103
David Da Yaru Divari Eniri.
1 Arie, namoáko, nanda dubo jokáimi, Bajari kena sakai saone!
Arie, namoáko, nanda kotari a nanda fakina isambuimi, nunda javo kakara aindae sakai saone!
2 Arie, namoáko, nunda kavevera namokena eraira ava, isasambu kotise irarena.
Ava kotise, nanda dubo jokáimi, Bajari kena sakai saone!
3 Nu emingeraira. Nu nanda ari ekoko isasambu kote doyeraira.
Nu nanda kae a tamo vevera isasambu seari darigeari, na jebugeraena.
4 Na ambaetena, avata nune kosegedo na dubo ruruse nunda joka ariimi na afurugeari,
jebuga irá gheraena. 5 Roera eveva nune muteari, nanda irari eveva use irá gheraena.
Aminguse, na jovereghe genembo seka bajari da kaugo use, riduna da fakina aminga ava eraena.
6 Evetu genembo makasi embokena mema a bouvu muturaera ava, Bajari nune bekáda bekáda ijujuse, makasi emboá sonemberaira.
7 Nunda uju a kotari ava, Moses kena afigedo,
nunda ari fakinaghae, Israel embokena ijugeari gido ghuseri.
8 Bajari nu joka use, namonde dubo ruruse irá gheraira. Nu jo totoi janje eko ae eraira.
Nu sifo evia inono, namonde dubo bu gogoghomberaira. Nunda dubo bari amo, jo nanjigo aminda dadabae arira.
9 Nu jo sifo ghousa namonde dombuda sae eraira.
Janje eko nu eraira avata, jo evovodae ava kotise irae eraira.
10 Namondeda ari ekoko a dara eraera ava ijujuse, nu jo ainda mino beká ava inono use, mutae eraira.
Mino eko rea baetera avata, nu kote doyeraira.
11 Utu enda ikáda irira, ainda gomboi darari jo tege bari da kaugo iraeri.
Kotugo Bajari da dubo bari, mave nu kakara eraera aikena, amingori.
Jo namonde tege kasama ari da kaugo iraeri.
12 Utu gambari utu gambari soveni soveni da soró jo tege bari da kaugo iraeri.
Kotugo Bajari namonde da ari ekoko fugeraira ainda soró ghousa amingori.
Fugeari ya dadaberaira, jo tege bari da kaugo iraeri.
13 Kau genembo eni nunda sasingukena veka eveva eraira aminga ava,
God namonde mave nu kakara eraera aikena barago, veka eveva eraira.
14 Nu namonde kasama e gogoghomberaira.
Nu nange endaimi budo namonde etiri sirorusera ava, nu kotise irá gheraira.
15 Namonde evetu genembo da irari a jebuga mo, kau kikisa da kaugori.
Kau taima joka vitido, vuji gateraira aminga ava, namonde siroredo bajiraera.
16 Avata yauraimi fuseari, joka vuji dore vose dadabeari jo gae eraera.
17 Avata mave Bajari igheghi use tumonde baingheraera amo, nu sifo ghousa dubo buraira.
A kotugo, nenda sasingu a nenda imemesirikena
kavevera sifo ghousa eraira.
18 Nenda sasingu a imemesiri resena emo, na mave nunda emboroda ise,
nunda agho dari ningi kaifa eraera aindae resena.
Nunda kavevera ari, sifo ghousa nemokena muturaira.
19 Bajari nunda kini (king) da avo anumba durode utuda fitiri irira, aminda anumbirise, natofo a roera isambu ava, nune kaifa eraira.
20 Aneya fakina kakato, Bajari da geka a agho dari ningido eraeva, nemokena resena:
Bajari dae sakai sevu!
21 Utu da fakina isasambu, a kotugo, Bajari da saramana a aghi kakato nunda uju eraeva, nemokena resena:
Bajari dae sakai sevu!
22 Evetu genembo, sifo fuka, a roera isasambu, nune etiri siroruseva, nemokena resena.
Ne reda irise nunda kaifa ari itatameraeva aindae,
Bajari dae sakai sevu!
Na barago nanda dubo joká isambuimi Bajari kena saone!