagaika neꞌapatana vekae. Nagaemo maiꞌnanatega mono nokaeꞌmo lusi kava huno neꞌnahaiye. 2 Nokafiꞌmo maisuva yafeꞌmo lusi kava huno naipamoꞌmo nehaiye. Muki nagufamoꞌe naipa nagesafatiꞌeꞌmo afaꞌa neꞌmaiya Gotifekeꞌmo nehaiye. 3 Aise nama anagaꞌmogi apanoꞌmo kiteꞌa maiꞌnageꞌapaeꞌmo kisaveꞌyavemogi apanoꞌmo haneꞌnigeꞌa apamuꞌmo maleteꞌa aiꞌa apalo atiteꞌa neꞌyagaiye. Nokafiꞌmo neꞌmaiyaꞌmonanafa muki vayaꞌaiteꞌmo yagaika neꞌapatana vekae, huꞌna, kini vekaꞌnimo Gotiꞌnimogae, huꞌna, nokafiꞌmo oꞌmaiꞌneꞌna ofalinimo kamisuva hiꞌyalamukaleꞌmo ofalinimo nehaya hiꞌyalamukaleꞌe hiꞌyalamukaleꞌefeꞌmo nagesamo neꞌafuve. 4 Nokafiꞌmo maiꞌneꞌa yokemo huꞌa kagikaleꞌmo aliꞌa asaga nehaya vayaꞌmogi kaulagaleꞌmo alagepa huꞌa maiꞌnayanageꞌa afaꞌa apamogaga aigae.

5 Lokiyaꞌapimo kagaetegatiꞌmo aliꞌnisaya vayaꞌmogimo kaulagaleꞌmo alagepa huꞌa maiꞌnayanageꞌa apamogaga aigae. Kagaetegamo visaya apaipamo nekaliye. 6 Kaꞌmo umenitata nehuꞌapaeꞌmo aniꞌmo leno laneꞌniya kalokalopafiꞌmo apaunumo uno nelamigeꞌa umenitata nehuꞌapaeꞌmo kelimo kafi maleꞌnageno koꞌmo aiteno aniꞌmo maleno havai teꞌnigeꞌa neꞌnae. 7 Lokiya vaime vaime uꞌa magoꞌe huꞌa lokiya vaiꞌa uꞌa aigofe gotiꞌapimogimo aeno apakaseꞌniya Gotitegamo Saiyoni kotegamo agegae.

8 Muki vayaꞌaiteꞌmo yagaika neꞌapatana vekae, huꞌna, nunumu nehuvanagi geꞌnimo afiyo. Yekopu Gotiꞌamogae, huꞌna, afiyo. 9 O Gotiyo, halegutimogae, huꞌna, ago. Lekana paika ateꞌnana vekamo augosafiꞌmo ago. 10 Mago alagepa haopalegamo uꞌna yatala afinaꞌmo maisuvana namogaga aiguvaꞌmonanafa nokafiꞌmo aise afinaꞌmo maisuvana magoꞌe huꞌna namogaga aiguve. Nagaemo Gotiꞌnimo noꞌafiꞌmo afa ina agufa vekamo kipateꞌmo neꞌyagauva vekamo maisuvafeꞌmo nahauꞌniyaꞌmonanafa hosu vayaꞌai noꞌapifiꞌmo haiꞌna maisuvafeꞌmo oꞌnahauꞌniye. 11 Ala kava netimoꞌa yegetiꞌe halegutiꞌeꞌmo maiꞌniye. Agaemo ala apakiꞌapimo apamiteno alagepa yaꞌmo fiku hapa maeno apamigiye. Agaemo api kavaꞌmo nehaya vayaꞌaifeꞌmo magoke alagepa yaꞌmo magokeꞌageꞌmo aliꞌna lapamiguve huno osugifa muki alagepa yaꞌamo afaꞌa alino apamigiye. 12 Muki vayaꞌaiteꞌmo yagaika neꞌapatana vekae, huꞌna, Kagaefekeꞌmo, laha maegaiye, huꞌa apakesamo neꞌafiya vayaꞌmogi kaulagaleꞌmo alagepa huꞌa maiꞌnayanageꞌa afaꞌa apamogagamo aigae.