102
Genembo Seka Bajari Kae Bu Irise Kae Saviri Banungusira.
1 Arie Bajari, nanda banungari ningaetesi, sonemba dae sorara erena, ningi!
2 Na kae budo irise resena erá ningi ningaego eóse!
Na nanjigo nimokena kori sarena, dengoro jave ningaso dae resena!
3 Ai resira amo, nanda jebuga kau imbosi aminga ava rave ise dadabari gerira.
Nanda tamo kau avarakai veri vara gheraira, amingori.
4 God na detiri taká, kau eke gharasa e muse vosari guse rojari beká erena. Na bayau mindari jo uju ae erena.
5 Na kae saviri aoro sise, gevei etu yavarara gerena.
6 Namoako kau rika reighi uvu a evetu genembo irae vasada irari gerena.
Kau rika kafu reighi do dumboro notuda irari gerena.
7 Na itako jo avae eraena, namoa kau rika dabako tainako aimi nati enoda anumbirari gerena.
8 Sifo inono evia isonga numboro nandae osogo ari kakato namoa dere jise,
namokena geka ekoko mendeni mendeni sesegeraera.
Dere jirari kakato amo simboro use eminge seraera, “Mave embavo jighiri nunda kae dika etiri,
kae saviri aoro sise irira, aminga ava namondeda kae dika aeti!”
9-10 Ainda susu mo, nandae janje ekoko edo na esike fugeteso,
na bayau avegha ava rise, a nanda uvu diti jivughae baingoro ururari ava rise irena.
11 Nanda jebuga kau ungobu use tutumbageraira amingori. Namoa kau kikisa gharasa ari gerena.
12 Avata, arie Bajari, kini (king) kotofuko mo nimori, evovodae iresa.
Evetu genembo ghaeko ghaeko evia siroruse irarera aimi ninda binó nininguse irarera.
13 Nine sifo gategusesa ava ojighira buvira aindae, ni orokoé foa tuturo edo Saion* Afige, geka eni Saion dae gefusera, tuturo 2:6 duruda tege, garesa! dae joka aresa.
14 Ai resira amo, reighié gitofuimi sosighi edo de bejisera,
avata ninda saramana kakato ava jo kotae irise, Saion dubo buraera.
De bejetero tise fasirira gido, ninda saramana kakato mema use irá gheraera.
15 Bajari, endada oro oro isambu ninda duró gido ungo ata dadadagharira.
Enda da kini isambu ninda dombuda ojuimi ungo ata dadadagharera.
16 Ainda tuka mo, Bajari nu sekago Saion itarira.
Nu sifo aminda ari ainda duró isagha ururari garera.
17 Nunda natofo imboe e fugetiri yabayaba ghuse irera, ainda banungari ava jave ningarira.
18 Bajari rea ari dae erira ava gosuse, gembovo, evetu genembo sifo amboda sirorudo yarera aimi,
tege nundae sakai sise irore!
19 Eminge sevu ningore, “Bajari nunda irari vasa kakarago iká beká utudaghe nunda natofo gari dae diti fugetiri vovosusira amo,
20 nunda natofo Israel embo ava gitofui kateyavara ero, sabua use ambari da aoro sero niningusira.
O gotofuimi daoro amboro dae sisera, ava nune vujegetiri jejebuguseri.”
21-22 Amingari, natofo nanjogo averege foa Jerusalem tafaroro kamboda teteruroro,
enda da babojegari gavana mane isasambu ainde dabade teredo,
Saion aminda tumonde bainghuse, Bajari da javoda sakai sise irarera.
23 Na endada jo ghousago irae aono dae sedo, Bajariimi nanda fakina de bejedo, nanda sifo soroda gafugusira.
24 Avata na sorara use, numokena siseni, “Arie nanda Bajari God evovodae iresa, nimokena kori resena:
erá eoso na genembo seka irise ambeone!
25 Anakora beká giti tuturoda ni enda edo, utu ninda ghabui eteso sirorusira.
26 Nemo manjarera, o nimo, tano tefori, evovodae iresa.
Ne taká kau embo boka manai edo bununungheraera aminga ava, aoro gaghe fugaresa.
Kau genembo eni nunda asugari manai kosughe fugutuse, seka asugeraira aminga ava aresa.
27 O nimo jo genembako ae, taká ava iresa. Nimokena tano tefori, evovodae iresa.
28 Kotugo ninda totofo Israel embo da imemesiri gamemisiri mo, kaifa e gagara ururaso,
nimokena ambo sose fetirise irarera.”