1 Ḿpʋ́ɣʋ́ Tɑcɑɑ tɔmɑ Moisi sɩ: 2 Tɛlǝsɩ Ɩsɛɣɛlɩ nyǝ́mɑ sɩ ɩ́ pɑɑsǝnɑ nɑ ɩ́ wɔkɩ-m tɔɣɔnɑɣɑ kɔtɑsɩ nsi sɩ sɔɔsʋŋ mɑ cɑɑkɩ tɔɣɔ pǝ wɑɑtʋnɑɑ mpɑ mɑ sɩɩwɑ tɔ. 3 Pɑɑ ɩfemle nte ɩ́ kɑ́ lɑ Tɑcɑɑ mɑɣɑ kɔtɑɣɑ ŋkɑ kɔkɔ lusɑ kɑ tǝnɑ tɔɣɔ. Ɩlɛ pǝnɑɣɑ kʋlʋmɑɣɑ ɩwɛɛsɩ nsi sɩ tiili tɑ cɑɑmɩ tɔɣɔ ɩ́ kɑ́ lɑ-m kɔtɑɣɑ ŋkɛ. Nɑ pǝ́ wɛɛ ḿpʋ́ɣʋ́ tɑm tɔɔ. 4 Lɛŋkɑ kɛ tɑnɑŋ, nɑ lɛŋkɑ kɛ tɑɑnɑɣɑ. 5 Nɑ pǝ́ sɔɔsǝnɑ mʋlʋm kiloonɑɑ tooso, wei pɑ nuɣutinɑ Olifi nim liitili kʋlʋm nɑ titite tɔ. 6 Kɔtɑɣɑ ŋkɛɣɛ ɩ́ kɑ́ tɛmɑ-m lɑpʋ kɛ Holɛpʋ pʋɣʋ tɔɔ. Kɑ sɔɔsʋŋ kɛ mɑ cɑɑkɩ. 7 Ɩlɛnɑ ɩ́ tǝnɩ tɑnɑŋ kɔtɑɣɑ ɩwǝyɑɣɑ tɔɔ kɛ sʋlʋm liitili kʋlʋm nɑ titite, nɑ ɩ́ liisi pǝlɛɣɛ cokǝle tɑɑ.

8 Ɩlɛnɑ ɩ́ lɑ tɑɑnɑɣɑ nyǝŋkɑ kɛ teitei ɩsɩɩ tɑnɑŋ tɛɛ nyǝŋkɑ. Sɔɔsʋŋ wei mɑ cɑɑkɩ tɔ ɩ kɔtɑɣɑ ŋkɑ kɔkɔ lusɑ kɑ tǝnɑ tɔɣɔlɛ.

9-10 Pǝnɑɣɑ kʋlʋmɑɣɑ ɩwɛɛsɩ nɑɑlɛ nsi sɩ tiili tɑ́ cɑɑmɩ tɔɣɔ ɩ́ kɑ́ lɑ kɔtɑɣɑ ŋkɛɣɛ kʋyɑkʋ kʋhɛɛsʋɣʋ wule, nɑ pǝ sʋlʋm nɑ mʋlʋm kiloonɑɑ nɑɑtoso, wei pɑ nuɣutinɑ nim tɔ. Nɑ pǝ́ sɔɔsǝnɑ pɑɑ kʋyɑkʋ ŋku kʋ nyǝŋkɑ.

11 Pɑɑ ɩsɔtʋ wei ɩ kʋyɑkʋ kɑncɑɑlɑɣɑ nyǝŋkʋ ŋku, ɩ́ kɑ́ lɑ Tɑcɑɑ kɛ kɔtɑɣɑ ŋkɑ kɔkɔ lusɑ kɑ tǝnɑ tɔɣɔ lɑtǝcɛnɑɑ kʋfɑmɑ nɑɑlɛɣɛ, nɑ ɩwɑɑʋ kʋlʋmʋɣʋ, nɑ pǝnɑɣɑ kʋlʋmɑɣɑ ɩwɛɛsɩ nɑɑtosompɔɣɔlɑɣɑ nsi sɩ tilli tɑ́ cɑɑmɩ tɔ. 12 Ɩ́ kɑ́ sɔɔsɩ pɑɑ lɑtǝcɛ wei ɩ tɔɔ kɛ́ mʋlʋm mpi pɑ nuɣutinɑ nim tɔɣɔ kiloonɑɑ pɔɣɔlɑɣɑfɛɩ nɑɑnʋwɑ. Nɑ kiloonɑɑ nɑɑtoso kɛ pɑɑ ɩwɑɑʋ ŋku kʋ tɔɔ. 13 Nɑ kiloonɑɑ toosoɣo pɑɑ ɩwǝyɑɣɑ ŋkɑ kɑ tɔɔ. Kɔtɑɣɑ ŋkɑ kɑ sɔɔsʋŋ mɑ cɑɑkɩ tɔɣɔlɛ. 14 Pɑɑ lɑtǝcɛ wei ɩ tɔɔ kɛ́ sʋlʋm liitilinɑɑ tooso, nɑ pɑɑ ɩwɑɑʋ ŋku kʋ tɔɔ kɛ sʋlʋm liitilinɑɑ nɑɑlɛ, nɑ pɑɑ ɩwǝyɑɣɑ ŋkɑ kɑ tɔɔ kɛ́ liitili kʋlʋm nɑ titite. Kɔtɑsɩ nsi ɩ́ kɑ́ lɑ pɑɑ pǝnɑɣɑ ŋkɑɣɑ ɩsɔtʋ kɑncɑɑlɑɣɑ kʋyɛɛŋ tɑɑ tɔɣɔlɛ. 15 Ɩlɛnɑ ɩ́ lɑ́ pǝŋtʋlʋɣʋ kɛ ɩsɑɣɑtʋ hɩɩsʋɣʋ kɔtɑɣɑ. Nɑ pǝ́ sɔɔsǝnɑ pɑɑ kʋyɑkʋ ŋku kʋ kɔtɑɣɑ nɑ pǝ sʋlʋm.

16 Ḿpʋ́ɣʋ́ Tɑcɑɑ tɑsɑɑ sɩ: Pɑɑ pǝnɑɣɑ kʋfɑlɑɣɑ ŋkɑ kɑ ɩsɔtʋ kɑncɑɑlɑɣɑ nyǝŋ, kʋyɛɛŋ nɑɑnʋwɑ nɑ liɣiti wule ɩ́ kɑ́ tɔɣɔ Tɛɛʋ ɑcimɑ nɑ mɑ hǝtɛ tɑɑ. 17 Ɩlɛnɑ ɩsɔtʋ kʋlʋm ɩnɩ ɩ kʋyɛɛŋ nɑɑnʋwɑ nɑ kɑkpɑsɩ wule ɩ́ tɔɣɔ kʋkʋsʋm fɛɩ kɑkɑlɑsɩ ɑcimɑ kɛ kʋyɛɛŋ nɑɑtosompɔɣɔlɑɣɑ. 18 Acimɑ ɑnɩ ɑ kʋyɑkʋ kɑncɑɑlɑɣɑ nyǝŋkʋ wule, Ɩsɔ sɛɛtʋ kɛ ɩ́ kɑ́ koti. Ɩ́ kɑɑ lɑ tǝmlɛ nɑtǝlɩ. 19 Ɩ́ kɑ́ lɑ kɔtɑɣɑ ŋkɑ kɔkɔ lusɑ kɑ tǝnɑ tɔɣɔ tɔlɑ wenɑ ɑ tiili tɑ́ cɑɑmɩ tɔ. Ɩsɩɩ lɑtǝcɛnɑɑ kʋfɑmɑ nɑɑlɛ, nɑ ɩwɑɑʋ nɑ pǝnɑɣɑ kʋlʋmɑɣɑ ɩwɛɛsɩ kɛ nɑɑtosompɔɣɔlɑɣɑ. 20 Ɩ́ kɑ́ tǝnɩ pɑɑ kpǝntɛ nte tǝ tɔɔ kɛ́ kɔtɑɣɑ mʋlʋm mpi pɑ nuɣutinɑ nim tɔ, pɑɑ lɑtǝcɛ kʋfɑlʋ wei ɩ tɔɔ kɛ́ kiloonɑɑ pɔɣɔlɑɣɑfɛɩ nɑɑnʋwɑ, nɑ kiloonɑɑ tooso kɛ́ pɑɑ ɩwɑɑʋ ŋku kʋ tɔɔ. 21 Nɑ ɩ́ tǝnɩ pɑɑ ɩwǝyɑɣɑ ŋkɑ kɑ tɔɔ kɛ́ kiloonɑɑ tooso. 22 Ɩlɛnɑ ɩ́ lɑ́ pǝŋtʋlʋɣʋ kɛ ɩsɑɣɑtʋ hɩɩsʋɣʋ kɔtɑɣɑ. Nɑ kɔtʋlʋ lɑ-mɛɣɛ pǝ kɔtɑɣɑ. 23 Kɔtɑsɩ nsɩ sɩ tǝnɑ sɩ sɔɔsǝɣǝnɑ pɑɑ tɑnɑŋ ŋku kʋ nyǝŋsɩ tɔɔ. 24 Acimɑ kʋyɛɛŋ nɑɑtosompɔɣɔlɑɣɑ tǝcu kɛ́ mɑɑ nɩɩ pɑɑ kʋyɑkʋ ŋku kʋ tɔɣɔnɑɣɑ nɑ sʋlʋm nɑ kɔtɑɣɑ ŋkɑ kɔkɔ lusɑ kɑ tǝnɑ tɔ kɑ sɔɔsʋŋ. 25 Mɑ sɛɛtʋ tike kɛ ɩ́ kɑ́ koti kʋyɑkʋ nɑɑtosompɔɣɔlɑɣɑ nyǝŋkʋ ŋkʋ kʋ wule. Ɩ́ kɑɑ lɑ tǝmlɛ nɑtǝlɩ.

26 Ḿpʋ́ɣʋ́ Moisi tɔmɑ sɩ: Pǝ tɑkɩ kʋmtʋ ɑcimɑ wule, ɩlɛnɑ ɩ́ kɔnɑ Tɑcɑɑ kɛ tɔɣɔnɑɣɑ kʋfɑlɑɣɑ kɔtɑsɩ. Ɩ sɛɛtʋ tike kɛ ɩ́ kɑ́ koti kʋyɑkʋ ŋkʋ kʋ wule. Ɩ́ kɑɑ lɑ tǝmlɛ nɑtǝlɩ. 27 Ɩ́ kɑ́ lɑ Tɑcɑɑ kɛ kɔtɑɣɑ ŋkɑ kɔkɔ lusɑ kɑ tǝnɑ nɑ ɩ́ cɑɑkɩ kɑ sɔɔsʋŋ tɔɣɔ lɑtǝcɛnɑɑ kʋfɑmɑ nɑɑlɛ, nɑ ɩwɑɑʋ nɑ pǝnɑɣɑ kʋlʋmɑɣɑ ɩwɛɛsɩ nɑɑtosompɔɣɔlɑɣɑ. 28-29 Nɑ ɩ́ tǝnɩ pɑɑ kɔtɑɣɑ ŋkɑ kɑ tɔɔ kɛ́ tɔɣɔnɑɣɑ kɔtɑɣɑ, ɩsɩɩ pɑɑ ɩsɔtʋ wei ɩ kʋyɑkʋ kɑncɑɑlɑɣɑ nyǝŋkʋ nyǝŋkɑ. 30 Ɩlɛnɑ ɩ́ lɑ́ pǝŋtʋlʋɣʋ kɛ kɔtɑɣɑ, nɑ pɑ́ lɑ-mɛɣɛ ɩsɑɣɑtʋ hɩɩsʋɣʋ kɔtɑɣɑ. 31 Kɔtɑsɩ sǝnɛ sɩ tǝnɑɣɑ ɩ́ sɔɔsǝɣɩ pɑɑ kʋyɑkʋ ŋku kʋ nyǝŋkɑ tɔɔ, nɑ pǝ tɔɣɔnɑɣɑ, nɑ pǝ sʋlʋm. Pǝ wɛɛ sɩ tɔlɑ nnɑ ɑ tiili tɑ́ cɑɑmɩ tɔɣɔ ɩ́ lɑkɩ kɔtɑsɩ.