1 Ḿpʋ́ɣʋ́ Moisi tɔmɑ sɩ: Tɑcɑɑ sɛɛtʋ tike kɛ ɩ́ kɑ́ koti ɩsɔtʋ nɑɑtosompɔɣɔlɑɣɑ nyǝŋ kʋyɑkʋ kɑncɑɑlɑɣɑ nyǝŋkʋ wule. Ɩ́ kɑɑ lɑ tǝmlɛ nɑtǝlɩ. Nɑ pɩɩ lɑ-mɛɣɛ kɑwilitɑsɩ ɑcimɑ. 2 Ɩlɛnɑ ɩ́ lɑ́ Tɑcɑɑ kɛ kɔtɑsɩ nsi kɔkɔ lusɑ sɩ tǝnɑ tɔ, sɩ sɔɔsʋŋ nyǝnsɩ kɛ tɔlɑ wenɑ ɑ tiili tɑ́ cɑɑmɩ tɔ. Ɩsɩɩ lɑtǝcɛ kʋfɑlʋ kʋlʋm, nɑ ɩwɑɑʋ kʋlʋmʋɣʋ, nɑ pǝnɑɣɑ kʋlʋmɑɣɑ ɩwɛɛsɩ kɛ nɑɑtosompɔɣɔlɑɣɑ. 3 Ɩ́ kɑ́ sɔɔsɩ pɑɑ kpǝntɛ nte tǝ tɔɔ kɛ́ kɔtɑɣɑ mʋlʋm mpi pɑ nuɣutinɑ nim tɔ. Pɑɑ lɑtǝcɛ kʋfɑlʋ wei ɩ tɔɔ kɛ́ kiloonɑɑ pɔɣɔlɑɣɑfɛɩ nɑɑnʋwɑ, nɑ ɩwɑɑʋ tɔɔ kɛ́ kiloonɑɑ nɑɑtoso. 4 Nɑ ɩ́ tǝnɩ pɑɑ ɩwǝyɑɣɑ ŋkɑ kɑ tɔɔ kɛ́ kiloonɑɑ nɑɑtoso. 5 Nɑ ɩ́ lɑ́ Tɑcɑɑ kɛ pǝŋtʋlʋɣʋ kɛ ɩsɑɣɑtʋ hɩɩsʋɣʋ kɔtɑɣɑ, nɑ pɑ́ lɑ-mɛɣɛ pǝ kɔtɑɣɑ. 6 Ɩ́ kɑ́ sɔɔsɩ kɔtɑsɩ sǝnɛ sɩ tǝnɑɣɑ pɑɑ kʋyɑkʋ ŋku kʋ kɔtɑsɩ nsi kɔkɔ lusɑ sɩ tǝnɑ tɔ. Nɑ pɑɑ ɩsɔtʋ wei ɩ kʋyɑkʋ kɑncɑɑlɑɣɑ nyǝŋkʋ nyǝnsɩ nɑ pǝ sʋlʋm nɑ pǝ tɔɣɔnɑɣɑ nyǝnsɩ tɔɔ, ɩsɩɩ Tɑcɑɑ kɑ sɩɩʋ tɔ. Kɔtɑɣɑ ŋkɑ kɔkɔ lusɑ kɑ tǝnɑ nɑ Tɑcɑɑ cɑɑkɩ kɑ sɔɔsʋŋ tɔɣɔlɛ.

7 Ḿpʋ́ɣʋ́ Moisi tɑsɑɑ sɩ: Ɩsɔ sɛɛtʋ tike kɛ ɩ́ kɑ́ koti ɩsɔtʋ nɑɑtosompɔɣɔlɑɣɑ nyǝŋ kʋyɑkʋ nɑɑnʋwɑ nyǝŋkʋ wule, nɑ nɔhɔkʋtʋ. Tǝmlɛ nɑtǝlɩ tǝ fɛɩ lɑpʋ. 8 Nɑ ɩ́ lɑ́ kɔtɑɣɑ ŋkɑ kɔkɔ lusɑ kɑ tǝnɑ nɑ kɑ́ wɛnɑ sɔɔsʋŋ tɔɣɔ tɔlɑ wenɑ ɑ tiili tɑ́ cɑɑmɩ tɔ. Ɩsɩɩ lɑtǝcɛ kʋfɑlʋ nɑ ɩwɑɑʋ nɑ pǝnɑɣɑ kʋlʋmɑɣɑ ɩwɛɛsɩ nɑɑtosompɔɣɔlɑɣɑ. 9-10 Nɑ ɩ́ tǝnɩ pɑɑ kɔtɑɣɑ ŋkɑ kɑ tɔɔ kɛ́ tɔɣɔnɑɣɑ nyǝŋkɑ. Ɩsɩɩ pɑɑ ɩsɔtʋ wei ɩ kʋyɑkʋ kɑncɑɑlɑɣɑ nyǝŋkʋ nyǝŋkɑ. 11 Ɩlɛnɑ ɩ́ lɑ́ pǝŋtʋlʋɣʋ kɛ ɩsɑɣɑtʋ hɩɩsʋɣʋ kɔtɑɣɑ. Nɑ ɩ́ sɔɔsɩ lɛŋkʋ kɛ ɩsɑɣɑtʋ hɩɩsʋɣʋ kʋyɑkʋ sɔsɔɔŋkʋ nyǝŋkɑ. Nɑ pǝ́ kɑɑsɩ pɑɑ kʋyɑkʋ ŋku kʋ kɔkɔ nyǝnsɩ nɑ pǝ tɔɣɔnɑɣɑ nɑ pǝ sʋlʋm.

12 Ḿpʋ́ɣʋ́ Moisi tɑsɑɑ sɩ: Ɩsɔ sɛɛtʋ tike kɛ ɩ́ kɑ́ koti ɩsɔtʋ nɑɑtosompɔɣɔlɑɣɑ nyǝŋ kʋyɑkʋ nɑɑnʋwɑ nɑ kɑkpɑsɩ nyǝŋkʋ wule. Tǝmlɛ nɑtǝlɩ tǝ fɛɩ lɑpʋ. Nɑ ɩ́ tɔɣɔ Tɑcɑɑ ɑcimɑ kɛ kʋyɛɛŋ nɑɑtosompɔɣɔlɑɣɑ. 13 Ɩlɛnɑ ɩ́ lɑpɩ-ɩ tɔlɑ wenɑ pǝ tɑ cɑɑmɩ tɔɣɔ kɔtɑɣɑ ŋkɑ kɔkɔ lusɑ kɑ tǝnɑ nɑ kɑ wɛ sɔɔsʋŋ tɔɣɔ kʋyɑkʋ kɑncɑɑlɑɣɑ nyǝŋkʋ wule. Ɩsɩɩ lɑtǝcɛnɑɑ kʋfɑmɑ nɑɑnʋwɑ nɑ tooso, nɑ ɩwɑɑŋ nɑɑlɛ, nɑ pǝnɑɣɑ kʋlʋmɑɣɑ ɩwɛɛsɩ kɛ nɑɑnʋwɑ nɑ liɣiti. 14-15 Nɑ ɩ́ tǝnɩ pɑɑ kɔtɑɣɑ ŋkɑ kɑ tɔɔ kɛ́ tɔɣɔnɑɣɑ nyǝŋkɑ. 16 Ɩlɛnɑ ɩ́ lɑ́ pǝŋtʋlʋɣʋ kɛ ɩsɑɣɑtʋ hɩɩsʋɣʋ nyǝŋkɑ. Nɑ pǝ́ sɔɔsǝnɑ pɑɑ kʋyɑkʋ ŋku kʋ kɔkɔ nyǝnsɩ nɑ pǝ tɔɣɔnɑɣɑ nɑ pǝ sʋlʋm.

17-34 Pǝ kpɑɣɑʋ kʋyɑkʋ nɑɑlɛ nyǝŋkʋ nɑ pǝ́ polo nɑɑtosompɔɣɔlɑɣɑ nyǝŋkʋ tɔ. Ɩ́ kɑ́ lɑ pɑɑ kʋyɑkʋ ŋku kʋ kɔtɑɣɑ kɛ tɔlɑ wenɑ ɑ tiili tɑ́ cɑɑmɩ tɔɣɔ. Nɑ pǝ́ sɔɔsǝnɑ pǝ tɔɣɔnɑɣɑ nɑ pǝ sʋlʋm. Mpi ɩ́ kɑ́ lɑ kɔtɑsɩ kɛ kʋyɑkʋ nɑɑlɛ nyǝŋkʋ tɔɣɔlɛ, lɑtǝcɛnɑɑ nɑɑnʋwɑ nɑ nɑɑlɛ, nɑ ɩwɑɑŋ nɑɑlɛ, nɑ pǝnɑɣɑ kʋlʋmɑɣɑ ɩwɛɛsɩ kɛ nɑɑnʋwɑ nɑ liɣiti, nɑ pǝŋtʋlʋɣʋ kʋlʋmʋɣʋ.

Kʋyɑkʋ tooso nyǝŋkʋ wule kɛ lɑtǝcɛnɑɑ nɑɑnʋwɑ nɑ kʋlʋm, nɑ ɩwɑɑŋ nɑɑlɛ, nɑ pǝnɑɣɑ kʋlʋmɑɣɑ ɩwɛɛsɩ kɛ nɑɑnʋwɑ nɑ liɣiti nɑ pǝŋtʋlʋɣʋ kʋlʋmʋɣʋ. Kʋyɑkʋ liɣiti nyǝŋkʋ wule kɛ lɑtǝcɛnɑɑ nɑɑnʋwɑ, nɑ ɩwɑɑŋ nɑɑlɛ, nɑ pǝnɑɣɑ kʋlʋmɑɣɑ ɩwɛɛsɩ kɛ nɑɑnʋwɑ nɑ liɣiti, nɑ pǝŋtʋlʋɣʋ kʋlʋmʋɣʋ. Kʋyɑkʋ kɑkpɑsɩ nyǝŋkʋ wule kɛ lɑtǝcɛnɑɑ pɔɣɔlɑɣɑfɛɩ nɑɑnʋwɑ, nɑ ɩwɑɑŋ nɑɑlɛ, nɑ pǝnɑɣɑ kʋlʋmɑɣɑ ɩwɛɛsɩ kɛ nɑɑnʋwɑ nɑ liɣiti, nɑ pǝŋtʋlʋɣʋ kʋlʋmʋɣʋ. Kʋyɑkʋ nɑɑtoso nyǝŋkʋ wule kɛ lɑtǝcɛnɑɑ pǝlefɛɩ nɑɑnʋwɑ, nɑ ɩwɑɑŋ nɑɑlɛ, nɑ pǝnɑɣɑ kʋlʋmɑɣɑ ɩwɛɛsɩ kɛ nɑɑnʋwɑ nɑ liɣiti, nɑ pǝŋtʋlʋɣʋ kʋlʋmʋɣʋ. Kʋyɑkʋ nɑɑtosompɔɣɔlɑɣɑ nyǝŋkʋ kɛ lɑtǝcɛnɑɑ nɑɑtosompɔɣɔlɑɣɑ, nɑ ɩwɑɑŋ nɑɑlɛ, nɑ pǝnɑɣɑ kʋlʋmɑɣɑ ɩwɛɛsɩ kɛ nɑɑnʋwɑ nɑ liɣiti, nɑ pǝŋtʋlʋɣʋ kʋlʋmʋɣʋ.

35 Acimɑ sɔsɔɔnɑ kɛ ɩ́ kɑ́ koti nɑ ɩ́ tɔɣɔ kʋyɑkʋ pǝlefɛɩ nɑɑnʋwɑ nyǝŋkʋ wule. Tǝmlɛ nɑtǝlɩ tǝ fɛɩ lɑpʋ. 36 Ɩ́ kɑ́ lɑ Tɑcɑɑ kɛ kɔtɑɣɑ sɔɔsʋŋ nyǝŋkɑ kɛ lɑtǝcɛ, nɑ ɩwɑɑʋ, nɑ pǝnɑɣɑ kʋlʋmɑɣɑ ɩwɛɛsɩ kɛ nɑɑtosompɔɣɔlɑɣɑ. Pǝ fɛɩ sɩ tɔlɑ ɑnɩ ɑ tiili ɩ́ cɑɑmɩ. 37 Nɑ ɩ́ tǝnɩ pɑɑ tɔtɛ nte tǝ tɔɔ kɛ́ kɔtɑɣɑ tɔɣɔnɑɣɑ, nɑ pǝ sʋlʋm mpi pɑ lɑkǝnɑ tɑm tɔ. 38 Nɑ ɩ́ lɑ tɔtɔɣɔ ɩsɑɣɑtʋ hɩɩsʋɣʋ kɔtɑɣɑ nɑ ɩ́ sɔɔsɩ pǝ tǝnɑɣɑ pɑɑ kʋyɑkʋ ŋku kʋ kɔkɔ kɔtɑsɩ tɔɔ, nɑ pǝ tɔɣɔnɑɣɑ nɑ pǝ sʋlʋm.

39 Kɔtɑsɩ nsi pǝ wɛɛ sɩ ɩ́ sɔɔsɩ kɔkɔ nɑ tɔɣɔnɑɣɑ nɑ sʋlʋm nɑ ciikuɣu nɑ luɣu kʋlʋmʋɣʋ pǝ nyǝnsɩ tɔɔ kɛ́ Tɑcɑɑ ɑcimɑ kʋyɑkʋ wule tɔɣɔlɛ.